YEREMIYA 7 - Bibliyeeda Ghaydit

Yeremiya goorgweach aba jeeda gheeda sibata ASEETA

¹ Ng'asheanda hidu heeda Yeremiya leabu heeda NG'UTAMIIDA:

² “Miinaada aba gidaghuuta gheeda NG'UTAMIIDA, ak girukuti aba hoowa ng'asheanji, nea giyeeshi, Oaleaydiit ng'asheanda NG'UTAMIIDA, fuga sean bea Yuda oowadiinayi jeedeaba gheanyi aghadoawana NG'UTAMIIDA.

³ Gwayi NG'UTAMIIDA bea lugweega, was ASEETA Israeli, asina naweadingeagwa ea sinaweegeagwa, ak gaydanung' oopiidana jeedeaba gheawi.

⁴ Adiidu ghoamwaschi ng'asheesu bea ng'uyeegean bea gideaba: ‘Nih gheeda sibata ASEETA, nih gheeda sibata ASEETA, aba huumwa nih gheeda sibata ASEETA.’

⁵ “Aba huumwa inyas gajayamwa naweadingeagwa ea sinaweegeagwa, nea goosiniisi geat doobiiwnata,

⁶ inyas ea majajiira rabasta, ghana bananeeda, ghana masinung'weanda, nea moahiidani foojeanda siida maba riing'a aba hiji, nea inyas gajanung'waada badita aseecheeka jea gwasawaneegwa,

⁷ ak abeeda gaydanung' oopiidana hiji, jeeda nyeanyiida ghayi aadawji ghweanigeagwa aba garayi.

⁸ “Ng'ula, agooga goosisi masaweega ng'asheega ng'uyeega marachi gil,

⁹ Ghamneawa gajajagwadiischeena, gajareang'ni, gajahiseada, gajayaaga habeawooda ng'uyeega, gajagwardeaysiina Baali geediga ng'andidi, ak ghoabwachi aseecheeka miyoanala,

¹⁰ ama ng'ata ghoapkaanyi amiinaada aba madeedeanyu hiji bea gheawiin, sinal aba gheawungeasu, ak gooyeenyi, ‘Aseasa silealneasa!’ nea googutkuti sinoodeaba ng'asheesu munyasiin?

¹¹ Heapi gheawi sinal aba gheawungeasuun niiwa gheeda mareanghooga aba heedeang'wa? Gwayi NG'UTAMIIDA, Ng'ula neadeaksi geaw.

¹² Aweayeena hoowa bea gheenyuun mida Shilo, heeda ghayi anung' goobiida gheawungeasu aba mwadi, ak ghoadayi gideasimi aba munyinda fugeasu was Israeli.

¹³ Asi ghamneawa gwayi NG'UTAMIIDA, aba gideaba noosinyi ng'asheesu seaniini, ak eara dadap giibaloodeang'wa, ea mooleeysiinean iit, eara iyeaguurneegwa ea manyeara ghuusigeagwa

¹⁴ Hean aba gideasimi mujiineeda Shilo, ghoah gichea dasima gheawi siguuruuna gheawungeasuun, oosiniisi masaweega, ea heeda ghayi agoonyeegwa ea ghweanigeagwa.

¹⁵ Ak gaydaang'aamwaneegwa madeedeanyu, gawuurji gida aahoandi fuga oorooroocheewi, was jeacheenga Efraimu.

Heeheeweega buuneeda

¹⁶ “Asi ang'iing'i, adiidu gimusiischeesi fiisu, adiidu gimiindi shooka ghana musischeena aba ramaseanda nyaawa, nea adiidu giimearmearanay aba gideaba maydealeeysiineey iita.

¹⁷ Ang'iing'i ming'uli gidasin aba jeeda mujiinajeega Yuda ea jeeda naweadinga mujiineeda Yerusalemu?

¹⁸ Diibiga ghoamughuush ghweenga, nea ghaghwar ghweaniga beasta, nea gadeemga ghwadas dearanga jea gwasina mukaateeda gatmooda was sugoocheanda bea humng'eeda, ak goodalealsa aseecheeka suuk haleanjeeda sisabwa geadi was difaayi, ghang'udanaan nyarasta.

¹⁹ Gwayi NG'UTAMIIDA, ghamneawa iing'ulayi ghoanyareasan? Ghwanyareas geat saawa, ea ghang'uda geat deembeaneega?

²⁰ Asi gwayi NG'UTAMIIDA: ng'ula gaydahisa nyarasteanyu hiji, badayda buuneeda ea diyeanga, badayda geediga dareabeeta ea haghweega ng'eanyiida; hean gayghwayeat nea majeamu eenuus.”

²¹ Gwayi NG'UTAMIIDA bea lugweega, was ASEETA fuga Israeli: “Ooheasiina lukghumajeegeagwa badahuuka haleanjeedeang'wa sisabwa geadi, ama ng'ata ghoayaaji banyeega nyaawa.

²² Aba gideaba eaweeda ghayi earuuni saawa ng'eanyiida Misri, miideabalool ghweanigeagwa ghana daadaw diigheanda aba badayda haleanjeeda sisabwa geadi ea lukghumajeega.

²³ Nea diigheanda aadawji saawa ea nih, ‘Ooleeysiina iita ng'asheegeasu, ak abeeda gaydoaw ASEETEANG'WA, ak gajahuuwa agooga fugeasu; ak goobadiini jeeda naweadinga sean ghayi agoonyeegwa, ak abeeda gajanyasa giibinda.’

²⁴ Ak saawa ea masinneani mureeda nea mooleeysiinean iidiga nyaawa, ng'ata ghwaat naweadinga nyaawa ea girgweaguutka nyaawa, ea hang'oonyaka gurooruunatka nyaawa gwaneadi, ak hean gabiikta bwadaw.

²⁵ Gidang'eada eaweeda ghayi rinna ghweanigeagwa ng'eanyiida Misri ea ghoah ghamneawa, mii danung'waada giijeaknooda weajoodigeasu was sibanga eawoojiga sean;

²⁶ ak eara gwasa, saawa ea mooleeysiinean iidiga nyaawa nea maduupa gil, hean goohang'oonyi gheatkweaka nyaawa. Ak gwasin dea muy ea ghwanaawa ghweaniga nyaawa.

²⁷ “Ak gayrukusiina ng'asheesu seaniini, ak ea maygooleeysiineey iidiga nyaawa. Gayguuriisiina, ak ea mayghwasha ghuutaang'u.

²⁸ Ak gajeeshina saawa, ‘Nih eemeeda mooleeysiina iit NG'UTAMIIDA was ASEETA nyaawa, nea gwanya mureeda, nea ea ning'amwa jeenyaawa huumeanda; sigeandeawa ghuusiga nyaawa.

Sinaweega munyas aba jeeda moangoachiyda Hinomu

²⁹ Areaghwa iheengeagwa ak ghoaraghwachi; agutuuni heareega aba iheenga heayeeniga gajeami, aba gideaba NG'UTAMIIDA nisideegwa nea nijaktaneegwa seaygeeda oowooschi fuga anyareas niny.’

³⁰ Gwayi NG'UTAMIIDA, “Fuga Yuda nisin riing'eeda aba madeedeanyu; niyiin sanaamajeega jeeda gheeda siguuriideawa gheawungeasu, ghang'uda ririnnyeanda.

³¹ Nea nideas heeda wagiida bea Dofeti, mida jeeda moangoachiyda orjeeda Hinomu, was heeda jea gagwardeaysa orjooga nyaawa ea haweega nyaawa; Nea aniini ea mii daadaw siniteaba ng'asheanji, nea ea miighoan jeedeanyu.

³² Gwayi NG'UTAMIIDA, asi ng'ula gayghwahidu eawoojiga jea ea mudu gwayeena Dofeti, ghana moangoachiyda orjeeda Hinomu, gaygwayeena moangoachiyda miyeeda: aba gideaba gajeebung'sa buuneeda Dofeti, aba gideaba manda hich nuut.

³³ Nea muscheekeaba fiisu gayghoah daghwarda dariidaka humng'eeda, ea diyeanga jarooda; nea ea maygwanda siichea ghahoan.

³⁴ Ak gaydanung' goosha ghuusiga rearga ea hooseaneega aba jeeda mujiinajeega Yuda ea jeeda naweadinga Yerusalemu, ea hooseaneega sibeeda ea siida geeshi, aba gideaba ng'eanyiida gaydanung' ghoah raghoonyeanda.