YONA 4 - Bibliyeeda Ghaydit

Nyarasta Yona ea baydeayda ASEETA

¹ Ak ea moohoosana Yona ng'asheanji, hean ghwanyareas.

² Hean ghamwaash NG'UTAMIIDA nea gwayeesha, “Geamuscheey NG'UTAMIIDA, nih mii gidearukuneey aba damanda ghayi eandeewi ng'eanyiideanyu? Hean ghoah gideamng'awi ak geawi Darshishi; aba gideaba ghaanali ang'iing'i guwoosi ASEETA mideawa bariinyeega ea baydeayda, mii asas nyaras, bea bariinyeega huumwa, nea gisti ng'asheega munyas.

³ Ak ghamneawa Ea NG'UTAMIIDA, asi geamuscheey geanda eaweegeasu, aba gideaba ghang'wana ghaameayi mwasamwa gideaba geabiidi ng'eanyiida.”

⁴ Hean gwayeesha NG'UTAMIIDA, “Ghamneawa iinyareasi gisini gida doabiiwi?”

⁵ Ng'ata gwariteawa Yona jeeda mujiini, ak goopteada aba gayeewda mujiini, ak gwadeeksa geaw meandiida aba hoowa. Ak goopteada aba guumda heeda was jirooneadaanyi, ea ghwadaah gichea eesima mujiini.

⁶ Ng'ata gooruudu NG'UTAMIIDA was ASEETA geeta, ak ghwanung' gageawiit ea ghwanaawa Yona, ak ghoah jirooneeda aba uhuudaanyi, jea ghaweat aba jeeda sawanadeadaanyi. Hean goohoosan Yona geetida.

⁷ Muchu nea ghaghar gayeew eaweeda niirja goojeagu ASEETA ghupcheeda ak ghwaak geetida, ak hean ghwasis.

⁸ Iidu nea goorearu aseeta, goojeagu ASEETA jeameeda ng'waan leabu gayeew, hean ghwalas daknooda uhuuda Yona ea ghoahiil; ea gwayi bwak ea gagasa miyeeda, ak gwayi, “Ghang'wana ghaameayi ea meabiidani ng'eanyiida.”

⁹ Ghwalamda NG'UTAMIIDA ak gwayeesha Yona, “Ghamneawa gisini gida doabiiwi iinyareasi aba ng'asheega geeta?” Hean gwayeesha, “Ghwadoabiiw iyaanyareaschi danyareas ea dami.”

¹⁰ Ng'ata gwayeesha NG'UTAMIIDA, “Ang'iing'i gibwaydi geeta mii gadiyeesiina, nea ea minung' gwaheedu, ridu eaweecheanjagi ak ghaghajaamiit eaweecheanjagi.

¹¹ Ak aniini ea maydabwayda Ninaawiheeda was mujiineeda haw, mida jeeda fuga naawa sagalamnyooji bughala ea diktam mwanala gida mida meatkweeda geatinda dugwa ghana geatinda ghaadaam, ak gwandeawa eara dugwa saang'a?”