Yohaana 1 - Bibliyeeda Ghaydit

Ng'asheanda eaweega

¹ Ghayi aba garayi gwanda Ng'asheanda, nea Ng'asheanda gwandeayi sea ASEETA, nea Ng'asheanda ea ASEETA.

² Aba garayi niny gwandeayi sea ASEETA;

³ haleanjeeda sean geesin aba niny, nea iimanda niny ghanyea maygwanda gil aba haleanjeeda sisin.

⁴ Jeadaanyi gwanda eaweega, nea eaweesu ea weeshinda buuneeda.

⁵ Nea weeshini ghoabwaay jeeda misaneeda, nea misaneeda ea miighoamu ghwajoar.

⁶ Abeeda gwanda siisi siicheagu leabu heeda ASEETA; siguura gheawungaaschi Yohana.

⁷ Niny ghwaan ak gamuuwu iita weeshinda, ak abeeda ghamwas buuneesean aba niny.

⁸ Nea niny ea mii weeshinda gil, niny ghwaan gamuuwu iita weeshinda.

⁹ Nih weeshinda huumwa gil hidu jeeda ng'eanyiida ak ghoabwaay giliwas sih.

¹⁰ Niny ghayi abeeda gwanda jeeda ng'eanyiida, nea ng'eanyiida geesin aba badaydaanyi ak ea mwanala ng'eanyiida.

¹¹ Niny ghwahidu gheanyi, ak ea mwadeapta fugaaschi.

¹² Nea fugiga sean deapta ninyiin, ak ghamwas aba gheawungaaschiin, ghoadaw uurda jea ghoaweewa diibiga ASEETA;

¹³ Fuga meejiilana naweeda gealaan, ghana gidabwariiyda saseeda, ghana gidabwariiyda siida, geaghus ASEETA.

¹⁴ Ak iidu ghoah Ng'asheandida saseeda ak goobiida jeedeanya, niny ghwanyiit dagheerjeanduumeeda ea huumeanda ak ea sidaayi, giigheambiitaanyi, giigheambiita uurji dea Orjeeda was haghasheeda leabu heeda Bwaabwa.

¹⁵ (Yohana gamuuwu iitaanyi, ak goojuur, “Nih dea ghayi earuku nea geayi, ‘Nih dea ghayi eayeenyi gay gweadu geeshteanyu ak ea haweewaneani aba gideaba gwanda madeedeanyu.’”)

¹⁶ Aba hidoadaanyi aseasa sinyaschi dagheerjeanduumeeda nea geetaguurji.

¹⁷ Aba gideaba deaweeda geegu aba naweeda Musa; nea dagheerjeanduumeeda ea huumeanda ghapkaana naweeda Yesu Gristo.

¹⁸ Manda siida nidaah ASEETA; Orjeeda was haghasheeda, mideayi sea Bwaabwa, niny siida adaajiidi.

Giijasta Yohaneeda Abaatiisachi

¹⁹ Nih gidamuuwu Yohana, goojeakta fuga Yahudi mida Yerusalemu ashoohoodiga ea fuga Lawi ghoanyaash gideaba, “Guwoosi ng'eaha?”

²⁰ Ghamwas ak ea mwashaang'a ghamwas, nea gwayi. “Aniini meawoosi Gristo.”

²¹ Geenyaash niny, “Ak guwoosi ng'eaha? Guwoosi Eliyahi?” Gwayeesha, “Meawoosi.” Geeyeesha, “Abeeda guwoosi sibaneeda?” Gwayeesha, “Manda.”

²² Geeyeesha niny, “Asi ang'iing'i guwoosi ng'eaha? Rukuneasa ak geeyeasi iita fuga ajeakneasa. Giyeaniin aba badaydaang'u?”

²³ Gwayeesha, “Geawooschi ghuuta siida nyeara jeeda dareapcheeda, ‘Ooleapa naweeda Ng'utamiida,’ gawuurji gidaghayi rukuteayda sibaneeda siguura Isaya.”

²⁴ Fiisu abeeda goojeagu Farisaayajeega.

²⁵ Ng'ata geanyaash nea geeyeesha, “Ang'iing'i iimuwoosi Gristo ghana Eliya, ghana sibaneeda anda giibaatiisanayi buuneeda?”

²⁶ Ghwasha Yohana nea gwayeesha, “Aniini geabaatiisananeegwa beega, ak gwanda jeedeang'wa siida miinaada nea moanali,

²⁷ siisi gaygamaseawnean, ak aniini ea mamiisean deatineada deanga geakaaschi.”

²⁸ Ng'asheesu seaniin geesin aba hoowa bea Betaniyaan giigheawda Yordani was heeda abaatiisaniisa Yohana buuneeda.

Dayeenda gisilleanda bea ASEETA

²⁹ Muchu ghwadaah Yesu nea ghwaan headaanyi ak gwayeesha, “Ng'ula Dayeenda Gisilleanda bea ASEETA jea gageanda riing'eeda jeeda ng'eanyiida!

³⁰ Nih dea ghayi earuku eayeenyi, ‘Gwanda siisi jea gamaseawneani, aba gideaba niny ghayi gabay gwanda madeedeanyu, aba gideaba gwanda madeedeanyu.’

³¹ Aniini siisi ghayi mwaanali, amadu ghaawunyi deabaatiisan aba beega ak abeeda geeteajiisa Israeli.”

³² Ng'ata gamuuwu Yohana ng'asheega nea gwayi, “Naadaayi Guroorooda gwashuubeanda ghariibajeanda nea ghoabina humng'eeda ak goobissa uhuudaanyi.

³³ Eara aniini abeeda mwaanali; amadu ghwanung' siidida ghayi ajeaknean deabaatiisan aba beegean gwarukunean gideaba, ‘Siidida jea daaha nea gwashuubeesa Guroorooda ak goobissa uhuudaanyiin siida nih diita jea goobaatiisan aba Guroorooda Ghaydidiin.’

³⁴ Ak aniini ea naadaayi ak ea neamuuwu gideaba siisi Orjeeda ASEETA gil.”

Giinealanga madeeda bea Yesu

³⁵ Muchu gabiikta Yohana ghamiinaada sea ginealangaaschi asiyeenya.

³⁶ Hean gang'ula Yesu nea ghang'ata ak gwayeesha, “Ng'ula, Dayeenda gisilleanda bea ASEETA!”

³⁷ Ghwayiiy Giinealangiga asiyeenyean niny nea gwarugu ng'asheesu ak ghwaat geeshta Yesu.

³⁸ Ghwayam geaw Yesu ak ghwadaah nea ghwaat geeshta ak ghoanyaash saawa nea gwayeesha, “Googaseadayi naaha?” Hean geeyeesha niny, “Rabi” (nea gideaba Giinealshoocheanda gil), “ang'iing'i giibiiti yeenu?”

³⁹ Gwayeesha saawa, “Abeeni ak gajadaaha.” Ng'ata ghwaat geeshta, ak ghwadaah heeda eawoojisu abiita, goobiitpiit gwandeawa niny eaweedida abeeda gaba aseeta damanamughuush.

⁴⁰ Iiy orjeanagi aba jeedeaba giika asiyeenyean nea gabalool Yohana ak ghwaat geeshta Andreya gil, was orjeeda geenyea Simoneeda siguura Betaro.

⁴¹ Goosheeda ghwadaah Simoneeda was orjeeda ghaamwat, ak gwayeesha, “Sidaayi Masiya” (nea gideaba Gristohi).

⁴² Hean ghwaat heeda Yesu. Daah Yesu gwayeesha, “Ghamneawa geeguureeweey Simon Orjeeda Yohana? Asi gajeeguureeweey Gefa” (nea gideabeadaanyi ea Betaro gil).

Yesu gaguursa Filipo ea Natanaeli

⁴³ Iimuchu ea nigasa Yesu beata Galilaya. Ghwadaa Filipo ak gwayeesha, “Eani geeshteanyu.”

⁴⁴ Filipo niny siida leabu Betsayda gil, mujiineeda geaba Andreya ea Betaro.

⁴⁵ Filipo ghwadaah Natanaeli ak gwayeesha, “Sidaayi siida ghayi ng'oar Musa ng'asheagaaschi aba jeeda deaweeda. Siisi ghayi ng'asheagaaschi ghang'oar sibanga. Yesuheeda Nasareti, was orjeeda Yosefu.”

⁴⁶ Gwayeesha Natanaeli niny, “Asi eara Nasareti ghoamu gwarina gilimiyi?” Gwayeesha Filipo niny, “Beeni daaha.”

⁴⁷ Ghwadaah Yesu Natanaeli nea ghwaan headaanyi, ak gwayi, “Ng'ula, Israelajeanda huumwa, manda jeadaanyi ng'uyeega eara gil!”

⁴⁸ Gwayeesha Natanaeli niny, “Asi ang'iing'i ginaldananiin?” Ghwalamda Yesu ak gwayeesha, “Ghwanyawa ghaadaayeeyi nea gudumidana guumda shaboogheecheanda nea eara Filipo ea mii ghwaan gaguurneey.”

⁴⁹ Ghwasha Natanaeli nea gwayeesha, “Rabi, ang'iing'i guwoosi Orjeeda ASEETA! Guwoosi Sugoocheanda Israeli!”

⁵⁰ Ghwasha Yesu nea gwayeesha, “Ghamneawa gumwasi aba gideaba geayeeshiineey ghwanyawa ghaadaayeeyi nea gudumidana guumda shaboogheecheanda? Asi gaydaaha ng'asheega hees naawa suh.”

⁵¹ Hean gwayeesha niny, “Aba huumwa, aba huumwa, geayeeshiineegwa, gajadaaha nea ghwajaada humng'eeda, ak gajadaaha malaykajeega ASEETA heeda mwascheeng'da suurja ghwararang'aan ghapka heeda Orjeeda Siida.”