Yohaana 4 - Bibliyeeda Ghaydit

Yesu ea gatmooda Samariya

¹ Iimuchu nea ninal Ng'utamiida gideaba niyiiy Farisaayajeega gideaba Yesu ninyas giinealanga saang'a burdeawa Yohana nea goobaatiisan

² (nea Yesu niny ea miigoobaatiisan buuneeda, goobaatiisan ginealangaaschi),

³ ghabeawa ng'eanyiida Yudeya ak gabiikta gicha Galilaya.

⁴ Aba beadi gaygwasik jeeda ng'eanyiida Samariya.

⁵ Ghwahita mujiineeda Samariya siguura Sikari, neekeewa madamnyeanda ghayi adaw Yakobo orjeedaanyi siguura Yosefu.

⁶ Abeeda gwanda hoowa healadeeda Yakobo, hean ea nibur Yesu aba beata, ak goopteada aba murdeeda healadeeda. Nea abeeda gaba aseeta lah.

⁷ Iidu ghwahidu gatmoomba Samariya ghwaram beega. Gwayeesha Yesu niny, “Goonean beesu aaleayi.”

⁸ Abeeda aba damandida niweay ginealangaaschi mujiini ghwasha hamita.

⁹ Gwayeesha Gatmoodida bea Samariyahiin niny, “Ang'iing'i guwoosi siida Yahudi, nea aniini geawooschi gatmooda Samariya giimuustiin gideaba gaymusean beega?” Aba gideaba fuga Yahudi maguuyi haleanja sea fuga Samariya.

¹⁰ Ghwasha Yesu nea gwayeesha niny, “Inyeeda ghwanyawa ginali haleanjeeda goona ASEETA ak ea ng'eaha gil siida eeshiineey, ‘Goonean beega jea dali,’ ghwanyawa gaymusa niny ak gaygagoonyi beega mideawa eaweega.”

¹¹ Gwayeesha Gatmoodida niny, “Ea orjeeda siida mureeda ang'iing'i mindeawani geammooda jea ramnana beega, ak ghabwada nih healadeeda easheagi jih; abeeda gaygeannana yeenu beesu mideawa eaweegean?

¹² Neada ang'iing'i guwoosi haweewa ghweandeanya was Yakobo gooneasa healadeani nea ghwali niny beega sea diibigaaschi ea dugwaaschi?”

¹³ Gwayeesha Yesu gatmoodida, “Siida wassean nyooh ghwali beesu gaygabiikta ghwaak muwoash,

¹⁴ amaduuku siichea ghwali beega jea daadaw aniini mayghwaak muwoash earahay; aba gideaba beegiga jea daadawiin gayghoah aba jeadaanyi gheang'deenda nea goobeakbeaksa eaweega manda muudeanooda.”

¹⁵ Gwayeesha Gatmoodida niny, “Siida mureeda, eaniyean goonean beesu, ea mabiikta ghwaagan muwoash gicha nea meabiikni hiji daram beega.”

¹⁶ Gwayeesha Yesu niny, “Una, guursiina siyeadaang'u ak giideani hiji.”

¹⁷ Gwayeesha gatmoodida niny, “Meandeawani siyeeda.” Gwayeesha Yesu gatmoodida, “Asi girgu huumwa gideaba, ‘Mindeawani siyeeda’;

¹⁸ aba gideaba nindeawi siyeendi muut, ak ghamneawa nih indeawiin ea mii siyeadaang'u gil. Asi aba hiji girgu huumwa.”

¹⁹ Gwayeesha Gatmoodida niny, “Siida mureeda, aniini iyeang'ulayi guwoosi sibaneeda.

²⁰ Ghweanigaasa ghayi iissa ghaghadoawan ASEETA aba uhuudeaba giijeeni, amadu gooyeenyi agooga heeda miisa ghadoawanda ASEETA Yerusalemu gil.”

²¹ Gwayeesha Yesu gatmoodida, “Iya, mwasaan, ghwaan damanda jea ea majaghadoawana Bwaabwa aba uhuudeaba giijeeni, ghana hoowa bea Yerusalemuun.

²² Agooga iissa ghoaghadoawanyi gida moanali, duuku aseasa geanali gida sighadoawanyi, aba gideaba lealeanooda gwaleabu heeda fuga Yahudi.

²³ Ak ghamneawa ghwaan damanda, nea damanda gwanda, nea fuga ghadoawan bea huumwa gayghadoawan Bwaabwa aba guroorooda ea huumwa, aba gideaba Bwaabwa gagaseadayi ghaghadoawan fuga sunu.

²⁴ ASEETA guroorooda gil nea fuga ghadoawan niny gammiisa ghaghadoawan aba guroorooda ea huumwa.”

²⁵ Gwayeesha Gatmoodida niny, “Ghaanali gideaba gayghwahidu Masiyeeda (siguura Gristo), eaweeda hina gayghoahiimneasa ng'asheega sean.”

²⁶ Gwayeesha Yesu gatmoodida, “Aniineani ghamneawa abaloolnyiin niny gil.”

²⁷ Deagheata ghapka Ginealangaaschi ak ghahamng'eanyi iidaah nea goobalool gatmooda, ghanyi ea manda siida eesha, “Gigasayi naaha?” ghana “Ghwasaan anda gibalooli sea gatmooda?”

²⁸ Gwanung'usa Gatmoodida sirbiidaanyi heeda ak gawa mujiini amahita gwarukusa buuneeda gideaba,

²⁹ “Apkaani adaaha siida rukunean ng'asheegeasu sean ghayi easinyi! Siisi gajea mii Gristohi?”

³⁰ Ghabeawa buuneeda mujiini ak gaweay headaanyi.

³¹ Aba damandida gamearmearani Ginealangaaschi nea gwayeesha, “Rabi, agiischeena.”

³² Hean gwayeesha niny saawa, “Aniini geandeawi hamita jea daak moanali agooga.”

³³ Hean goonyeari geat giinealanga gideaba, “Gwadeepa gwanda siida niyeassa hamita?”

³⁴ Gwayeesha Yesu saawa, “Hamiteanyu sinooda gidabwariiy siida ghayi ajeaknean gil, ak ghaahiichi gadiyeadaanyi.

³⁵ Neada ea mooyeeni agooga, ‘Ghwashoada sheeh ang'wan ak ghwahit, ak gay ghwahidu damanda lajita booga’? Ak geayeeshiineegwa aniini, oang'weerda ak ghoadaayi beadooda madameega nigeawiit gaweeriidi aba lajita.

³⁶ Siida lach booga ninyas mushaahareadaanyi, nea iissa ghoawaam haghweega aba eaweega manda muudeanooda, ak abeeda gaygahoosan duwaawi siida heeta hista ea dea lach.

³⁷ Ak ghoah huumwa ng'asheanda ghayi sirugu bea gideaba, ‘Gwahista siyagi ak ghwalach siinuut.’

³⁸ Aniini geajeaktaneegwa alaja booga mii agadiyeesiina, ghayi gagadiiy fih suuk ak ghamneawa agooga ea nooweayi jeeda gadiyeeda nyaawa.”

³⁹ Ghamwas fuga saang'a bea Samariya niny aba jeedeaba mujiineedida aba badayda muuwuunoodeaba gatmoodida, bea gideaba, “Gwarukunean ng'asheega sean ghayi easinyiin.”

⁴⁰ Gaweay fuga Samariya heeda ak gamus gwandeayi saawa, ak goobiida hoowa eawooji iyeenya.

⁴¹ Ghamwas fuga saang'a muuchi aba badayda ng'asheandaanyi.

⁴² Gwayeesha saawa gatmoodida, “Aseasa meamwasi aba ng'asheagaagu irugu, aseasa siyiinyi, ak geanali gideaba aba huumwa siisi lealnoocheanda ng'eanyiida.”

Yesu ghoahaap orjeeda siida haw

⁴³ Iing'ata eawooji iyeenya ghabeawa hoowa ak gawa ng'eanyiida Galilaya.

⁴⁴ Aba gideaba Yesu gamuuwu gideaba sibaneeda moamu ghwanyas mureeda aba ng'eanyiidaanyi.

⁴⁵ Hean hita Galilaya, ghwadeapta fuga Galilaya, aba gideaba eara saawa abeeda gwanda jeeda ghweelmeeda, ak ea nidaah ng'asheega sean sin aba Yerusalemu damandida bea ghweelmeedean.

⁴⁶ Gabiikta gicha mujiineeda Ganeeda Galilaya heeda ghayi yamwa beega ak ghoah difaayeeda. Abeeda gwanda Gapernaumu siisi haw mideawa orjeeda miyaan.

⁴⁷ Iidu nea ghwayiiy siidida gideaba Yesu niwuna ng'eanyiida Yudeya ak ea nihidu Galilaya gawa heeda ak gamus gideaba beeni ahaabwa orjeedeanyu ghabwar miyeeda.

⁴⁸ Ak gwayeesha Yesu, “Iimoadaahi gwadeagooda ea haleanjeeda deamdeameadi ea majamwasa.”

⁴⁹ Gwayeesha Siidida hawiin niny, “Siida mureeda, eaniyean nung' eeweaya heeda miighameawa jeepteanyu.”

⁵⁰ Gwayeesha Yesu niny, “Una; orjeedang'u eamajeek.” Hean ghamwas Siidida ng'asheega Yesu ak ghang'eat gawa.

⁵¹ Damandida duu ghwararang'aadawaan, gwaroonyi sea soomjoagaaschi ak geerukusa gideaba orjeedaanyi eamajeek.

⁵² Ghoanyaashta niny damanda haabwa baleanda, gwayeesha saawa, “Ghabeawa sheagheeda heeta askweari nea gaba aseeta ispwa.”

⁵³ Iidu ghoapkaat ghwaan gideaba damandida rukusiina Yesu gideaba, “Orjeedaang'u ea majeegiin”; hean ghamwas niny, sea fugeaba gheanyi sean.

⁵⁴ Nih gwadeagoodeaba iyeenya sin Yesu gil damanda leapna ng'eanyiida Yudeya nea gawa Galilaya.