YOELI 2 - Bibliyeeda Ghaydit

Deashamga gawuurji miinda gheang'da aba eaweeda NG'UTAMIIDA

¹ Aghuuda durumbeati aba Sayuni, Oochuura aba giijeedeanyu ghaydit; Dahirbabana buuneesean bea ng'eanyiida, aba gideaba eaweeda NG'UTAMIIDA ghwaan. Aba gideaba nineekiit;

² eaweeda misaneeda duw, eaweeda shamooghuutka ea misaneeda haw. Gawuurji deashamga gharoodeaba gayeew bwargiit aba iheenga giijeega, suh ea hees ak gabiisa gwandeawa uurda, ak ea manda dea uurji saawa eara heeda ghayi, ak ea manda dea jea gawuurji iing'ata saawa, bwak ea ghang'ata gweanyeeka seaygoojiga sean.

³ Ghwaak beasta deashamga madeanyaawa; nea badahuuka nyaawa ghwayeat ng'ushapta beasta las uhuuda haleanjeeda; nea ng'eanyiini gawuurji boostaaneeda Edeni aba madeanyaawa, nea badahuuka nyaawa ea niiw dareapcheeda ak ghwahit; asaha, manda siida ghuh aba saawa.

⁴ Nea deashamga iising'ula gawuurji gilising'ula faraasajeega; ak gawuurji fuga ding'da faraasi aba gidasaldeayda.

⁵ Gawuurji deashamga gidanyaashta daghata mutukwajeega ng'ucheeda aba iheenga heayeeniga, nih ea gidang'eetiideayda; ak ghwanyaashta hididiyda ng'ushapta beasta ak mbarariida gajeami, gawuurji fuga daruusi sijip nea ghoamuughu ng'ucheeda.

⁶ Aba madeeda deashamga gwahirbaban buuneeda; nea gheamamuunatka nyaawa ea niyamwa gaweeriidi aba muuwda.

⁷ Iissa gwasaldeayda deashamga fuga daruusi; iissa gwading'deayda ghamarda fuga ng'ucheeda; nea gaweay mwadi nea gaba siisi sik naweadaanyi, nea mwadatasa geenga nyaawa.

⁸ Nea manda dea dajakta nuut; iissa gaba nih weah mwadi nea gwasik naweadaanyi. Iissa gwasin naweeda aba uurda aba bugusta dabita ng'ucheeda, nea mwanung'waada eata naweeda nyaawa.

⁹ Iissa gang'eesa deashamga mujiini; ak gwasalda aba uhuuda ghamarda; iissa ghwascheang'da ak gaweay jeeda gheeda; nea gwasikta seawuutka gidasikiida mareanghweanda.

¹⁰ Ak ghaboadan ng'eanyiida aba madeeda deashamga; ghaboadan humng'eeda; ak gamisaniit aseeta ea sheeda, nea miinga ea mudu gooboong'u,

¹¹ ak gooruudu NG'UTAMIIDA nyeashtaanyi aba madeeda lugoadaanyi; aba gideaba ng'asheega sina ea hees muuchi; aba gideaba niny ea daruus aba sinooda ng'asheandaanyi; aba gideaba eaweeda NG'UTAMIIDA aahaw, nea goobeeli fih muuchi; ak gayghoamu ng'eaha ghamilikghta?

Guurnooda Duukuunooda

¹² “Ak eara ghamneawa,” gwayi NG'UTAMIIDA, “abiiksean aba gurooruunatkeagwa sean, aba giiluuldeaydeaba geat, aba shooka, nea googutu heareega;

¹³ abwaashaada gurooruunatkeagwa, nea mii hang'weakeagwa.” Ak goobiiksi NG'UTAMIIDA was ASEETEANG'WA; aba gideaba niny dea mideawa miyeenooda, ak gwandeawa baydeayda haw; ak ea mii wusis nyaras, niny gwandeawa baydeayda muuchi, nea ghwasit ng'asheega munyas.

¹⁴ Ak ghwanal ng'eaha gideaba maygabiigu ak ghwayam geaw, ak ghwanung'waneasa ghawoadaanyi; asi huumwa, haleanjeeda ghadooweeda was dearanga, ea haleanjeeda ghadooweeda sileeha aba heeda NG'UTAMIIDA was ASEETEANG'WA?

¹⁵ Aghuuda durumbeati aba Sayuni, Oamiini giiluuldeaydeaba geat, abwadana geat fuga saang'a;

¹⁶ Oawaamwa gweargwa, oamiini fuga bwat geat, Oawaamwa gweargwa, eawaamwa diibiga, sea suh reer eanoogean; siida geeshi darina jeedeaba gheanyi, nea sibeeda ea darina aba jeeda maheemajeandaanyi.

¹⁷ Fuga was ashoohoodiga, was fuga gadiyeeda NG'UTAMIIDA, deayeawda aba dageascheeda heeda ghaydit ea heeda wagiida, Ak ea dayi, “Siksiina fugaagu, ea NG'UTAMIIDA, nea adinung' gafoaleasa eemoojiga suuk ak gwajukeasa, nea gwayi, ‘Gwanda yeenu ASEETEANG'WA?’”

ASEETA ghwanung' gabiikta gwaduudu ng'eanyiida

¹⁸ Hean gabiisa ghwalaja ghuut NG'UTAMIIDA ng'eanyiidaanyi, ak ghabwayda fugaaschi.

¹⁹ “Ak ghwalamda NG'UTAMIIDA ak gwayeesha fugaaschi; ang'ula, gaydagooneegwa booga, ea difaayi, ea nagheeda, ak gajalang'uuda aba haleanjeeni; ak ea maydabiikta danung' ahuwa fuga baspasi aba jeeda eemoojiga.

²⁰ “Nea deashamga leabu wiilooda ng'eanyiida ghayeawa gaydageanda deasheagiida heedeang'wa, ak gaydahoan mwaatkwa ea ghwahita dareapcheeda; nea shirikareeda duukusa mwadi gaydahisa jeeda basooda balang'da, nea heeda duukusa bwadaw gaygaweay jeeda basooda Mediteraniya ak gameewa; nea shearooda gimealnoadaanyi gaygwadiyeada gagal humng'eeda, aba gideaba nisin ng'asheega sean munyas.

²¹ “Ea ng'eanyiida adibeali; hoosana nea ging'weelayi, aba gideaba NG'UTAMIIDA nisin ng'asheega hees.

²² Adoabeali ea diyeanga jarooda; aba gideaba nyeega ea nyawiiri nea geediga gwaji haghweega nea shaboogheecheanda ea sabiibu gwaji haghweega saang'a.

²³ “Asi ahoosana, ea orjooga Sayuni, ak goohoosanyi aba badayda NG'UTAMIIDA was ASEETEANG'WA; aba gideaba niny iissa gagooneegwa roopta muweeda, aba damanda, ak iissa gwaroobassa roopta, roopta muweeda, ea roopta simanga gawuurji gidaghayi bea mwadi.

²⁴ “Nea heeda siileeliisa booga gayghwanyiit ngaano, nea heeda simanmaniisa difaayi gayghwanyiit difaayi ea nagheeda.

²⁵ Ak gaydaaghuumneegwa haleanjeeda gweanyeeka ak deashamga saang'a, ea haluuleeda duulu haleanjeeda was lugooda ghayi eayeadu jeedeang'wa.

²⁶ “Ak gajayaaga hamita haw ea alang'uuda, ak ghoakghaambiichi gheawunga NG'UTAMIIDA was ASEETEANG'WA, sineegwa ng'asheega deamdeameadi; nea buuneedeanyu ghanyea mayghabwaspwas.

²⁷ Ak gajanala agooga gideaba aniini geandi jeeda fuga Israeli, ea gideaba aniini geawooschi NG'UTAMIIDA was ASEETEANG'WA, ak ea manda nuut; nea fugeasu ea mayghabwaspwas earahay.

Eaweeda Ng'utamiida

²⁸ “Iimuchu nea ning'ata ng'asheesu, abeeda gaydeadalealsa gurooroodeanyu badahuuka buuneesean; nea diibigeagwa was orjooga ea haweega, gayghwaramwaar, gweargweagwa gaygoorgweadi, gheareemangeagwa gayghwadaah gisiihiimsa;

²⁹ nea eara badahuuka fugeagwa bea gadiyeeda, headiga ea gadeemga, aba askwearjoojigiga, gaydeadalealsa gurooroodeanyu.

³⁰ “Ak gaydaahiimu ng'asheega deamdeameadi aba humng'eeda ea ng'eanyiida, foojeanda, ea beasta, ea arooscheeka miinaada.

³¹ Gajeayam aseeta ak gamisaniit, nea ghoah sheeda foojeanda, nea mii ghwahidu eaweeda haw bea NG'UTAMIIDA abeeli fih.

³² Nea abeeda siida wassean jea gaguura gheawunga NG'UTAMIIDA gayghaghu; aba gideaba aba giijeeda Sayuni ea Yerusalemu gaygwanda fuga jea ghaghu, gawuurji gidanyaashta NG'UTAMIIDA; nea fuga abit gayghaghu.’”