Yohaana 10 - Bibliyeeda Ghaydit

Gida sigala haghweadoocheanda

¹ “Aba huumwa, aba huumwa, geayeeshiineegwa, siida wassean masiga gidaghuuta ak gawa jeeda gheeda gisilga amadu ghamwaasta ak ghwala nawa nuut, siisi mareanghweanda gil nea gooreedi fih haleanjeeda;

² duuku siida weah jeeda gheeda nea gwasik gidaghuuta, siisi haghweadoocheanda gisilga.

³ Iissa gwajeassa furiischoocheanda gidaghuuta; ak iissa ghwayiiy gisilga ghuutaanyi, ak iissa gaguursa gisilgaaschi nea gaba nih guursiina gheawungaaschi ak gooruuta jarooda.

⁴ Iing'ata giruteayda hean goosheedeawa ak ghwaat geeshta gisilga aba gideaba ghwanal ghuutaanyi;

⁵ Mayghwaat geeshta rabascheanda gaygamng'aw aba gideaba mwanala ghuusiga rabasta.”

⁶ Yesu gwarukuta ng'asheesu awaaghaniin, amadu eamajeeng'na saawa gidida rukusean.

Yesu haghweadoocheanda miy

⁷ Gabiikta Yesu gicha ak gwayeesha, “Aba huumwa, aba huumwa, geayeeshiineegwa, aniini geawooschi gidaghuuta gisilga.

⁸ Fuga suurja sean ghayi ashooynanean mareanghooga gil ea fuga areedi fih haleanjeeda; ak ea mealeeysiiniit gisilga.

⁹ Aniini geawooschi gidaghuuta, siida iiweah gah nea gwasku heedeanyu gajeelealu, gaygawa gah nea gwardu ak abeeda gayghwanyas haghweeda.

¹⁰ Mareanghweanda iissa ghwaan gwajagwadiischi nea gwanuus nea ghwadatas; aniini ghaawunyi ghwanyasa eaweega ea ghwanaawda.

¹¹ Aniini geawooschi haghweadoocheanda miy. Haghweadoocheanda miy iissa ghoaghaashta eaweagaaschi aba badayda gisilga.

¹² Siida siitaw gidageatinda mawoosa haghweadoocheanda biissa gisilga ea mii gaaschi, iidaah suuyeanda nea ghwaan, gwanung'usa heeda gisilga ak gamng'aw; ak ghoang'waay suuyeanda ak ghoadaarda.

¹³ Niny gamng'aw aba gideaba maduupa ng'asheega gisilga aba gideaba niny siida mushaahara gil.

¹⁴ Aniini geawooschi haghweadoocheanda miy; aniini ghaanali geasu ak eara geasu ghwanalan,

¹⁵ gidanaldanaan Bwaabwa, ghaanali Bwaabwa; aniini ghaaghashti eaweegeasu aba badahuuka gisilga.

¹⁶ Geabiisi dandeawa gisil suuk manda seamoodeaba gheawi; asi eara suh gammiisa gideaba gaydaaghuumu, ak gayghwayiiy ghuuteanyu. Ak abeeda ghoah hawanyeanda agi, ak haghweadoocheanda gajea agi.

¹⁷ Aba sareani Bwaabwa ghabwariinyan, aba gideaba ghaaghashti eaweegeasu, ak geabiikti dageanu gicha.

¹⁸ Manda siida geandeawanean, ghaaghashti aniini aba uhuudeanyu nea gabwageaw. Geandeawi uurda jea daghashtaawa ak geandeawi uurda jea dabiikta dageana; nih gidaghayi adeaganean Bwaabwa sinooda.”

¹⁹ Hean gabiikta gicha ghwadarda fuga Yahudi aba badaydeaba ng'asheesu.

²⁰ Gwayi fuga saang'a aba jeenyaawa, “Siisi gabearji meangeenda, ak ghabwada nih gaba geas; ghwasaan anda gooleeysiit?”

²¹ Gwayi mwaatkwa, “Ng'asheega sunu maba siida bearji meangeenda. Neada meangeenda ghoamu ghwajaat gheanyanga siida ng'oowi?”

Yesu geaheawa

²² Abeeda aba hoowa bea Yerusalemuun gwanda ghweelmeeda simwanya gheeda sibata ASEETA;

²³ nea abeeda damandida ea damanda gooroogeeda, nea eara Yesu abeeda gwaneayeewa jeeda gheeda sibata ASEETA heeda was doodooda Sulemani.

²⁴ Hean gwaneaweesa fuga Yahudi ak gwayeesha, “Gaynung'waada eepiidana jeeda hirbabandeeda ea ghoah eeju? Iiwoosi Gristo nea huumwa gil girukuneasa nea giidaajiidi.”

²⁵ Ghwasha Yesu nea gwayeesha, “Nigeawiit darukuneegwa ak ea moamwasi. Gadiyoojiga easinyi aba gheawunga Bwaabwa gamuuwunean aniini;

²⁶ iidu ea moamwasi agooga aba gideaba moowoosi gisilgeasu.

²⁷ Gisilgeasu ghwayiiy ghuuteanyu ak ghaanali saawa ak gweadu geeshteanyu;

²⁸ aniini iissa ghaadawji eaweega manda muudeanooda, ak eara saawa ghanyea maygwarooda earahay ea ghoah eaweega manda muudeanooda, nea ghanyea manda siida ammu gageandeawa geatindeanyu.

²⁹ Bwaabeedeanyu, goonan ea haweewa sean, ak ghanyea manda siida ammu gageanda saawa aba geatinga Bwaabwa.

³⁰ Aniini sea Bwaabwa geawooschi gilagi.”

³¹ Hean gageanu fuga Yahudi lagheanga nea gajeefta.

³² Ghwasha Yesu nea gwayeesha, “Aniini naahiimneegwa gadiyoojiga saang'a miyaasiin leabu heeda Bwaabwa; abeeda ea aneeda gil aba jeedeaba ng'asheesu jea ghwanung' aftean aba lagheangean?”

³³ Ghwasha fuga Yahudi nea gwayeesha niny, “Majeefteey aba gadiyoojiga miyaasiin isinayi, gaygweagu ng'asheagaagu munyas irukusi ASEETA; aba gideaba gisini geaw ASEETA nea guwoosi siida.”

³⁴ Ghwasha Yesu nea gwayeesha, “Miyeeng'waari aba jeeda deaweedeedeang'wa gideaba, ‘Geayeenyi goowooschi aseecheeka’?

³⁵ Abeeda iiguura aseecheeka fugiga ghayi hina ng'asheanda ASEETEAN (nea ng'ooruutka ea mayghwayamwa),

³⁶ goobalooli siidida ghayi amiidu Bwaabwa ak goojeagu ghwaan badayda ng'eanyiidean ak gooyeeshi, ‘Girukuni badayda ASEETA ng'asheega munyas,’ aba gideaba geayeenyi, ‘Aniini geawooschi Orjeeda ASEETA’?

³⁷ Abeeda iimeasini gadiyoojiga Bwaabwa, ea adoamwaschaan;

³⁸ ama easinyi earapeadi moamwasaan ghang'wana ghoamwaschi gadiyoojiga ak abeeda goojeeng'u nea ghoanali gideaba Bwaabwa gwanda jeedeanyu nea geandi aniini jeeda Bwaabwa.”

³⁹ Gabiikta Saawa gagasa ghoang'waay amadu gamul aba geatinga nyaawa.

⁴⁰ Gabiikta Yesu gawa giigheawda Yordani heeda ghayi abaatiisaniisa Yohana buuneeda aba mwadi ak goobiida hoowa.

⁴¹ Gaweay fuga saang'a headaanyi ak geeyeesha, “Yohana miigwasin gwadeagooda, duuku ng'asheega sean ghayi rugu aba badaydeaba siisi ea huumwa gil.”

⁴² Iidu ghamwas fuga saang'a mida hoowa.