YONA 3 - Bibliyeeda Ghaydit

Yona gwasissa mureeda NG'UTAMIIDA

¹ Iimuchu ghwahita ng'asheanda NG'UTAMIIDA heeda Yona deaba iyeenya, ak gwayeesha,

² “Ng'eada, una Ninawi, mujiineedida hawiin, ak girukwiidi ng'asheanda ghayi earukuneey.”

³ Ng'ata ghang'eat Yona ak gawa Ninawi gawuurji gidarukusiinda NG'UTAMIIDA. Nea Ninawi ea mujiineeda haw gil, neaweesiindaanyi gaba eawooji samwagu.

⁴ Ghang'eat Yona ak gawa jeeda mujiini beata eaweeda asagi. Hean goojuur, “Eawooji haradam, Ninawi gajeehuuyda!”

⁵ Hean ghamwas fuga Ninawi ASEETA; hean gwaheeleesa giiluuldeaydeaba geat, ak gaba siisi akwa hang'weaka guniyajeega, gida ng'eada siida haw ea gagul dea mwanang'.

⁶ Ng'ata ghwahita ng'asheanda heeda sugoocheanda Ninawi, ak ghang'eada uhuuda hoorgeadaanyi, ak gwajakta hang'daanyi, ak gookwealsa geaw guniyajeega, ak goopteada aba jeeda deareeda.

⁷ Hean gwarukuta giijasta jea eerukuta aba jeeda ng'eanyiida Ninawi, “Aba diigheanda sugoocheanda ea fuga hees: ak gilinyoo ea siida gil ea dugwa, ea gisilga, ghana ea nooga, mayghwaak eara gil; adaghwaak gil nea adaghwali beega,

⁸ ak abeeda buuneesean ea diyeanga anung' gookwa hang'weaka guniyajeega, ak gooyeawusa ASEETA muuchi; daba siisi nung'waada ng'asheagaaschi munyas ea munyinda mida geatingaaschi.

⁹ Ghwanal ng'eaha, gideaba ASEETA gwadeepa ghwayam geaw aba nyarastaanyi ng'waan, ak ea meeshealani?”

¹⁰ Hean daah ASEETA gidasin gidayamda geat aba ng'asheega nyaawa munyas, ghwanung'waada ASEETA nyarasta ghayi rugu jea gwasima fugiga; ak ea mudu gwasin.