Yohaana 12 - Bibliyeeda Ghaydit

Yesu geayeasha nagheeda aba Betaniya

¹ Iimuchu nea ghwashoada eawooji lah aba hiteayda ghweelmeeda Basaaka, ghwahita Yesu Betaniya heeda ghayi abiita Lasarooyda aduuna Yesu miyeedean.

² Hean geesissa hamiteaba shing'ada; hean gagadiiyeesa Marta nea Lasaro abeeda gaba jeeda fuga ambuuchi sea niny.

³ Ng'ata gageanu Mariya nagheeda ng'andit siguura nardo mida gideeshteayda siyiin buureata biissa gaba sheayeeda haw, ak ghwayeasha geeshanga Yesu ak goobuusa buudeagaaschi; gang'andiit gheesean aba shearooda nagheeda.

⁴ Gwayeesha Yudayda Iskariyote bea jeeda ginealangaaschi (was dea jea ghwalabwadaw niny),

⁵ “Ghwasaan anda ghwanyawa nagheani meeshaaydaawana dinaaraji bughalaji samwagu ak geelakiisa fuga barbari?”

⁶ Mwanyaashtunu aba beadi samsa fuga barbari, gweagu gideaba niny mareanghweanda, eawoojisu iissa goodiiwi sandakooda lapiya nea iissa eawoojisu gwajagwadi lapiyeeda mida jeeda.

⁷ Ghwasha Yesu ak gwayeesha, “Anung'waada gwandeawa, ghoamuughu eaweeda jea eepunyanean.

⁸ Aba gideaba fuga barbari gajandeawana galeagasean, duuku aniini ea majeendeayeena galeagasean.”

Geamwaal gichea eenuusta Lasaro

⁹ Nal eemeetuw bea Yahudi gideaba gwanda hoowa, ghapka nea mwaada gideaba gagasa ghwadaah Yesu, gagasa ghwadaah eara Lasarooyda heeta siituuna miyeeda.

¹⁰ Hean ghamwaal Ashoohoodiga hees gichea eenuusta eara Lasaro.

¹¹ Nea gweagu gideaba aba badaydaanyi gooheeli geat fuga saang'a bea Yahudi ak ghamwas Yesu.

Hooseaneega aba hiteayda Yerusalemu

¹² Muchu ghwayiiy eemeetuw buwa ghweelmeeda gideaba Yesu gwanda naweeda ghwaan Yerusalemu.

¹³ Hean gwahirjeawi damealga miilayga ak gaweay roonyeeda nea goojuur muuchi nea gwayi, “Hoosaana! Sing'usha siisi wuna gheawunga Ng'utamiidean, eara sugoocheanda Israeli!”

¹⁴ Ghwanyas Yesu gureenda ak gwading'da badayda gawuurji gissing'oarda.

¹⁵ “Adibeali hudeaba Sayuni; ang'wearda sugoocheandaang'u ghwaan, nea gwading'da gureenda digeeda!”

¹⁶ Abeeda ginealangaaschi ea mii gwajeeng'u ng'asheesu aba mwadi; iidu nea siikghaambiit Yesu, hean ghoapkaat gideaba ng'asheesu geang'waar aba badaydaanyi ea gideaba sisissa buuneeda ng'asheesu.

¹⁷ Hean gamuuwu eemeeda heeta mideayi sea niny eaweeda guursiina Lasaro gwarina jeeda bung'eeda ak gooduudu.

¹⁸ Iidu ghoah giteaptaawa eemeeda aba gideaba nisin gwadeagoani.

¹⁹ Ng'ata gaba Farisaayajeanji eesha niirja, “Moadaahi gideaba moamuusi asina gil; oang'wearda, ghwaat geeshta ng'eanyiida.”

Fuga mwaatkwa bea Yunani gaseadayi Yesu

²⁰ Nea aba jeeda fuga weay ghadooweeda eaweeda ghweelmeeda gwanda fuga mwaatkwa bea Yunani.

²¹ Gaweay Fiisu heeda Filipoheeda leabu Betsaydeeda Galilaya ak gwayeesha niny, “Siida mureeda, geegasayi eadaaha Yesu.”

²² Gawa Filipo ak gwarukusa Andreya; ak goodeayi Andreya sea Filipo ak gwarukusa Yesu.

²³ Ghwasha Yesu nea gwayeesha, “Nihita damanda jea eekghaambiida Orjeeda Siida.

²⁴ Aba huumwa, aba huumwa, geayeeshiineegwa, gheang'nyeanda ngaano iissa goobiida damwanagi ea eaghus goobissa jeesigeeda ak ghami. Iing'ata miyeeda gwaji haghweega saang'a.

²⁵ Siida bwariiy eaweagaaschi gaygwalaku, nea siida sit eaweagaaschi aba badaydeaba ng'eanyiini gayghoaghu ea gagul eaweega manda muudeanooda.

²⁶ Siida jea gwasinnean gadiyeeda geaghus gweadu geeshteanyu; ak abeeda heeda eandi aniini eara soomjeandeanyu gaygwanda eara niny; siida jea gwasinnean gadiyeeda abeeda gaygwasissa Bwaabwa mureeda.

Yesu gabaloola iita miyeadaanyi

²⁷ “Ghamneawa guroroodeanyu ning'ut muuwda. Ak gaydayiin? ‘Bwaabwa, lealnean aba damani’? Manda, aba badaydeaba ng'asheanji naahidu damani.

²⁸ Bwaabwa aghaambiida gheawungaagu.” Deagheata ghwanya ghuuta nyaasha humng'eeda nea gwayi, “Naaghaambiichi, ak gaydabiikta daaghaambiit.”

²⁹ Ghwayiiy eemeeda ghwanyawa miinaada aba hoowa ghuutida ak gwayi mwaatkwa, ghoaghweandan humng'eeda. Nea gwayi mwaatkwa, “Goobalool malaykajeanda.”

³⁰ Ghwasha Yesu nea gwayeesha, “Ghuudi oayiinyiin mwanya aba badaydeanyu aniini, ghwanya aba badahuukeagwa.

³¹ Damani nihita heeda jea eergweaksiina ng'eanyiini, nihita damanda jea eejakteawa siida ahaaghwa ng'eanyiini.

³² Nea aniini iisiitiing'danean humng'eeda daheeli ng'eanyiida, gaydaksu buuneesean ghapka heedeanyu.”

³³ Aba rukunoodeaba ng'asheanji ghoahiimu miyeeda jea ghami giduurji.

³⁴ Hean ghwasha eemeeda ak gwayeesha, “Aseasa gwarukuneasa deaweeda gideaba Gristo gayghwashng'u eaweega manda muudeanooda. Abeeda ghoamuustiin gideaba gajayeena Orjeeda siida gajeetiing'da humng'eeda? Orjeeni bea siidean ng'eaha?”

³⁵ Gwayeesha Yesu saawa, “Gudandeawana weeshinda gheadi nuwaas. Aneayeena hiji duu andeawana weeshindean ea majooreagwa misaneeda; siida neayeewa jeeda misaneeda mwanala eara heeda gal.

³⁶ Asi hiji duu andeawana weeshindean amwasa weeshinda, ak ghoahuuyi diibiga weeshinda.” Iing'ata rukunoodeaba ng'asheesu ghang'eat Yesu gooheeli geaw ak gawa ghafunya geaw saawa.

Fuga mandeawana masaweega

³⁷ Earapeadi nisin gwadeagwajeega saang'a aba madeanyaawaan, saawa ghanyea meamwasa niny;

³⁸ ak gwasa ng'asheega rugu sibaneeda siguura Isaya nea gwayi, “Ng'utamiida siida mwas ng'asheagaasa ng'eaha? Ak ea siihiimsa ng'eaha geatinda Ng'utamiida?”

³⁹ Aba sareani ea mudughoamu ghamwas. Aba gideaba Isaya gabiikta gicha gwayi;

⁴⁰ “Ninung' gang'oowiidi gheanyanga nyaawa, nea gahang'oonyiidi jeesinga nyaawa, adaghwadaah aba gheanyanga nyaawa, nea gwajeeng'u aba jeesinga nyaawa, ak gwayamu geat ak ghaahaapchi.”

⁴¹ Isaya gwarugu ng'asheesu aba gideaba nidaah giigheambiitaanyi, ak ghoah girukuna iitaanyi.

⁴² Gwanda fuga saang'a eara aba jeeda gea ambaliischi mwas niny, iidu aba gheawalmeeda Farisaayajeega ea marukunana ghuusiga nyaawa aba gideaba gajiidu geeruuteawa jeeda ghooriida siinealshacheewa.

⁴³ Aba gideaba ghabwariiy duumsheesiinda buuneeda mwasamwa gideaba gaygwaduumsheesa ASEETA.

Ng'asheega Yesu goorgweaksa buuneeda

⁴⁴ Ng'ata gabalool Yesu aba ghuuta haw nea gwayi, “Siida mwasan aniini mamwasaan nea gabwageaw, ghamwas dea ajeaknean.

⁴⁵ Siida nidaahan aniini abeeda nidaah dea ajeaknean.

⁴⁶ Aniini ghaawunyi nea geawooschi weeshinda ng'eanyiida, ak abeeda siida mwasan ea meabiidana jeeda misaneeda.

⁴⁷ Siida iiy ng'asheegeasu ak ea moang'waanya, aniini maydeargweaksa; aba gideaba mwaawuni deargweaksa ng'eanyiida ghaawunyi dalealu ng'eanyiida.

⁴⁸ Siida jaktanean nea moang'waanya ng'asheegeasu gwandeawa dea jea goorgweaksa; ng'asheandida earguun dea jea goorgweaksa gil eaweeda huuydean.

⁴⁹ Aniini meabalooli aba gheambalmeedeanyu; aniini geaghus gearugu Bwaabeeda ajeaknean dea goonan diigheanda gil ea gichea dabaloola.

⁵⁰ Ak ghaanali gideaba diigheandaanyi eaweega manda muudeanooda. Asi aniini gearugu ng'asheega eeshean Bwaabwa rukuta.”