Yohaana 11 - Bibliyeeda Ghaydit

Miyeeda Lasaro

¹ Ghayi gwanda siisi miyaan siguura Lasaro bea ng'eanyiida Betaniya, nea gharang'da geaba Mariya gil ea huda ghaamwat siguura Marta.

² Mariyaheani diita ghayi easha Ng'utamiida nagheeda ng'andit ama ng'ata goobuus geeshanga aba buudeagaaschiin gil, nea abeeda ghamnyaan orjeeda ghaamwat siguura Lasaro.

³ Hean goojeaksa Haweega ghaamwat nea geeyeesha, “Ng'utamiida, siida ibwariinyi ghamnyaan.”

⁴ Iiy Yesu ng'asheanji gwayeesha, “Geeyooni maygweadu miyeeda, gaba giigheambiita ASEETA, miyeanji geebaysiina gideaba abeeda gajeakghaambiit Orjeeda ASEETA.”

⁵ Yesu abeeda ghabwariiy Marta ea huda ghaamwat ea Lasaro.

⁶ Iidu nea ghwanyas Yesu iita gideaba ghamnyaan, goopteada aba hoowa ea ghang'ata eawooji iyeenya.

⁷ Iimuchu nea ghang'ata ng'asheesu gwayeesha ginealangaaschi, “Eaniyean eebiikta eeweaya Yudeya.”

⁸ Hean ghoanyaash giinealanga nea geeyeesha, “Rabi, miigageawiit damanda gasseewa fuga Yahudi gaftaneey lagheanga ak ghamneawa gigasayi biikta gicha hoowa?”

⁹ Ghwasha Yesu nea gwayeesha, “Heapi roobuutka aseeta aba jeeda askwearda mii damaniyeenya? Asi siida iiweelweel askweari ea moamu ghwalas geeshta gil aba gideaba ghwadaah weeshinda ng'eanyiida.

¹⁰ Duuku siida iiweelweel eawa ghoamu ghwalas geeshta gil aba gideaba manda jeadaanyi weeshinda.”

¹¹ Iidu nea ghoahiit Yesu rukunoodeaba ng'asheesu gwayeesha saawa, “Siida siduupcheewi was Lasaro nilil, ak gaydawa daheat.”

¹² Ghwalamda giinealanga ak gwayeesha, “Ng'utamiida iibeachi ruweanga, gayghahaap.”

¹³ Nea Yesu gabaloola iita miyeadaanyi, ak ghaghay saawa gili baloola iita ruweanga.

¹⁴ Hean gwarukusa Yesu nea ghoadaajiit, “Lasaro nimi;

¹⁵ ak ghamneawa geahoosanyi aba badahuukeagwa ak ea nighaas heeta ea meandani hoowa ak abeeda ghoamwaschi. Asi eeweaya headaanyi.”

¹⁶ Gwayeesha Domasoyda siguura Saleaygweanda giinealanga suurja, “Apkaani eeweaya ak geemeewuudayeewi niny.”

Yesu duunooda gil ea eaweega

¹⁷ Eaweeda hitaawa Yesu hoowa abeeda Lasaro niibiida jeesigeeda eawooji ang'wan.

¹⁸ Abeeda Betaniya ea neekeewa Yerusalemu maygwaduulu aseadeanagi hiteayda.

¹⁹ Nea abeeda ea nupka fuga saang'a bea Yahudi heeda Marta ea Mariya eegeandeawa salgheang'da aba miyeeda orjeeda ghaamwat.

²⁰ Hean iiy Marta gideaba ghwaan Yesu gawa roonyeeda nea Mariya geanung'wa ghoah.

²¹ Gwayeesha Marta Yesu, “Ng'utamiida inyeeda heeta gindi hiji ghwanyawa orjeeda giyeanya gajea miighami.

²² Eara ghamneawa ghaanali gideaba iimusi ASEETA gida wassean gaygagoonyi.”

²³ Gwayeesha Yesu niny, “Orjeeda geamadu gaygwaduudu gicha.”

²⁴ Gwayeesha Marta niny, “Ghaanali gideaba gaygwaduudu gicha eaweeda jea gwaduutuuna buuneeda eaweeda huuydean.”

²⁵ Ghwalamda Yesu ak gwayeesha niny, “Aniini geawooschi duunooda ea eaweega; siida iimwasan eara ghami gajea majeek,

²⁶ nea siida majeek ak ghamwasan ea mayghami earahay. Ghamneawa gumwasi ng'asheanji?”

²⁷ Gwayeesha niny, “Huumwa gil Ng'utamiida; aniini ghaamwaashchi gideaba ang'iing'i guwoosi Gristo, Orjeeda ASEETA, jea ghwahidu jeeda ng'eanyiida.”

Yesu gooyeawda

²⁸ Iing'ata rukunoodeaba ng'asheanji, gawa ak gaguursa huda ghaamwat siguura Mariya, ak gameang'sheesa nea gwayeesha, “Nukwa Giinealshoocheanda gwanda hiji nea gaguuru.”

²⁹ Iiy ng'asheanji gootkweal ak gawa headaanyi.

³⁰ Abeeda Yesu mii ghwahidu gharang'dida, gudugwanda heeda ghwanyawa deepteaysa Marta.

³¹ Hean dea fuga Yahudi ghwanyawa mideayi aba jeeda gheeda nea gageanda salgheang'da, gidang'eata ak gidalamwajaadayda Mariya nea gwarita jarooda, ghwaat geeshta, nea ghaghay gili weah heeda bung'eeda gooyeawda.

³² Hita Mariya heeda mida Yesu ghwadaah ak gwatkuy aba madeadaanyi ak gwayeesha, “Ng'utamiida, heeta inyeeda gindi hiji orjeediyya gajea mii ghami.”

³³ Daah Yesu gidayeawudeayda nea eara fuga Yahudi ghwanyawa adeana earaga gooyeawda ghang'ut giiseaneega nea gwasawana gurooroadaanyi;

³⁴ ng'ata gwayeesha, “Ghoayiinyi yeenu siida?” Geeyeesha niny, “Ng'utamiida beeni daaha.”

³⁵ Gooyeawda Yesu.

³⁶ Hean gwayi fuga Yahudi, “Adaaha gidabwariiyda!”

³⁷ Amadu gwayi mwaatkwa aba jeenyaawa, “Asiisi ghayi jaat gheanyanga siida ng'oawiin ghwaraay ghwanung' ea mwami siisi?”

Lasaro geetuudu

³⁸ Iidu nea nigiisan Yesu aba jeadaanyi ghwahita heeda bung'eeda; abeeda bung'eeni gwaleeda nea geedukuteawa lagheaneeda.

³⁹ Gwayeesha Yesu, “Ageanda lagheaneeda.” Ghwasha Martayda was huda gheamata siida heeta meahiin ak gwayeesha niny, “Ng'utamiida, gajea niimealu aba gideaba nih eaweedeaba ang'wani aba miyeeda.”

⁴⁰ Hean gwayeesha Yesu niny, “Heapi miidarukuneeyi gideaba iimwasi gaydaaha giigheambiita ASEETA?”

⁴¹ Hean geegeanda lagheaneedida. Ng'ata goong'weersa Yesu humng'eeda ak gwayi, “Geabadiischooweey Bwaabwa aba gideaba iissa giyiinyi gideargu.

⁴² Ghaanali gideaba iissa giileeysean iit galeagasean. Ak ghamneawa gearukuni ng'asheanji badahukeaba fiisu miinaada aba hijiin, ak abeeda gayghamwas gideaba giijeaknean.”

⁴³ Ng'ata rukunoodeaba ng'asheesu gaguurda aba ghuuta haw, “Lasaro, Rini jarooda.”

⁴⁴ Gwardu jarooda siidida heeta meahiin, nea radaat geeshanga ea geatinga aba weageaka nea gheamamdaanyi ea sidukuta aba hang'da. Gwayeesha Yesu saawa, “Ootina, ak ghoanung'waadi gawa.”

Geamwaal gichea eenuusta Yesu

⁴⁵ Hean iidu fuga saang'a bea Yahudi heeta hidu heeda Mariya iidaah gidida siniin, ghamwas niny;

⁴⁶ gaweay fuga mwaatkwa heeda Farisaayajeega ak ghoadayda iita ng'asheanda sin Yesu.

⁴⁷ Gwasin Ashoohoodiga hees sea Farisaayajeega girgweageeda nea gwayi, “Gajeesina naaha? Anda siisi iissa gwasin gwadeagwajeega saang'a muuchi.

⁴⁸ Gajiidu Iisinung'waadi gwasunu gayghamwas buuneesean, ak gayghapka fuga Rumi gwanyarja hoorgeedeanya ghaydit ea eemeedeanya.”

⁴⁹ Ng'ata gwayeesha siyagi siguura Gayafa was ashoohoocheanda haw gweaydida, “Agooga moanali gil;

⁵⁰ agooga moanaali gideaba ghang'wana ghami siyagi aba jeedeang'wa aba badahuuka buuneeda, mwasamwa gideaba gajealas uhuuda eemeesean.”

⁵¹ Siisi marukunana uhuudaanyi ng'asheesu, gwarukuna gideaba niny ashoohoocheanda haw gil aba gweaydida, niny gwaramoorsa gideaba Yesu gayghami aba badayda eemeeda,

⁵² ak ea mii badaydeaba eemeeni gil ak ghwahit, ghabwada gideaba gagasa goonyeaschi diibiga ASEETA nigeawiit ghwadarda ak ghoah gilagi.

⁵³ Ghang'eada eaweedida gagasa gheata gichea gwanuusta.

⁵⁴ Hean eamudu gwaneayeewa Yesu bugusta fuga Yahudi nea ghabwadakta, ghabeawa hoowa ak gawa ng'eanyiida neekeewa dareapcheeda jeeda mujiineeda siguura Efraimu; ak goobiida hoowa sea ginealangaaschi.

⁵⁵ Abeeda ea nineekiit Basaakeeda fuga Yahudi, gaweay fuga saang'a beawa darooraka ak gaweay Yerusalemu ghoamiidu geat nea mii ghwahidu Basaaka.

⁵⁶ Hean iissa geegasa Yesu. Ak ghabwat geat aba gheeda sibata ASEETA ak goonyeari geat gideaba, “Gawuurjiin? Mayghoan jeedeaba ghweelmeeni?”

⁵⁷ Abeeda ea niidayda Ashoohoodiga hees ea Farisaayajeega iita gideaba siida deepa ghwanal heeda mida Yesu ea darukusiina ak abeeda geang'waay.