YEREMIYA 9 - Bibliyeeda Ghaydit

¹ Gideabali ghwayamwa uhuudeanyu ghoah beega, ea gheanyangeasu ghoah eeniga dabeaka, danyas gheata deayeawdi askweari ea eawa aba bayiiga hudeaba fugeasu!

² Gideabali ghwanya ghaanyaschi heeda jea deabiida aba dareapcheeda, ghwanya gaydanung'wa heeda fugeasu ak geasheagiideewi heeda nyaawa! Saawa aba giteena nihiseada, Niiw guuyeeda fuga munyas.

³ Hean ghaghwanda ng'ushapkeaka nyaawa ghuweanga; nea ng'uyeega ea niheena jeeda ng'eanyiida ea ghwanaawa huumeanda; nea ea nisin riing'eeda ea ghwanaawda, ak ea mudu ghwanalan, ng'asheanji gwarugu NG'UTAMIIDA.

⁴ Daba siisi shageat giischeewoocheandaanyi, nea adiidu goosisi masaweega orjooga giyeang'wa; aba gideaba gilinyoo ea siida gil gaba ng'uya nea giischeewda gabadiiniida fuga ng'uyeega.

⁵ Gaba siisi reengani giischeewoocheandaanyi, nea ea manda siida rugu huumeanda; nea ghuusiga nyaawa ea niinaal rukuunooda ng'uyeega; gwasin riing'eeda ak ghwaraay gwaduukuuna.

⁶ Niideatooschi ghabasta, nea ng'uyeega ea nibatiisa geat hijagi ak ghaheawanaan, gwarugu NG'UTAMIIDA.

⁷ Asi gwayi NG'UTAMIIDA bea lugweega “Ng'ula gaydadayi ak geasimnyi saawa, gaydasin naaha aba badaydeaba fugeasu?

⁸ Ghuusiga nyaawa gawuurji geatka mideawa furgweega, mwanung'wa ng'uyeega; inyeesa gabaloola ghuuta miy sea giischeewoocheandaanyi nea aba gurooroadaanyi ghwadap neawsiinda.

⁹ Gwayi NG'UTAMIIDA ghamneawa gajea meargweaksiini fiisu aba badaydeaba ng'asheesu? ak nea gajea maawaldani aba badayda eemeeda uurji suh?

¹⁰ “Agutuuni heareega nea gooyeawdi aba badayda giijeega ea shooka aba badayda nyeega mida dareapcheeda, aba gideaba nijeama nea manda siida jea ghwala jeeda nea meayiinya eara nyeashta dugwa; nea dariidaka humng'eeda ea diyeanga jarooda ea niiguudeadayi.

¹¹ Gaydanung' ghoah Yerusalemu eemeega hees gaydanung' ghoah shoomeanga fureayoonga; gaydanung' ghoah mujiinajeega Yuda raghoonyeanda, heeda moobiiteena sih.”

¹² Gajea ng'eaha siida jea ea bwaraawu jea ghoamu ghwanal ng'asheesu? NG'UTAMIIDA gajea nibalool ng'eaha, siisi jea gwarukwiida ng'asheesuun? Ghwasaan ng'eanyiida sinung' ghoah eemeega nea geanung' ghoah mur ng'eanyi ea gawuurji dareapcheeda, ea mudu gwanda siichea gwasik jeeda?

¹³ Hean gwayi NG'UTAMIIDA, “Aba gideaba niheawa ghoang'waayi huumeanyeekeasu ghayi aayiinyi madeeda nyaawa, ak hean ghaheawa gooleeysiit ng'asheegeasu ak ghwaat naweadaanyi,

¹⁴ ak aba hang'ooynacheeka nyaawa ea niyaat geeshta gidanyah gurooruunatka nyaawa, ak hean ghwaat geeshta Baali gawuurji gida ghayi analda ghweaniga nyaawa.

¹⁵ Ng'ata gwayi NG'UTAMIIDA bea lugweega, was ASEETA fuga Israeli. Ng'ula fiisu gaydang'ata aba sawanadeeda nea ghaanung' ghwali beega mideawa furooda.

¹⁶ Ak gaydeadearsa jeeda eemoojiga ghayi miighwanal saawa ea ghweaniga nyaawa; ak gaydanung' gawa ng'uta badahuuka nyaawa, bwak ea dahuuyda goosha.”

Fuga Yerusalemu gagasa weeta

¹⁷ Gwayi NG'UTAMIIDA bea lugweega: “Ooteemsheena, ak googuursi shoogoodiga ghapka; aguursiina gadeemga was gearnoodiga ghapka;

¹⁸ Danung' ghwalamwajaan gooyeawuseasa, ak abeeda gayghoareama gheanyangaasa dabeaka, ak gwaduk gheanyangaasa dabeaka.

¹⁹ Iinya geeyiing'sa ghuuta shookcheanda Sayuni: ‘Ng'ula gisihuydeaydaneasa nea siipwaaspwaaseasa, sinung'i heeda ng'eanyiida, aba gideaba nilalaksa ng'eanyi heeda siipiiti.’”

²⁰ Oaleaydiit, ea gadeemga, ng'asheanda NG'UTAMIIDA, danung' ghwayiiy iidigeagwa ng'asheega leabu ghuutaanyi, oanala haweegeagwa gutuunooda heareega, ea giischeewoocheandeang'wa gichea goonyahuusheata.

²¹ Nea ea nihidu miyeeda gah nea gwasigu seawuutka, ak ghoaptu jeesinga gealgaasa, ak gahuuyda diibiga aba jeeda naweadinga ea gheareemanga aba jeeda moohajeega.

²² Ng'ata gwayi NG'UTAMIIDA: “Rukuta gideaba, ‘Muscheeka headiga gaygoobargiisheata ng'ooyanga aba mooheeda, gaygawuurji booga nung'wa heeda fuga laja booga, nea manda siichea ghoawaam.’”

²³ Ng'ata gwayi NG'UTAMIIDA: “Adiidu siida weaghoot ghaghwar geaw aba weaghuumeadaanyi, nea siida haw uur adiidu ghaghwar geaw aba uurdaanyi, ak eara meanang'ocheanda adiidu ghaghwar geaw aba meanang'oocheanduumeedanyi;

²⁴ Gwayi NG'UTAMIIDA, siida ghwar geaw ea daghwara geaw aba ng'asheanji, gideaba ghwanal gideaba geawooschi NG'UTAMIIDA ahiimu bariinyeega huumwa, ea doobiiwnata, ea alooheeda aba badayda ng'eanyiida, aba gideaba suh gea ahoosaneani gil.”

²⁵ Gwayi NG'UTAMIIDA, “Ng'ula gayghapka eawoojiga jea deargweaksa fuga siiyiil nea ghwasam fuga miyeeyiil–

²⁶ was fuga Misri, ea Yuda, ea Edomu, was orjooga Amoni, ea fuga Moabu, ea fuga sean abiita jeeda eeshtearajeanda reegwa iheenga nyaawa goonuweagi buudeega nyaawa, aba gideaba eemoojisu miyeeyiil, nea gheeda sean bea Israeli ea miyeeyiil gurooruunatka.”