Yohaana 14 - Bibliyeeda Ghaydit

Yesu naweeda weah heeda Bwaabwa

¹ “Adiidu gwahirbaban jeesingeagwa, amwasa ASEETA, ak ghoamwaschaan eara aniini.

² Gheeda Bwaabeedeanyu gwanda giibinda haw, gwachi inyeeda ea masnu gajea neabay darukuneegwa asi ghamneawa geawi dasinneegwa hoorgeedeang'wa jea oopiidana.

³ Nea iyeawi ak geasinneegwa hoorgeedeang'wa, gaydabiigu gicha ak ghaayaacheegwa heedeandi, abeeda heedeandi aniini eara agooga gajandana.

⁴ Ak ghoanali naweeda gal heeda eagali.”

⁵ Ghoanyaash Domaso niny, “Ng'utamiida, aseasa meanali heeda iigali; abeeda gajeanaldaan naweeda?”

⁶ Gwayeesha Yesu niny, “Aniini geawooschi naweeda, ea huumeanda, ea eaweega; siida moamu gawa heeda Bwaabwa, geaghus gwasku heedeanyu.

⁷ Inyeeda ghwanyawa ghoanalaan, gajanala eara Bwaabwa, ghang'eada ghamneawa ghoanali ak ea noadaayi niny.”

⁸ Gwayeesha Filipo niny, “Ng'utamiida, ahiimneasa Bwaabwa ghoahiideasa.”

⁹ Gwayeesha Yesu niny, “Geendeaydooschi sea agooga ea gooyang'u ak ea minalaani Filipo? Siida nidaahan aniini nidaah Bwaabwa; abeeda giimuustiin gideaba giyeeni, ‘Ahiimneasa Bwaabwa’?

¹⁰ Mumwasi gideaba aniini geandi jeeda Bwaabwa nea Bwaabwa gwanda jeedeanyu? Ng'asheega earukuneegwean mearukunani gheambalmeedeanyu aniini, gwasin Bwaabeeda mida jeedeanyu gadiyoojigaaschi.

¹¹ Amwasa gideaba aniini geandi jeeda Bwaabwa, nea gwanda Bwaabwa jeedeanyu; ghoamwaschaan aba gadiyoojiga easinyi.

¹² “Aba huumwa, aba huumwa, geayeeshiineegwa, siida mwasan gaygwasin gadiyoojusu easinyi aniiniin; asi gaygwasin eara gadiyoojiga hees muuchi, aba gideaba aniini geawi heeda Bwaabwa.

¹³ Nea gida wassean oomuschi aba gheawungeasu gaydasin, ak abeeda geakghambiit Bwaabwa aba badayda Orjeeda;

¹⁴ iyoomuschi gida wassean aba gheawungeasu gaydasineegwa.

Heeleesiinda Guroorooda Ghaydit

¹⁵ “Iyoabwariinyaan gajoang'waanya diigheanyeekeasu.

¹⁶ Ak gaydamwaash Bwaabwa ak gaygagoneegwa Weedaneeda nuut, jea andeayeewana damanda manda muudeanooda,

¹⁷ niny Gurooroodida bea huumwaan nea fuga ng'eanyiida ea moamu ghwadeapta aba gideaba moamu ghwadaah ghana ghwanal; agooga ghoanali niny aba gideaba gajandeawana nea gwanda jeedeang'wa.

¹⁸ “Maydanung'useegwa heeda bananga; gaydahidu heedeang'wa.

¹⁹ Sinung' gilimwanang' ak ea maygudu ghwadaahan ng'eanyiida, duuku agooga gajadaahaan; aba gideaba aniini geawooschi majeek, abeeda eara agooga gajawoosa majeekcheewi.

²⁰ Eaweedida gajanala gideaba aniini geandi jeeda Bwaabwa, nea goondi agooga jeedeanyu, nea geandi aniini jeedeang'wa.

²¹ Siida mideawa diigheanyeekeasu nea ghoang'waay, nih dea bwariinyan gil, nea dea bwariinyan gayghabwariiy Bwaabwa, gaydabwariiy ak gaydeahiimsa geaw niny.”

²² Hean gwayeesha Yudayda (mawoosa dea Iskariyote,) “Ng'utamiida, gayghoawataan gideaba gajahiimneasa geaw nea miihiimsiini geaw ng'eanyiida?”

²³ Ghwasha Yesu nea gwayeesha, “Siida iibwariinyan gayghoang'waay ng'asheandeanyu, nea abeeda Bwaabwa gayghabwariiy siisi, ak gajeapkaana aseasa headaanyi ak geepiidi headaanyi.

²⁴ Siida mabwariinyan mayghoang'waay ng'asheegeasu; nea ng'asheanda oayiinyi ea mii deanyu gil gaba Bwaabeeda ajeaknean.

²⁵ “Ng'asheesu gearukuneegwa, nea abeeda ea gudeendeayeena.

²⁶ Nea Weedaneeni, was Guroorooda Ghaydit jea goojeagu Bwaabwa aba gheawungeasuun, gayghoanaaleagwa haleanjeeda sean, nea goopkeaneegwa ng'asheega sean earukuneegwa.

²⁷ Gaydanung'uneegwa hoyyoo, geagonyeegwa hoyyooydeanyu; maydagoondaneegwa gidagooniida ng'eanyiida. Asi adagwasawana gurooruunatkeagwa, nea adaghang'udeagwa muuwda.

²⁸ Ghayi noayiinyi nea geayeeshiineegwa, ‘Neawi heechea dawa, ama muchu gaydabiigu gicha heedeang'wa.’ Inyeeda ghoabwariinyaan, gwachi gajahoosana aba gideaba geawi heeda Bwaabwa; aba gideaba niny ea haweewaneani.

²⁹ Ng'asheesu geabay darukuneegwa ghamneawa heeda mii ghwahina, ama eaweeda hina abeeda ghoamwaschi.

³⁰ Mayguteabaloolaneegwa gicha ng'asheega saang'a aba gideaba siida ahaaghwa ng'eanyiini gayghoan. Aba heedeanyu niny moamu gil;

³¹ ak geasindi gidagoondanean Bwaabwa, ak abeeda ghwanal ng'eanyiida gideaba ghaabwariinyi Bwaabwa. Ang'eada eeweaya heechea eeweaya.