YONA 1 - Bibliyeeda Ghaydit

Yona masisiina mureeda NG'UTAMIIDA

¹ Hean gaweesa ng'asheanda NG'UTAMIIDA Yona orjeeda Amitayi, ak gwayeesha,

² “Ng'eada una Ninawi, mujiineedida hawiin, ak giijuursi; aba gideaba munyasnacheeka nyaawa nihidu madeedeanyu.”

³ Ng'ata ghang'eat Yona gamng'awsa Darshishi ghang'amwa madeeda NG'UTAMIIDA. Hean gwararang'eesa Yopa ak ghwanyasa hoowa maleambooda jea gawa Darshishi; ak ghoadayda lapiyeeda jea gwading'deawa maleambooda ak gwading'da, goodeayi sea fuga suurja ea ghwahita Darshishi, ghang'amwa madeeda NG'UTAMIIDA.

⁴ Ng'ata gweadu NG'UTAMIIDA jeameeda haw aba jeeda basooda, ak gwajagu basooda laweajajeega hees, ea gwayi bwak ea ghwariikghta ghwanyar maleambooda.

⁵ Hean ghang'ut muuwda fugiga mida jeeda maleamboodean ak gaba siisi aguul nea gaguursa aseataanyi; gageanu sareenda mida jeeda maleambooda ak gwajaksa jeeda basooda, ghwahasasiit maleambooda. Nea Yona ea nirarang'aada gawa hing'eadayda maleambooda heeda duukta ng'eanyi ak ghwalas gheata ruweanga.

⁶ Ng'ata gaweesa siida manmani maleambooda ak gwayeesha, “Ghwasaan ang'iing'i siida saang'a ruweanga? Ng'eada guursiina gheawunga ASEATAANG'U! Gwadeaba ghaweadeasa aseeta, ak ea meeshealani.”

⁷ Gaba siisi eesha nuut, “Beeni eebwara lagheanga ak gajeanala siida bea ramaseanda ayi bwak ea ghoahiidu heedeanya munyinda.” Hean ghabwar lagheanga ak ghwanyas lagheaneeda Yona.

⁸ Hean geeyeesha niny, “Rukuneasa gaba ng'eaha ramaseanyeeksu ageasaan? Gadiyeadaang'u naaha? Ak gileabu yeenu? Ng'eang'deang'wa eenu? Nea ang'iing'i gibeahi aneamwa?”

⁹ Ng'ata gwayeesha fugiga, “Aniini geabeayi Ebraniya; ak geawalayi gheang'da NG'UTAMIIDA, was ASEETA humng'eeda, ghayi sin basooda ea ng'eanyiida ghajaam.”

¹⁰ Hean ghang'ut muuwda fugiga, ak gwayeesha niny, “Gawuurjiin ng'asheanji isiniini!” Aba gideaba ghwanal buuneeda gideaba gamng'awa madeeda NG'UTAMIIDA aba gideaba abeeda nirukusa saawa.

¹¹ Hean gwayeesha fugiga niny, “Ghang'wana geesimaneey naaha, iijea ghahawda basooda?” Abeeda aba damandida basooda gudu gooyuuk muuchi laweajajeega.

¹² Ng'ata gwayeesha niny fugiga, “Oang'waanyaan ak goojaksean jeeda basooda; ak abeeda gaygwayi saw basooda; ghaanali ng'asheesu bea jeameeda hawiin ghwanyaseegwa aba badaydeanyu.”

¹³ Hean ghoahang'waay aba uurda googeal maleambooda heeda ghajaam, ak ghwaraay, aba gideaba gweagu muuchi laweajajeega basooda.

¹⁴ Ng'ata gooyeawusa fugiga NG'UTAMIIDA, “Geemuscheey, ea NG'UTAMIIDA, adiidu gihuydaneasa aba eaweegeaba siisi, nea adiidu giihaageasa foojeanda weay mwadaagha; aba gideaba ea NG'UTAMIIDA, gisini ang'iing'i gida ibwariinyi.”

¹⁵ Hean ghoang'waay Yona ak gwajaksa jeeda basooda; ak ghahawda jeameeda basooda aba damandida.

¹⁶ Hean ghoawal muuchi fugiga NG'UTAMIIDA, hean ghoadaw lukghumajeega NG'UTAMIIDA nea gweaksa habeawooda.

¹⁷ Ng'ata gweadu NG'UTAMIIDA ghweayeanda haw ak ghwanukghuta Yona; ak goobiida Yona jeeda ghweayeanda eawooji samwagu askweari ea eawa.