YOSHUWA 1 - Bibliyeeda Ghaydit

ASEETA gwarukusa Yoshuwa gideaba ang'waanya ng'eanyiida Ganaani

¹ Iing'ata miyeeda Musa was siida gadiyeeda NG'UTAMIIDA, hean gwayeesha NG'UTAMIIDA Yoshuwa was orjeeda Nuni, nea niny ea siida gadiyeeda Musa gil.

² “Musaheeda was Siideanyu bea gadiyeeda nimi; asi adiing'diing'da, aghaawana Yordanean, ang'iing'i ea fiisu, aweayeena ng'eanyiida jea daadaw saawa was fuga Israeli.

³ Heechea ealaabwa sean aba geeshangeagwa neagoonyeegwa, gawuurji gidaghayi eaheeleesiindi sea Musa.

⁴ Ghang'eada dareapcheeda ea ghoah Lebanoni ea ghwahita eendida hawiin, ea eenda Furati, ea ng'eanyiisean bea fuga Hiti ea ghwahita basooda haw biyeara abeeda gayghoah moonghoodeang'wa.

⁵ Manda siida jea gawa ghamiinaada aba madeadaang'u aba jeeda eawoojigaagu sean bea giibindaang'u; gawuurji gidaghayi eandeayeati Musa, asi ea gichea eendeayeeta sea ang'iing'i gil; maydaashoanyaneey nea maydanung'useey heeda.

⁶ Daruusiida nea gimwaanyiidi muuchi; aba gideaba gaynung' gwahearan fiisu ng'eanyiida ghayi eayeaksi ghweaniga nyaawa habeawooda gideaba gaydaadaw saawa.

⁷ Daruusiida galeagasean nea guwoosi mwaay muuchi, sina nea gisikteawi muuchi ghabeada deaweedeeda sean ghayi rukuneey Musa was siideanyu bea gadiyeeda; adinung'waadi yamoodeaba geaw bea geatinda dugwa ghana geatinda ghaadaam, ak gay nyasa gheamamda miy aba heechea una sean.

⁸ Gitaaboani bea deaweedean adagwaheeli ghuutaang'u galeagasean, nea giiteemsheesi askweari ea eawa, nea gisikteawi muuchi ng'asheega sean sing'oorsa jeeda; aba gideaba nih gichea ghwanung' nyagaada gil aba naweadaang'u, nea ginyasi gheamamda miy.

⁹ Neada ea mii aniini? Dea rukuneey gideaba daruusiida nea gibeahi meaynata miy; adibeali nea adihirbabani aba gideaba NG'UTAMIIDA was ASEATAANG'U gaymideawana heechea una sean.”

Yoshuwa gwarukusa buuneeda gideaba ootiing'diing'da geat

¹⁰ Hean gwarukusa Yoshuwa fuga hees bea buuneeda,

¹¹ “Ang'ata asiga ghuuta museasooda ak goorukusi buuneeda, gideaba, ‘Ootiing'diing'da geat; aba gideaba iing'ata eawooji samwagu gajeakghaawana eeni bea Yordaniin, ak gooweayi jeeda oombala ng'eanyiida gooneegwa NG'UTAMIIDA was ASEETEANG'WA ak goombali.’”

¹² Hean gwayeesha Yoshuwa eemeeda Rubeni ea Gadi, ea eemeeda silach bugusta bea Manase,

¹³ “Oapkaada ng'asheanda ghayi rukuneegwa Musaheeda was siida gadiyeeda NG'UTAMIIDA nea gwayi, ‘NG'UTAMIIDA was ASEATAANG'U gaygagooneegwa heechea afuufana, ak gaygagooneegwa ng'eanyiini.’

¹⁴ Gadeemgeagwa, ea diibigeagwa, ea dugweagwa gaygoobiida ng'eanyiida gooneegwa Musa was gayeewda Yordani, nea headiga sean mideawa dabita ng'ucheeda mida bugusteang'wa gayghang'ata gaweay madeeda buweadeegeagwa ak ghaweat saawa,

¹⁵ ea ghoadaw NG'UTAMIIDA buweadeegeagwa fuufta gawuurji gidaghayi goondaneegwa ak geembal ng'eanyiida ghayi adaw NG'UTAMIIDA was ASEETEANG'WA saawa; ng'ata gajabiiksiina ng'eanyiida ghayi iteang'wa oombali, ak gajoombala was ng'eanyiida guh Musaheeda was siida gadiyeeda bea NG'UTAMIIDA was giigheawda Yordani bea heeda biyeara.”

¹⁶ Ak geasha ghuuta Yoshuwa nea geeyeesha, “Gajeesina ng'asheesu sean irukuneasean, eara heechea ajeaktaneasa sean gajeeweaya.

¹⁷ Gawuurji gidaghayi siileeysiindi iit Musa aba haleanjeeda sean, asi gajeeleeyseey iit; gagasa mideawana NG'UTAMIIDA was ASEATAANG'U, gawuurji gidaghayi indeayeati Musa.

¹⁸ Siida wassean jea ghaheawa diigheandaang'u, nea mooleeysiiniit ng'asheagaagu sean irukusi niny, abeeda gajeenuus. Daruusiida nea gimwaanyiidi muuchi.”