Yohaana 19 - Bibliyeeda Ghaydit

¹ Hit ghoadayda Bilato Yesu eabwara mughoowooda.

² Gageanu Shirikara ak gwasin shiipka halaghweenga, amahit ghwayiin uhuudaanyi, ak geeshuup hang'da oomu;

³ hean geeweay madeadaanyi ak geeyeesha, “Seayu, Sugoocheanda Yahudi!” Ng'ata geabwar aba baneaguuka.

⁴ Gabiikta Bilato jarooda ak gwayeesha saawa, “Adaaha gearuudu siisi jarooda aba gideaba aniini mwaadaahi giidiinyeandaanyi.”

⁵ Gwarita Yesu jarooda nea gwanda uhuuda shiipka halaghweenga nea gookwa hang'doom. Gwayeesha Bilato saawa, “Ang'ula siida!”

⁶ Daah ashoohoodiga hees sea furiischoodiga goojuur nea gwayi, “Angoora niny, Angoora niny!” Gwayeesha Bilato saawa, “Ageanda agooga nea goobea geat amang'ata goongoorji, aba gideaba aniini mwaadaahi giidiinyeandeaba siisi.”

⁷ Ghwasha fuga Yahudi nea gwayeesha, “Aseasa geandeawi deaweeda amadu aba deaweedeeni ea gideaba gammiisa miyeeda gil, aba gideaba niny gwahinda geaw Orjeeda ASEETA.”

⁸ Iiy Bilato ng'asheesu, hean ghabeal muuchi;

⁹ gabiikta jeeda gheeda sugoocheanduumeeda ak ghoanyaash Yesu nea gwayeesha, “Ang'iing'i gileabu yeenu?” Amwaasha Yesu ng'asheanji.

¹⁰ Hean gwayeesha Bilato niny, “Mayrukunean eara gili? Minali gideaba geandeawi uurda jea deatinaneey ea dea jea deangooraneey?”

¹¹ Ghwasha Yesu nea gwayeesha, “Gwachi miimuusi mideawana uurda aba badaydeanyu iimeegoonyi aba humng'eeda; amadu siidida iinan geatingaaguun gwandeawa riing'eeda haw muuchi.”

¹² Ghang'eada damandida gagasa Bilato gheata gichea gwasiksiinda niny, goojuur fuga Yahudi nea gwayeesha, “Iisiksi siisi ea muwoosi siida duupchi Gaysari, aba gideaba siida wassean gasa ghoah sugoocheanda gwanda washta Gaysari.”

¹³ Hean iiy Bilato ng'asheesu gooruuta Yesu jarooda amahit goopteada aba uhuuda hoorgeeda silacha girgweaguutka mida heesuguura Lagheaneeda bwarak, nea aba iita Ebraniya geeguura Gabata.

¹⁴ Abeeda damandida gaba aseeta lah nea eaweecheanji geetiing'diing'da aba Basaaka; gwayeesha fuga Yahudi, “Ang'ula sugoocheandeang'wa!”

¹⁵ Goojuur Saawa muuchi nea gwayeesha, “Ang'aamwana hiji, Ang'aamwana hiji, Angoora!” Gwayeesha Bilato saawa, “Gaydeangoor sugoocheandeang'wa?” Ghwasha ashoohoodiga hees nea gwayeesha, “Aseasa meendeawani sugoocheanda geaghus Gaysari.”

¹⁶ Ng'ata gageanu Bilato ak ghwayiin geatinga nyaawa ak geengoor.

Yesu geengoor

¹⁷ Geegeanu Yesu eeruuta jarooda nea ghwasar beehiidaanyi ea ghwahita heesuguura geapkeeda huda nea aba iita Ebraniya geeguura Golgota.

¹⁸ Geengoorsa uhuuda beehiida sea fih suuk iyeenya dea manda meatkweeda geatinda dugwa niirja gwanda meatkweeda geatinda ghaadaam, nea Yesu gwanda dageascheeda nyaawa.

¹⁹ Gang'oorsa Bilato uhuuda beehiida; ng'asheega siyi, “Yesuheeda Nasareti Sugoocheanda Yahudi.”

²⁰ Hean iissa ghoasoamwa fuga saang'a bea Yahudi ng'asheegiga sing'oorsa uhuuda beehiidean, aba gideaba hoowa singoorsa Yesuun ea neekeewa mujiini; nea geang'waara iita Ebraniya ea iita Latini ea iita Yunani.

²¹ Ng'ata gwayeesha ashoohoodiga hees Bilato, “Ading'waari ‘Sugoocheanda Yahudi,’ Ng'oara gideaba, ‘Siisi gwayi, Aniini geawooschi Sugoocheanda Yahudi.’”

²² Ghwasha Bilato nea gwayeesha, “Gidaang'waarji ning'ata ng'oorda.”

²³ Iing'ata giingoorda Yesu gageanu Shirikara hang'weakaaschi ak geesin gharmucheew ang'wan, ak gaba siisi siitaw gharmucheandaanyi; ghabwada gageanda eara hang'da geaw gul ng'eanyi. Nea abeeda hang'dida geanap nea agi ghang'eada uhuuda ea gagul ng'eanyi;

²⁴ hean gabaloola saawa gideaba, “Adoabwaashchi ghang'wana geeng'alealeesi ak geadaayi siichea gageanda.” Ng'asheanji geesin ak gwasa gida ghayi nyaah Ng'ooruutka bea gideaba, “Ghoadabwaarda hang'weakeasu aba jeenyaawa, Ak gang'alealeesa hang'deanyu.”

²⁵ Hean gwasindunu shirikara. Abeeda murdeeda beehiida Yesu ghamiinaada ghaamwat ea huda ghamaghaamwat, ea Mariyayda was gatmooda Gleopa, ea Mariya Magdalena.

²⁶ Daah Yesu nea ghamiinaada ghaamwat nea gwanda murdeeda giinealaneedida bwariiyiin, gwayeesha Yesu ghaamwat, “Iya, ng'ula orjeedang'u!”

²⁷ Hit gwayeesha giinealaneedida, “Ng'ula geamadu!” Ghang'eada damandida ghwaat giinealaneedida gwandeawa aba gheanyi.

Miyeeda Yesu

²⁸ Iing'ata nea ninal Yesu gideaba niisha ng'asheega sean, gwayi, (iijeagwasa ng'ooruutka), “Ghwaagan muwoash.”

²⁹ Nea abeeda gwanda hoowa gweeriida nyiit beega ng'weani bea haghweega geeta. Hean geegeanu gidawas gheabuuscheanda ak geapuuta jeeda beega ng'weani ak geahaaktaawa diigheecheanda ak geayiin ghuutaanyi.

³⁰ Ng'ata nea ninukghuta Yesu beegiga ng'weaniin gwayi, “Niisha”; ak ghwahiing'u uhuuda ak ghoabita guroorooda.

Yesu geang'ut gisheajeega

³¹ Abeeda eaweeda giidiing'diing'deayda, ea mamiisiina gideaba gaygoobiida muscheeka iheenga beehajeega eaweeda Sabaato (aba gideaba eaweeda Sabaato eaweeda haw gil), gaweay gamus fuga Yahudi Bilato eehirjeaweada geeshanga ak geegeanda.

³² Gaweay Shirikara ak gwahirja geeshanga siida madeeda, ea geaba siidida bea iyeenya; ghwanyawa siingooruudayi sea ninyiin;

³³ iidu nea ghwahita heeda Yesu ghwadaah gideaba nigeawiit ghami, ak ea mudu gwahirjeaweada geeshangaaschi.

³⁴ Hean gageanu Siyagi ak ghang'ut gisheajeega Yesu aba ng'uta, deagheata gwardu foojeanda ea beega.

³⁵ Nea siidida dea ng'asheesuun gamuuwu aba gideaba ng'asheega rugu gaba huumwa. Nea ghwanal gideaba gwaruku huumeanda ak abeeda ghoamwaschi.

³⁶ Ng'asheesu geesin gwasa ng'ooruutka, “Manda eara geapkeadaanyi jea eehirja.

³⁷ Gabiikta gwayi ng'ooruutka suuk, “Gaygang'ula fugiga heeta ng'udiin.”

Bunyita Yesu

³⁸ Iing'ata ng'asheesu gawa Yosefuheeda ng'eanyiida Arimataya was giinealaneeda Yesu aba makcheameeda, aba gheawalmeeda fuga Yahudi, gamus Bilato musta Yesu ghwaat, ak ghoadaw Bilato gheata. Hean ghwaan ak gageanda mustaanyi.

³⁹ Deagheata ghwahidu Nikodemeeda ghayi weah headaanyi eawa, ghwaan nea gweadu gharmucheanda siikuuyi weapkeanda ea hideeda ng'andit nea ghwanyiit deebajeanda ea dea agweena iyeenya.

⁴⁰ Geegeanda musta Yesu ak geekwealsa hang'weaka bumbuni sea haleanjeedida ng'andidiin aba seareedida bea fuga Yahudi bea eaweeda bunyiischoodean.

⁴¹ Hoowa singoorsean abeeda gwanda madamnyeanji mwanang' nea jeedeaba madamnyeanji gwanda bung'eeni ris eaghurghur miyeebung'sa siida jeeda.

⁴² Iidu aba ng'asheega Yahudi bea eaweeda giidiing'diing'deayda, ea gideaba eaneeki bung'eeda muuchi geeyiin Yesu jeedida.