Yohaana 15 - Bibliyeeda Ghaydit

Yesu sabiibooda huumwa

¹ “Aniini geawooschi sabiibooda huumwa, nea Bwaabwa ea siida bea madamnyeanda.

² Gilinyoo ea damealeanda gil mida jeedeanyu iimaji haghweega, iissa ghwalach, nea gilinyoo ea damealeanda jihi iissa gwasisin, ak abeeda gwaji muuchi.

³ Agooga siimiineegwa aba ng'asheanda earukuneegwa.

⁴ Oopiidana jeedeanyu, nea geabiidi jeesingeagwa. Gawuurji gidamoamuusta damealeanda gwaji haghweega nea gaba geaw, nea mwanoasa sabiibu, gwasunu eara agooga, moamuusi ajiila haghweega iimoopiidani jeedeanyu.

⁵ Aniini geawooschi sabiibu, goowooschi agooga damealga. Siida abiida jeedeanyu, nea geabiidi aniini jeadaanyi, siisi gaygwaji haghweega saang'a, aba gideaba iimeandani aniini ea moamuusi asina eara gil.

⁶ Siida wassean meabiidana jeedeanyu, gajealach ak ghaghajaamiit; iissa gageanu damealga ak ghoamughuush, ak gwajaksa jeeda beasta ak goosha.

⁷ Iyoopiidi jeedeanyu, nea goobiida ng'asheegeasu jeesingeagwa, abeeda amusa gida wassean oogasayi ak gajeesineegwa.

⁸ Aba nih geakghambiit Bwaabwa, iissa iyoojiili haghweega saang'a, nea ghoahuuyi giinealangeasu.

⁹ Aba gidabwariiydanaan Bwaabwa, eara aniini ghabwariiyduneegwa; asi oopiidana jeeda bariinyeegeasu.

¹⁰ Iyoang'waanyi diigheanyeekeasu, gajoopiidana jeeda bariinyeegeasu, ak gawuurji gida aang'oaydi digheanyeeka Bwaabwa nea geabiidi jeeda bariinyeagaaschi.

¹¹ Asi nearukuneegwa ng'asheesu ak abeeda goobiida hooseaneegeasu jeesingeagwa, ak abeeda ghwahit hooseaneegeagwa.

¹² “Nih digheandeanyu gil, ak goobariinyiidi geat gidabwariiydaneegwa aniini.

¹³ Manda siida mideawa bariinyeega huumwa ea ghwalaabwa hoowa nih, bea gideaba ghoaghaashta siida eaweagaaschi aba badahuuka fuga duupchiin gil.

¹⁴ Agooga goowooschi fuga eaduupcheewi iyoosinyi ng'asheega earukuneegwa.

¹⁵ Maygudu gabiikta daguureewaneegwa soomjooga aba gideaba soomjeanda iissa ea mwanala gissin siidaanyi haw, ak ghamneawa aniini ea neaguureewaneegwa fuga eaduupcheewi aba gideaba nearukuneegwa ng'asheega sean eayiing'si heeda Bwaabwa.

¹⁶ Aniini moaloadaan agooga, ghaaloacheagwa aniini ak ghaanung' aweayeena ak goojiili haghweega jea ghwashng'u; ak abeeda gagooneegwa Bwaabwa gida wassean iyoomuschi aba gheawungeasu.

¹⁷ Asi geagonyeegwa diigheanji, abwariinya geat.

Sicheeda ng'eanyiida

¹⁸ “Agooga iisideagwa ng'eanyiida, ghoapkaachi gideaba ghayi nibay ghwastan heeda mii ghwastaneagwa agooga.

¹⁹ Inyeeda ghwanyawa goobeayi ng'eanyiida, gwachi gayghabwariiy ng'eanyiida fugaaschi; asi aba gideaba moabeahi ng'eanyiida, geaghus gideaba ghaaloacheagwa aba jeeda ng'eanyiida, aba sareani ghwasteagwa ng'eanyiida.

²⁰ Oapkaada ng'asheanda ghayi earukuneegwa, bea gideaba, ‘Soomjeanda miihaweewa siida haw.’ Iinukwa nisawanan aniini, eara agooga gaygwasawaneegwa; inyeeda gwachi ghoang'waay ng'asheandeanyu, gayghoang'waay eara ng'asheegeagwa.

²¹ Amadu gaygwasineegwa ng'asheesu seaniin aba badaydeanyu, aba gideaba saawa mwanala dea ajeaknean.

²² Inyeeda ea mwaawuni ak gearukusi saawa ghwanyawa ea maygwandeawa riing'eeda; ak ghamneawa ea manda gichea ghwashaang'da aba riing'eeda nyaawa.

²³ Siida sidan aniini abeeda ghwasit eara Bwaabwa.

²⁴ Inyeeda ea measisiini gadiyeeda dageascheeda nyaawa gadiyoojiga manda siida nisin, gwachi ea maygwandeawa riing'eeda; ak ghamneawa ea nidaah ak ghwastan aniini ea Bwaabwa.

²⁵ Ak gwasa gidasung'oar aba jeeda deaweeda gideaba, ‘Ghwastan mwadaagha.’

²⁶ Eaweeda hina Weedaneeda jea deajeagu ghwaan heedeang'wa nea gwaleabu heeda Bwaabwa, nea Guroorooda huumeanda, jea gwaleabu heeda Ghweanda, gaygamuuwunean;

²⁷ eara Agooga goowooschi muushoodiga, aba gideaba geendeayi ghang'eada mwadi.