YOELI 1 - Bibliyeeda Ghaydit

¹ Muchu ghwahidu ng'asheanda NG'UTAMIIDA heeda Yoeli orjeeda Betueli.

Buuneeda gagiisan aba giishealda booga

² Ayiinya ng'asheesu, ea gweargwa; ayiing'sheena, ea fuga sean mida ng'eanyiida. Heapi ng'asheesu ghayi gwanda aba damandeang'wa, ghana mida damanda ghweanigeagwa?

³ Arukusiina diibigeagwa iitaanyi, ak ea darukusiina diibigeagwa diibiga nyaawa, nea diibiga nyaawa ea darukusiina seaygeeda nuut.

⁴ Haleanjeeda abuut deashamga, niyaak deashamga saang'a; nea haleanjeeda abuut deashamga saang'a, ea niyaak haluuleeda, nea gea abuut haluuleeda, ea niyaak deashamga duulu haleanjeeda.

⁵ Aboogida, ea fuga boogidi, ak gooyeawdi; ookuula, agoogeeda leeha difaayi, aba badayda difaayeeda duu ghwaheas, aba gideaba sisachnyi aba ghuusigeagwa.

⁶ Aba gideaba nupka deashamga jeeda ng'eanyiideanyu, mideawa uurda ak ea manda mooneeda; geeshatkaaschi gawuurji gea ng'adiida, nea gwandeawa ng'eadiilga soorearda.

⁷ Nidatas deashamga sabiiboodeanyu, ak ea nihirja shaboogheecheandeanyu; ak ea siipuusa badatkaaschi ak ghwahit ak ea nibwaay gawa ng'eanyi; nea damealgaaschi ea sinung' gaweeriidi.

⁸ Gutuuni heareega uurjeewana huda akweali guniyajeega aba badayda siyeeda huduumeadaanyi.

⁹ Haleanjeeda sisapa geadi bea ghadooweeda was dearanga ea haleanjeeda sisapa geadi bea ghadooweeda sileeha sisaja gheeda NG'UTAMIIDA; ashoohoodiga, was fuga gadiyeeda NG'UTAMIIDA, gagutu heareega.

¹⁰ Madamnyeanda nimi, ng'eanyiida gagutu heareega; aba gideaba booga nimeewa, difaayeeda miyaasiin nighajaamiit, nagheeda nisuunya.

¹¹ Ahamwa ng'eanyi, ea fuga bwar ng'eanyi, ookuula, ea fuga fur sabiibu, aba badayda ngaano ea shayiiri; aba gideaba nirooda booga madameega.

¹² Sabiibu nisis, nea shaboogheecheanda ea nighawasa. Gulageecheanda ea miileanda ea rabeakgha, ea geediga sean mida madameega nisis; aba gideaba niisha bariinyeega aba jeeda buuneeda.

¹³ Oomajeega geat ak googutu heareega, Ea ashoohoodiga; ookuula, Ea fuga gadiyeeda heeda wagiida; apkaani alila eaweesean aba badahuuka guniyajeega, Ea fuga gadiyeesa ASEETEANYU; aba gideaba haleanjeeda ghadooweeda was dearanga ea haleanjeeda ghadooweeda sileeha oaheawi ayaada jeeda gheeda ASEETEANG'WA.

¹⁴ Ang'ula giiluuldeaydeaba geat, aguursiina fuga bwat geat. Dabwada geat gweargwa sea fuga sean bea ng'eanyiida; daweayi gheeda NG'UTAMIIDA, was ASEETEANG'WA, ak gooyeawusi NG'UTAMIIDA,

¹⁵ Dashageada askweardida! aba gideaba eaweeda NG'UTAMIIDA nineekiit, ak gayghoan nea gawuurji nyariida leabu heeda ASEETA mideawa uurda.

¹⁶ Heapi hamita miyeesach gwasheagiida madeeda gheanyangaasa? huumwa, hooseaneega ea rearga meanung' gwasheagiida gheeda ASEETEANYA?

¹⁷ Histeanga gameewiisa jeeda sigeeda; gijigoonga niibit mwadaagha; madalajeega ninyara; aba gideaba booga nigajeamiidi.

¹⁸ Gawuurji gidamuumiida diyeanga! Hawanyoojiga dugwa nibeal, aba gideaba mandeawana nyeega; huumwa, hawaniga gisilga ninyas sawanadeeda.

¹⁹ Ea NG'UTAMIIDA, aniini geayeawuseey ang'iing'i. Aba gideaba niyaak beasta nyeega dareabeeta, nea ng'ushapta beasta ea niduulu geediga sean bea madameega.

²⁰ Huumwa, diyeanga jarooda gang'uleey ang'iing'i; aba gideaba eeniga beega nijaam, nea beasta ea niduulu nyeega dareabeeta.