Yohaana 13 - Bibliyeeda Ghaydit

Yesu goohuun geeshanga ginealangaaschi

¹ Hean nea mii ghwahidu ghweelmeeda Basaaka nea ninal Yesu gideaba damandaanyi jea ghabeawa ng'eanyiida gawa heeda Bwaabwa nihidu, niny nea ghabwariiy fugaaschi mida jeeda ng'eanyiida, ea huumwa gil ghabwariiy ea ghwanaawda.

² Damanda agiischooda bea shing'ada, nea abeeda ea niyiin meang'nyeandeenda jeeda Yudayda Iskariyote, was orjeeda Simon gichea ghwalaapta bwadaw niny,

³ abeeda Yesu ghwanal gideaba niyiin Bwaabwa geatingaaschi haleanjeeda sean, ea gideaba niny gwaleabu heeda ASEETA ak gaygabiikta heeda ASEETA,

⁴ hean ghang'eat aba heeda agiischeewa, ak ghaghatghat hang'weakaaschi ak gageanu hang'da mwanang' ak gwaradiischeewa.

⁵ Ng'ata gageanu harakta ak ghwayiin beega, ak goohuun geeshanga giinealanga, ak goobuus aba hang'dida mwanang' radiischeewean.

⁶ Iidu ghwahita heeda Simon Betaro; amahit gwayeesha Betaro niny, “Ng'utamiida gajahuuna geeshangeasu?”

⁷ Ghwasha Yesu nea gwayeesha, “Ang'iing'i minali gideasinyi ghamneawa ak gaynala iidu.”

⁸ Gwayeesha Betaro, “Ang'iing'i majahuuna geeshangeasu earahay.” Ghwasha Yesu nea gwayeesha niny, “Iimeahuuni geeshangaagu ea meeguuyeeni.”

⁹ Hean gwayeesha Simon Betaro, “Ng'utamiida, ada abeeda ea mii geeshangeasu gil ak ghwahit, eara geatingeasu ea uhuudeanyu!”

¹⁰ Gwayeesha Yesu niny, “Siida iiniihuushi ea manda gichea goohuun geaghus geeshangaaschi, aba gideaba niimmiidu saseesean; agooga goowooschi miyaas, ak ea mii oogaseani.”

¹¹ Abeeda niny ghwanal siida jea ghwala bwadaw; ak ghoah girukuna gideaba, “Agooga moowoosi miyaasiin oogasean.”

¹² Ng'ata nea niihiit giihuunda geeshanga, nea nibiikta gookwa hang'weakaaschi, gabiikta goobideada aba heeda gwachi, ak gwayeesha saawa, “Noanali ng'asheanji easineegwean?

¹³ Agooga googuureewanean Giinealshoocheanda ea Ng'utamiida; ak ghwadoabiiw, aba gideaba geawooschi.

¹⁴ Asi aniini iyeawooschi Giinealshoocheanda ea Ng'utamiida ak gajoohuuna geeshangeagwa, asi gamiiseegwa eara agooga gideaba oohuuna geeshangeaba geat.

¹⁵ Asi neagoonyeegwa gichea agalana iissa abeeda eara agooga goosindi gidaghamneawa easindi aba heedeang'wa.

¹⁶ Aba huumwa, aba huumwa, geayeeshiineegwa, soomjeanda mii haweewa siidaanyi haw, ghana siida siicheakta mii haweewa siida ajeakta.

¹⁷ Asi iyoanali ng'asheesu abeeda ghang'wana iyoosinyi.

¹⁸ Meabaloolani badahuukeagwa oogasean; aniini ghaanali gea aaloachi; ak abeeda gwasa ng'ooruutka, ‘Siida ak mukaateeydeanyu niyam geaw ak ghwalaabwan bwadaw.’

¹⁹ Nearukuneegwa ng'asheesu ghamneawa nea mii gwasa, ama eaweeda seameewa abeeda ghoanali gideaba aniini niny.

²⁰ Aba huumwa, aba huumwa, geayeeshiineegwa, Siida deapta dea eajeagu abeeda ghwadeaptanaan aniini, nea siida deaptanaan aniini abeeda ghwadeapta dea ajeaknean.”

Yesu ghwaramoar gichea ealaapta bwadaw

²¹ Ahiit Yesu rukunoodeaba ng'asheesu gwasawana gurooroadaanyi, ak gamuuwu nea gwayi, “Aba huumwa, aba huumwa, geayeeshiineegwa, siyagi aba jeedeang'wa gayghwalaabwan bwadaw.”

²² Hean goong'weersa geat giinealanga ak ea mwanala siida baloola.

²³ Nea giinealaneanagi bwariiy Yesu abeeda ea neekeewa daghata Yesu;

²⁴ gageanu Simon Betaro ak ghaghoash giinealaneedida nea gwayeesha, “Heapi anyaasha gabaloola badaydeabeang'a.”

²⁵ Hiji duu gwadiiwa geaw giinealaneedida aba daghata Yesuun, ghoanyaash nea gwayeesha, “Ng'utamiida siida ng'eaha?”

²⁶ Ghwasha Yesu ak gwayeesha, “Niny siidida jea dang'uta murmurjeanda ak ghaadawjiini.” Ghang'uta murmurjeanda, ak ghoadaw Yuda orjeeda Simon Iskariyote.

²⁷ Iing'ata ging'ooyda murmurjeanda ghoabita Shataani jeadaanyi. Gwayeesha Yesu niny, “Gidida igasayi sinoodean lamwaja sina.”

²⁸ Abeeda ghanyea manda eara siyagi aba jeedeaba fugiga agiischiin dea jeeng'u gidarukusiina niny ng'asheandida.

²⁹ Aba gideaba Yuda abeeda siida adiing'iida sandakwajeanda lapiya gil, hean ghaghay giinealanga mwaatkwa gili eesha Yesu, “Shaaha haleanjeeda sigasa eaweeda ghweelmeeda”; ghana gideaba gwayeesha adawa fuga barbari haleanjeeda.

³⁰ Iing'ata geandeayda murmurjeanda gwarita jarooda aba geeshangiga, nea damandida ea eawa gil.

Digheandeesh

³¹ Iidu nea ghang'eat gawa, gwayi Yesu, “Asi ghamneawa Orjeeda Siida siikghaambiit ak eara ASEETA ea siikghaambiit aba jeadaanyi.

³² Abeeda iisiikghaambiit ASEETA aba jeadaanyi, abeeda gayghoaghaambiit niny aba jeadaanyi, ak gaybay ghoaghaambiit.

³³ Diibiga manang'i, aniini gajeendeayeena gil nuwaas. Gajagassean; ak gaydarukuneegwa gidaghayi earukusi fuga Yahudi, ‘Heedeawi aniini majoamuusa apkaani.’

³⁴ Geagonyeegwa diigheanda eesh, abwariinya geat, ak ghoabwariiydi geat gida aabwariiydaneegwa.

³⁵ Ak abeeda gayghwanal buuneesean gideaba goowooschi giinealangeasu iyoobariinyayi geat agooga.”

Yesu ghwaramoar sheang'da Betaro

³⁶ Hean gwayeesha Simon Betaro niny, “Ng'utamiida, gigali yeenu?” Ghwasha Yesu nea gwayeesha, “Heedeawi majamuusa eani geeshteanyu ghamneawa; geaghus eani geeshteanyu iidu.”

³⁷ Gwayeesha Betaro niny, “Ng'utamiida, neada ghwasaan inyas maydaamu deadu geashtaang'u ghamneawa? Aniini gaydaghashta eaweegeasu aba badaydaang'u.”

³⁸ Hean ghwasha Yesu nea gwayeesha, “Gajaghaashta eaweagaagu aba badaydeanyu? Aba huumwa, aba huumwa, geayeeshiineey, damanda miigooguula nghaghooda gajea nishaang'nyaan niba samwagu.