Yohaana 9 - Bibliyeeda Ghaydit

Yesu ghoahaap siida siji nea ng'oaw

¹ Eaweecha ghang'ata ak ghwadaah siisi ghayi siji nea ng'oaw.

² Iidu ghoanyaash ginealangaaschi niny nea gwayeesha, “Rabi, gwasin ng'eaha riing'eeda, gwasin siisi ghana sin ghwaan ea ghaamwat inyas geeji nea ng'oawiini?”

³ Ghwasha Yesu nea gwayeesha, “Mii gideaba nisin siisi riing'eeda gil, ghana ghwaan ea ghaamwat, geebaysiina ghwadaajiit gadiyoojiga ASEETA aba niny.

⁴ Gammiisa eesina gadiyoojiga siida ajeaknean, iidu ea askweari; ghwahidu eaweeda, ak ea mayghoamu siida gagadiiy.

⁵ Hiji duu dandeewa jeeda ng'eanyiidean, aniini geawooschi weeshinda ng'eanyiida.”

⁶ Ahiit baloaldaanyi gwasin sheang'weeda aba ng'usheega ak ghwayeasha gheanyangeaba siidida ng'oawiin,

⁷ ak gwayeesha niny, “Una ak giihuuni gheanyangaagu aba jeeda dabascheanda Siloamu” (nea gideaba dea siicheakta). Ng'ata gawa Siidida giihuushi ama ng'ata gabiigu nea niing'wearda.

⁸ Gwayi fuga ascheayi sea fuga eawoojisu nidaah siidida aba mwadi nea gamusiisachiini, gwayi, “Neada siisi ea mii siidida apteadayi nea gamusiisachiini?”

⁹ Gwayi mwaatkwa, “Ninyi”; nea mwaatkwa gwayi, “Manda, geaghus gideaba gawuurji sea niny.” Gwayeesha, “Siida aniini gil.”

¹⁰ Geeyeesha, “Ghwajaadataan gheanyangaagu?”

¹¹ Ghwasha niny nea gwayeesha, “Gwasin siidida siguura Yesuhiin sheang'weeda ak ghwayeasha gheanyangeasu amahit gwayeeshiinean, ‘Una akgiihuushi aba Siloamu’; ng'ata geawi ak geahuunyi gheanyangeasu amahit ghaang'weardi.”

¹² Geeyeesha, “Niny ghamneawa gwanda yeenu?” Hean gwayeesha siidida, “Aniini mwaanali.”

Farisaayajeega gwasikteawa gissihaapta siida

¹³ Ng'ata geayaat siidida ghayi ng'oawiin heeda Farisaayajeega.

¹⁴ Nea abeeda eaweecheandida sina Yesu sheang'weeda ak ghwayeasha gheanyanga siida ak ghwajaada nea eaweeda Sabaatohi.

¹⁵ Hean ghoanyaash Farisaayajeega gicha siidida ginyasta giing'weerdeayda?” Ghwalamda niny ak gwayeesha saawa, “Ghwayeasha gheanyangeasu sheang'weeda ama ng'ata geahuunyi ak ghaang'weardi.”

¹⁶ Gwayi Farisaayajeega mwaatkwa, “Siisi maleapna heeda ASEETA aba gideaba moang'waanya Sabaato.” Nea mwaatkwa gwayi, “Gayghoamuustaan siida riing'eeda gwasin gwadeagooda sunu?” Hean ghwadarda buuneeda.

¹⁷ Geebiikta gicha eenyaash siidida ng'oawiin, “Asi ghamneawa siisi iinijaat gheanyangaagu giyeaniin ang'iing'i aba badaydeaba siisi?” Gwayeesha, “Siisi sibaneeda gil.”

¹⁸ Ea mamwasa fuga Yahudi gideaba siidida ghayi ea ng'oaw ak ghamneawa ea niing'wearda, ea eeyi bwak ea gaguursa ghwaan ea ghaamwat.

¹⁹ Hean geanyaash ghwaan nea geeyeesha, “Nih baleandeang'wa ooyeenyi ghayi geeji nea ng'oawi? Ak ghamneawa ghwanyastaan giing'weerdeayda?”

²⁰ Ghwasha Ghwaan ea ghaamwat ak gwayeesha, “Aseasa geanali gideaba nih baleandeanya gil, ea gideaba geeji nea ng'oaw;

²¹ ak ginyasta giing'weerdeayda aseasa ea meanali, ak geabwadi nih eara siidida jaat gheanyangaaschiin ea meanali. Oanyaasha niny aba gideaba siida niheedu gil ghoamu gwarugu niny.”

²² Gwarukuteaydunu ghwaan ea ghaamwat aba gheawalmeeda fuga Yahudi aba gideaba fuga Yahudi niheeleesa gideaba siida wassean jea gwarugu aba ghuutaanyi gideaba Yesu niny Gristohi gajeeruuteawa jeeda ghooriida siinealshacheewa.

²³ Ak ghoah gidarukuteawa ghwaan ea ghaamwat gideaba, “Niny siida niheedu gil oanyaasha.”

²⁴ Gabiikta deaba iyeenya gaguursa siidida ghayi ng'oawiin ak gwayeesha, “Duumsheesiina ASEETA; aseasa geanali gideaba siisi gaba riing'a.”

²⁵ Ghwasha nea gwayeesha, “Siisi iibea riing'a aniini ea mwaanali, ak ghaanali aniini ng'asheanjagi nea gideaba ghayi geawooschi ng'oaw ak ghamneawa ea naang'weardi.”

²⁶ Geeyeesha niny, “Gwahindaneeyiin? Ghwajaataan gheanyangaagu?”

²⁷ Ghwasha nea gwayeesha saawa, “Nigeawiit darukuneegwa ak ea mooleeysiini iit, ghwasaan anda googasayi ayiinya gicha? Eara agooga googasayi ahuwa ginealangaaschi?”

²⁸ Geeng'eawi nea geeyeesha, “Ang'iing'i guwoosi giinealaneadaanyi ak aseasa geawooschi giinealanga Musa.

²⁹ Aseasa geanali gideaba ASEETA ghayi goobalool Musa amaduuku siisi ghanyea meanali eara heeleabu.”

³⁰ Ghwasha siidida, “Ng'asheanji ghwanung' ghaham fih ng'eanyi! Agooga moanali heeleabu ak ea nijaat gheanyangeasu.

³¹ Geanali gideaba ASEETA mooleeysiina iit fuga riing'eega, nea siida ii dea gadoowani ASEETA nea gwasin gidida bwariiy ninyiin, gaygooleeysiit ASEETA.

³² Ghang'eada dea sibwada ng'eanyiida miyeeyiinya siida jaat gheanyanga siida ghayi siji nea ng'oaw.

³³ Siisi iimaleapna heeda ASEETA ea mayghoamu gwasin eara gil.”

³⁴ Ghwasha Saawa ak gwayeesha, “Ang'iing'i geejiilseey jeeda riing'eeda haw ak gajanaaleasa?” Hean geeruuta jarooda.

Ng'oowunda guroorooda

³⁵ Ghwayiiy Yesu gideaba siiruuta jarooda niny, hean iidu nea ghwadaah gwayeesha, “Ang'iing'i gimwasi Orjeeda Siida?”

³⁶ Ghwasha ak gwayeesha, “Siida Mureeda, ng'eaha gil, ak abeeda gaydamwas niny?”

³⁷ Gwayeesha Yesu niny, “Nidaahi niny, ak ea siisi abaloolnyiin.”

³⁸ Hean gwayeesha, “Ng'utamiida, Naamwaschi”; ak ghaghadoawan niny.

³⁹ Gwayeesha Yesu, “Aniini ghaawunyi badayda ng'eanyiida aba girgweaksiinda ak abeeda fuga moang'wearda gayghoang'wearda nea gang'oowiidi fuga ghamneawa ang'wearda.”

⁴⁰ Gwayiing'shi fuga mwaatkwa bea Farisaayajeega ghwanyawa neeki ng'asheegiga ak ghoanyaash gideaba, “Eara aseasa geawooschi ng'oowi?”

⁴¹ Gwayeesha Yesu saawa, “Ghwanyawa iyoowooschi ng'oowi ea majandeawana giidiinyeanda, ak ghamneawa gooyeenyi agooga, ‘Aseasa geang'weardi,’ abeeda giidiinyeanyeekeagwa gudugwanda heeda.