YOSHUWA 24 - Bibliyeeda Ghaydit

Yoshuwa goobalool buuneeda aba ng'eanyiida Shekemu

¹ Hean ghabwada geat Yoshuwa eemeeda fuga Israeli sean aba Shekemu, ak gaguursa gweargwa, ea fuga ambaliischi ea fuga aheeldooschi buuneeda, ea fuga hees bea Israeli; ak geapka madeeda ASEETA.

² Ak gwayeesha Yoshuwa fuga sean, “Gwayi NG'UTAMIIDA was ASEETA Israeli, ‘Ghweanigeagwa ghayi garayi goobiida giigheawda Eenda Furati, ghweanda Abrahamu was Dera, ea Nahori; abeeda gagadiiyeesa aseecheeka suuk.

³ Hean geageandi ghweandeang'wa was Abrahamu aba giigheawda Eenda Furati ak ghaadoabiiwji aba ng'eanyiida Ganaani, nea ghaanung' gwaheedu jeataanyi. Ak ghaadawji niny Isaka;

⁴ ak ghaadawji Isaka Yakobo ea Esawu. Ak ghaadawji Esawu ng'eanyiida heayeeniga bea Seyiri goombal, nea Yakobo ea diibigaaschi ghwararang'aada gaweay Misri.

⁵ Ak geajeakti Musa ea Haruni, ak ghaalaschi ng'eanyiida Misri aba gideasinyi aba bugusta nyaawa; amang'ata gearuunaneegwa jeedida.

⁶ Hean gearuuni ghweanigeagwa Misri, ak ghoahiti ghuuta basooda; ak gwadagu geeshta ghweanigeagwa fuga Misri sea mutukwajeega ea fuga faraasajeega, ea ghwahita basooda Shaamu.

⁷ Iidu nea gooyeawusa NG'UTAMIIDA, hean ghwayiin misaneeda dageascheedeang'wa ea dea fuga Misri, ak ghwanung' ghwahidu basooda badayda nyaawa ea gwadukuta saawa; ak ghwadaah gheanyangeagwa gideahindi fuga Misri; ak goopiidi jeeda dareapcheeda ea gageawiit.

⁸ Hean geayeaneegwa ng'eanyiida fuga Amori mida giigheawda Yordani; ak goong'ucheewi, ak ghayiinyi saawa geatingeagwa, ak goombali ng'eanyiida nyaawa, nea ghaanung' goosha saawa aba madeedeang'wa.

⁹ Hean ghang'eat Balaki was orjeeda Sipori, was sugoocheanda Moabu, ak gang'uchi sea fuga Israeli; ak goojeakta buuneeda eeguursa Balaamu was orjeeda Beori ghwahidu ghamwaashtaneegwa,

¹⁰ ak ea mealeeysiina iit Balaamu; hean gagooneegwa ghawooda; ak ghaghuuhaneegwa geatindaanyi.

¹¹ Ak ghoakghaawi Yordani ak ghoahiti Yeriko hean goong'ucheewi fuga Yeriko, eara Amori, ea Beresi, ea Ganaani, ea Hiti, ea Girgashi, ea Hafiti, ea Yebusi, ak ghaayiinyi saawa geatingeagwa.

¹² Hean geajeagu gheareamnyeanda madeedeang'wa, ak ghahoan saawa aba madeedeang'wa, sugoodi iyeenya bea fuga Amori; ak ea mwahoanana ng'utaang'u ghana ghuweang'daang'u.

¹³ Ak ea neagoonyeegwa ng'eanyiida mii agadiyeesiina ea mujiinajeega miyaadeasa, ak goopiidi jeeni; nea ghoayaaji haghweega sabiibajeega ea saytuunajeega mii ang'aapta.’

¹⁴ “Asi biissa asisiina mureeda NG'UTAMIIDA, ak googadiyeesi niny aba huumeanda ea doobiiwnata; oang'aamwana heedeang'wa aseecheeka ghayi gadiyeesa ghweanigeagwa aba giigheawda eenda Furati, ea aba ng'eanyiida Misri, agadiyeesiina NG'UTAMIIDA.

¹⁵ Ak iyoadaayi gideaba mwadoabiiwa gadiyeesiinda NG'UTAMIIDA, abeeda ghoaloachi askweareani dea jea agadiyeesiina, ii aseecheeka ghayi gadiyeesa ghweanigeagwa aba ng'eanyiida giigheawda eenda Furati, ghana aseecheeka Amori oopiidi ng'eanyiida nyaawa; ak aniini ea gheanyu, gajeegadiyeesiina NG'UTAMIIDA.”

¹⁶ Hean ghwasha buuneeda ak geeyeesha, “Manda adeenung'usi heeda NG'UTAMIIDA, ak geegadiyeesi aseecheeka suuk;

¹⁷ aba gideaba NG'UTAMIIDA was ASEETEANYA ghayi aruunaneasa sea ghweanigaasa ng'eanyiida Misri, aba gheeda soomjeandumeeda, ea dea ghayi sin gwadeagwajeega hees aba madeedeanya, ak ghoahaaghwaneasa aba naweedida sean siyaachiin, ea bugusta fuga sean sisikchi bugusta nyaawaan;

¹⁸ ak gooruuta NG'UTAMIIDA fuga sean aba madeedeanya was fuga Amori mida ng'eanyiini; ak ghamneawa gajeegadiyeesiina NG'UTAMIIDA, aba gideaba ASEETEANYA gil.”

¹⁹ Ng'ata ghwalamda Yoshuwa ak gwayeesha buuneeda, “Majagadiyeesiina NG'UTAMIIDA; aba gideaba niny ASEETA ghaydit gil; ak ea ASEETA lachaghuut haleanjeeda; ak ea maygwasamsa giidiinyeanyeekeagwa ghana riing'eegeagwa.

²⁰ Inyas goonung'usi heeda NG'UTAMIIDA ak googadiyeesi aseecheeka rabasta, abeeda gaygwayamu geaw ak gwasimaneegwa gidamuy, ak gayghwanung' ooshealana, nea nisineegwa gidamiy.”

²¹ Ak gwayeesha buuneeda Yoshuwa, “Manda; gajeegadiyeesiina NG'UTAMIIDA.”

²² Hean gwayeesha Yoshuwa buuneeda, “Agooga noowooschi mushoodiga aba gurooruunatkeagwa aba gideaba noaloachi NG'UTAMIIDA, ak googadiyeesi niny.” Geeyeesha, “Aseasa geawooschi mushoodiga.”

²³ Ak gwayeesha, “Asi oang'aamwana bugusteang'wa aseecheeka rabasta, ak goofuursi gurooruunatkeagwa heeda NG'UTAMIIDA, was ASEETA Israeli.”

²⁴ Ghwalamda buuneeda ak gwayeesha Yoshuwa, “Gajeegadiyeesiina NG'UTAMIIDA was ASEETEANYA ak gajeeleeysiina iit ghuutaanyi.”

²⁵ Hean gwasin Yoshuwa neajeeda sea buuneeda askweardida, ak gwasin digheanyeeka ea deaweeda aba badahuuka nyaawa aba Shekemu.

²⁶ Ak gang'oorsa Yoshuwa ng'asheesu jeeda gitaabooda deaweedeeda ASEETA; ak gageanu lagheaneeda haw; ak ghamiinda aba hoowa aba geeshta sabiida neekeewa heeda ghaydit bea NG'UTAMIIDA.

²⁷ Ak gwayeesha Yoshuwa buuneesean, “Ng'ula, lagheaneeni gayghoah muushoocheanda aba heedeanya; aba gideaba lagheaneeni niyiiy ng'asheega sean abaloolaneasa NG'UTAMIIDA; asi gayghoah muushoocheanda aba badahuukeagwa gideaba adoonung'usi heeda ASEETEANG'WA.”

²⁸ Hean gwasiksa Yoshuwa buuneeda gaweay gaba nih weah heechea goobiida.

Miyeeda Yoshuwa ea Eliyasari

²⁹ Iing'ata ng'asheesu ghami Yoshuwa was orjeeda Nuni, siida gadiyeeda NG'UTAMIIDA, nea abeeda gaba gweanyeew bughala ea damanamughuush.

³⁰ Ak geebung'sa ng'eanyiidaanyi mida Dimnat-sera mida ng'eanyiida heayeeniga Efraimu, mida wiilooda ng'eanyiida ghayeawa bea giijeeda Gashi.

³¹ Fuga Israeli gagadiiyeesa NG'UTAMIIDA askwearjoojiga sean bea Yoshuwa, ea askwearjoojiga sean bea gweargwa, abiida hiji iimea Yoshuwa ghayi nal gadiyeeda sean sin NG'UTAMIIDA aba badayda fuga Israeli.

³² Geakiga ghayi bea Yosefu eana fuga Israeli Misrihiin, geebung'sa ng'eanyiida Shekemu, heeda ng'eanyiida ghayi shaah Yakobo aba heeda orjooga Amori was ghweanda Shekemu aba lapiyaji bughala ghoah ng'eanyiida jea gwahearan jeacheenga Yosefu.

³³ Ak ghami Eliyasari was orjeeda Haruni; ak geebung'sa niny Gibeya, was mujiineeda Finehasi was orjeedaanyi, ghayi siitaw niny mida ng'eanyiida heayeeniga Efraimu.