Yohaana 21 - Bibliyeeda Ghaydit

Yesu gabussa giinealan ispwa

¹ Iing'ata hiji gabiikta Yesu goohiimsa geaw ginealangaaschi aba ghuuta basooda Diberiya, ak goohiimsiindunu geaw.

² Simon Betaro, ea Domasoyda siguura Saleaygweanda ea Natanaeliyda ng'eanyiida Ganeeda Galilaya, orjooga Sebedayo, sea ginealangaaschi suuk iyeenya, nea abeeda gwandeayi sean.

³ Gwayeesha Simon Betaro saawa, “Gaydawa dalealu ghweayeega.” Gwayeesha saawa niny, “Eara aseasa gajeeteayeena sea ang'iing'i.” Ng'ata goodeayi ak gwading'da maleambooda; ak eaweedida ea mwanyasa eara gil.

⁴ Muchu nea goorearu aseeta ghamiinaada Yesu aba ghuuta basooda; nea giinealanga ea mwanala gideaba Yesu gil.

⁵ Hean gwayeesha Yesu saawa, “Diibiga, goondeawi ghweayeega?” Ghwasha saawa nea gwayeesha, “Manda.”

⁶ Gwayeesha saawa, “Ajaksiina gheareedanga murdeeda maleambooda bea geatinda dugwa, ak gajanyasa.” Ng'ata gwajakta gheareedanga ak ghwaraay goongiiru aba seang'ayda ghweayeega.

⁷ Iidu gwayeesha giinealaneedida bwariiy Yesuun Betaro, “Nih Ng'utamiida!” Iiy Simon Betaro gideaba nih Ng'utamiida gil, gageanu hang'daanyi ak gwaradiischeewa aba gideaba gwachi ea dawiish, amang'ata gwadeambiirsa jeeda beega.

⁸ Hean ghapka giinealanga suurja ea ghwahidu ghuuta basooda nea goongiiru gheareedanga nea ghwanyiit ghweayeega, nea abeeda ea miisheageewa ng'eanyiida ghajaam aba iisidasaada geeshanga gayghwahita geeshan bughala hiteayda ghuuta beega.

⁹ Hita ng'eanyiida ghajaam ghwadaah beasta ghuurga nea sighwar nea gwanda beasta ghweayeega ea mukaate.

¹⁰ Gwayeesha Yesu saawa, “Ayeani hiji ghweayeega mwaatkwa oolealu ghamneawa.”

¹¹ Hean gwading'da Simon Betaro jeeda maleambooda ak gaksu gheareedanga ea ghoahiidu ng'eanyiida ghajaam nea ghwanyiit ghweayeega hees nyiit bughala ea haradam ea damasamwagu; earapeadi saang'a ea gwadeenuun, ea mii gang'acheaweada gheareedanga.

¹² Gwayeesha Yesu saawa, “Apkaani ajaada ghuusi.” Nea abeeda ghanyea manda aba jeeda giinealanga dea badaksa ak ghoanyaash gideaba, “Ang'iing'i ng'eaha?” Aba gideaba ghwanal Ng'utamiida gil.

¹³ Ghwaan Yesu ak gageanda mukaate ak ghoadaw saawa ak gwasindunu eara aba ghweayeegiga.

¹⁴ Nih deaba samwagu gil aba giihiimsiinda ahiimsa geaw Yesu ginealangaaschi aba iing'ata duunooda duuna miyeeda.

Yesu ea Betaro

¹⁵ Iing'ata nea nijaat ghuusiga ghoanyaash Yesu Simon Betaro nea gwayeesha, “Simon, orjeeda Yohana, gibwariinyaan ea laabwana hoowa orjusu?” Gwayeesha niny, “Ea, Ng'utamiida; ginali gideaba aniini ghaabwariinyeey.” Gwayeesha, “Ahaaghwana gisilgeasu.”

¹⁶ Gabiikta gwayeesha niny deabiyeenya, “Simon, orjeeda Yohana, Gibwariinyaani?” Gwayeesha: Betaro niny, “Ea, Ng'utamiida; ginali gideaba ghaabwariinyeey”. Gwayeesha, “Ahaaghwana gisilgeasu.”

¹⁷ Gabiikta ghoanyaash deaba samwagu, “Simon, orjeeda Yohana, Gibwariinyaani?” Gagiisan Betaro aba gideaba geanyaash deaba samwagu gideaba Gibwariinyaani?” Gwayeesha niny, “Ea, Ng'utamiida; ang'iing'i ginali haleanjeeda sean, ang'iing'i ginali gideaba aniini ghaabwariinyeey.” Gwayeesha Yesu, “Ahaaghwana gisilgeasu.”

¹⁸ Aba huumwa, aba huumwa, geayeeshiineey, ghayi nea guduwoosa gheareemaneeda iissa giimuusi rada manandaang'u ak guwi heeda wassean igasayi; amadu nea nihuuwi gweargweeda, gajadoabiiwa geatingaagu, ak ghwaranyi siinuut ak ghwaanyi heeda ghwanyawa migassi una.”

¹⁹ (Aba inyas ghwanyaashtunuun goohiimsa Betaro gichea ghameawda ak ghoaghaambiit ASEETA). Ng'ata ng'asheesu gwayeesha, “Eani geeshteanyu.”

Yesu ea giinealaneeda nuut

²⁰ Iidu ghwayam geaw Betaro ak ghwadaah giinealaneedida bwariiy Yesuun, nea ghwaat geeshta, nea diita ghayi diiw geaw aba daghataanyiin gil shing'ada damanda agiischooda nea ghoanyaash gideaba, “Ng'utamiida siida jea ghwalaapnyi bwadaw ng'eaha?”

²¹ Daah Betaro niny gwayeesha Yesu, “Ng'utamiida ama baleanji?”

²² Gwayeesha Yesu niny, “Iyeagasayi goobiida badayda ng'eanyiida ea dabiigu gwasawanyi naaha? Ang'iing'i eani geeshteanyu!”

²³ Hean ghaghayda iitida aba jeedeaba orjoogiga gideaba giinealaneedida mayghami; nea Yesu niny ea mii gwayeesha, giinealaneeni mayghami geaghus gideaba gwayeesha, “Iyeagasayi goobiida badayda ng'eanyiida ea dabiigu, gwasawanyiini?”

²⁴ Giinealaneeni nih dea muuwu ng'asheesuun gil, ak ghang'oar; ak geanali gideaba muuwwuunoadaanyi huumwa gil.

Huuydeanda

²⁵ Gwanda ng'asheega saang'a sin Yesu; nea inyeeda ghwanyawa geang'waar sean, ghaaghanyi eara ng'eanyiida gwachi mayghoamu goodiiw gitaabwajeega jea eang'oar.