Yohaana 16 - Bibliyeeda Ghaydit

¹ “Ng'asheesu nearukuneegwa sean ak ea adoapeadi.

² Gaygooheeleeweegwa buuneeda ghoorajeega siinealshacheewa; aba huumwa, aba gideaba ghwaan damanda ama siida nuuseegwa jea ghaghay gili bwat ASEETA.

³ Gaygwasimaneegwa ng'asheesu aba gideaba mwanala Bwaabwa ak ea mwanalan eara aniini.

⁴ Asi nearukuneegwa ng'asheesu aba gideaba iihidu damandida abeeda ghoapkaachi gideaba nearukuneegwa. “Ng'asheesu ghayi meabay darukuneegwa aba mwadi aba gideaba geendeayi.

Gadiyeeda Guroorooda Ghaydit

⁵ Ak ghamneawa geawi heeda dea ajeaknean; ak ghanyea manda eara siyagi aba jeedeang'wa anyaashan nea gwayi, ‘Gigali yeenu?’

⁶ Ghamneawa ea nearukuneegwa ng'asheesu ak ea ning'ut jeesingeagwa giiseaneega.

⁷ Ak ghamneawa gearukuneegwa huumeanda, ak gajanyagaada iyeawi, aba gideaba iimeawani ea mayghwahidu Weedaneeda heedeang'wa; ama eawi, gaydanung' ghwaan heedeang'wa.

⁸ Nea abeeda iihidu gaygoodeajiisa ng'eanyiida ng'asheega riing'eeda, ea doobiiwnata ea girgweaksiinda;

⁹ aba ng'asheega riing'eeda, aba gideaba mamwasaan;

¹⁰ aba ng'asheega doobiiwnata, aba gideaba geawi heeda Ghweanda, abeeda ea maygudabiikta adaahaan;

¹¹ aba ng'asheega girgweaksiinda, aba gideaba siida ambaliischi bea ng'eanyiida sirgweaksa.

¹² “Ea gutandeawa ng'asheega saang'a jea darukuneegwa, ak ghamneawa ea majoamuusa ghamneawa oang'waanya.

¹³ Amahidu Guroorooda huumeanda gayghoadoabiiweagwa ea ghoahiitaneegwa jeeda huumeanda sean, aba gideaba maygabaloola gheambalmeadaanyi, niny gaygwarukuneegwa ng'asheega iiy ak gay gwarukuneegwa ng'asheega jea ghwahidu.

¹⁴ Niny gayghoaghaambiidan, aba gideaba gaygageana heedeanyu ak gwarukuneegwa.

¹⁵ Haleanjeeda sean mideawa Bwaabwa geasu gil; ak ghoah gidearukuni gideaba gaygageana heedeanyu ak gwarukuneegwa.

Giiseaneega ea hooseaneega

¹⁶ “Gudughwashoada ghaadi nuwaas ak ea maygudu adaahaan, gicha gudughwashoada gheadi nuwaas, ak gajabiikta adaahaan.”

¹⁷ Ak goonyeari geat ginealangaaschi mwaatkwa nea gwayi, “Ak gwarukunaneasa naaha gideaba, ‘Gudughwashoada ghaadi nuwaas ak ea maygudu adaahaan, ak gabiikta gwayi gicha, gudughwashoada gheadi nuwaas ak gajadaahaan’; ‘aba gideaba geawi heeda Bwaabwa’?”

¹⁸ Gaba nih eesha niirja, “Ak gideabeedeaba ng'asheanji ayi, ‘Gudughwashoada gheadi nuwaasiin gidaabwa’? Aseasa meanali eara girugu.”

¹⁹ Gwajeeng'u Yesu gideaba geegasa eanyaash niny; ng'ata gwayeesha saawa, “Goonyearayi geat ng'asheega gwachi eargu bea gideaba, ‘Gudughwashoada ghaadi nuwaas ak ea maygudadaahaan, ak ghwashoada gheadi nuwaas ak gajadaahaani’?

²⁰ Aba huumwa, aba huumwa, geayeeshiineegwa, agooga gajooyeawda nea googutu heareega ak gaygang'weela ng'eanyiida, gajoogiisana amadu gayghwayamwa giiseaneegeagwa ak ghoah hooseaneega.

²¹ Gatmooda iissa iihidu damanda jeata gagiisan aba gideaba nihidu damandaanyi, amadu nea niji baleanda, ea maygudughoapkaat sawanadeeda gwachi aba hooseaneega gideaba siji baleanda aba jeeda ng'eanyiida.

²² Ghamneawa goondeawi giiseaneega ak gaydabiikta dadaheagwa ak abeeda gaygahoosan gurooruunatkeagwa, nea hooseaneegeagwa ea manda siida jea gageandeawa heedeang'wa.

²³ Eaweedida manda ng'asheanda jea oanyaashaan. Aba huumwa, aba huumwa, geayeeshiineegwa, gida wassean oomuschi Bwaabwa gaygagoneegwa aba gheawungeasu.

²⁴ Eara ghamneawa miyoomusa ng'ashaan aba gheawungeasu; amusa, ak gajanyasa ak abeeda ghwahit hooseaneegeagwa.

Naajoarji ng'eanyiida

²⁵ “Ng'asheesu gearukuneegwa nea ghaawaghaanyi; ak ghwaan damanda jea ea maygudu dargu ng'asheega nea ghaawaghaanyi, gaydargu iita Bwaabwa nea ghaabwadakti.

²⁶ Eaweedida gajamuusa aba gheawungeasu; ak ea maydayeeshiineegwa gaydamwaash Bwaabwa aba badahuukeagwa;

²⁷ aba gideaba Bwaabwa niny ghabwariinyeegwa agooga aba gideaba agooga noabwariinyaan aniini nea noamwaschaan gideaba gealeabu heeda Bwaabwa.

²⁸ Aniini gealeabu heeda Bwaabwa, ak ghaawunyi jeeda ng'eanyiida; gicha, ak ghamneawa ghaabeawi ng'eanyiida ak geawi heeda Bwaabwa.”

²⁹ Gwayi giinealangaaschi, “Asi ghamneawa nirugu ng'asheega nea gibwadakti!

³⁰ Asi ghamneawa aseasa sinali gideaba ang'iing'i ginali haleanjeeda sean, ak ghanyea mudugwanda siida jea ghoanyaashnyi gil, asi ghamneawa simwaschi gideaba ang'iing'i gileabu heeda ASEETA.”

³¹ Ghwasha Yesu nea gwayeesha, “Heapi ghoamwaschi ghamneawa?

³² Ghwaan damanda, aba huumwa ea nihidu, dea jea adarda oogasean ak gaba siisi weah gheanyi, ak gajanung'usean heeda nea gabwageaw; nea ghana aniini ea meabea geaw, aba gideaba geendeayi sea Bwaabwa.

³³ Ng'asheesu gearukuneegwa nea geagasayi abeaha hoyyoo aba jeedeanyu. Aba jeeda ng'eanyiida gajanyasa sawanadeeda; asi oahang'waanya jeesingeagwa, aba gideaba aniini naajoarji ng'eanyiida.”