YEREMIYA 6 - Bibliyeeda Ghaydit

Yerusalemu nighas weajoodiga

¹ Ea fuga Benjamini, amung'awa anyasa ghuhooda, ang'amwana bugusta Yerusalemu! Aghuuda durumbeati aba Dekowa, ak goosinyi gwadeagooda aba Bet-hakeremu; aba gideaba giishealda geedaahaan nea gwaleabu wiilooda ng'eanyiida ghayeawa, ea nyariida haw.

² Gaydabwar huda Sayuni miyeasat, nea gaba leanga miyas.

³ Gayghapka headaanyi jeagiischoodiga sea hawanyoojiga nyaawa; gayghamiinda maheemajeega nyaawa nea gooneaweesa niny, gaygaba siisi ahaaghwa aba hichpa geaw.

⁴ “Ang'eada ang'ucheewana niny; ang'eada eeshama askweari!” “Eeshageada, aba gideaba nimikta aseeta, aba gideaba jirooneeda shing'adeeda nigeawiit!”

⁵ “Eang'eatng'eada ak geeshamnyi eawa, ak geelalaksi ng'eanyi gealgaaschi!”

⁶ Gwayi NG'UTAMIIDA bea lugweega: “Abarsiina ng'eanyi geedigaaschi; ak gooneaweesi hilooga Yerusalemu. Nih mujiineeda miisa ghoorjooda gil, Jeadaanyi manda gil geaghus minighista ak ghwahit.

⁷ Aba gidadiwiida dabascheanda beega miyas, niny ghoamu goodiiw munyindaanyi; ng'ooweata ea nyariida geeyiing'sa headaanyi, nea geeyooda ea deaneaduutka gwanda madeedeanyu galeagasean.

⁸ Ea Yerusalemu, mwasa eamiin gheang'daang'u, amasa gaydajaktaneey; ea mwanung' huwa siida salgheang'da, ghana huwa raghoonyeanda.”

Heeheeweega fuga Israeli

⁹ Gwayi NG'UTAMIIDA bea lugweega: “Oomughuushta easanga fuga Israeli gidoomuguuriidi sabiibu; asiiga geatingaagu gicha jeeda damealgaaschi gawuurji siida aweami sabiibu.”

¹⁰ Gaydeabalool ng'eaha nea ghaamiinyi gheang'da, ak abeeda gooleeysean iita? Ng'ula iidiga nyaawa nitukweada, mayghoamu gwayiing'shi; Ng'ula ng'asheanda NG'UTAMIIDA aba heeda nyaawa niiw gida deangheeda, saawa mudu ghabwariiy.

¹¹ Aniini ghwanyiit jeedeanyu nyarasta NG'UTAMIIDA; naaraanyi daadeal. “Ahisiina diibiga mida jeeda naweadinga, ea jeeda gheareemanga niguuyeesa hijagi; nea siyeeda ea gatmooda gajeayaat, hean ak eara gweargwa woosi ea majeapuut.

¹² Gwayi NG'UTAMIIDA, Gealga nyaawa gajeataw fuga suurja, hean eara gadeemga nyaawa ea madameega nyaawa; aba gideaba gaydamiinda geatindeanyu deageal heeda fuga bea ng'eanyiida,”

¹³ “Gidang'eada dea mwanang' ea gagul dea haw, gaba nih gasa ghwanyas gida madoobiiwsiina; ak gidang'eada sibaneeda ea gagul ashoohoocheanda, gaba ng'uya sean.

¹⁴ Niihaap deaneaduutka fugeasu nea gwahinda gil mii gwasawana, nea gwayeena, ‘hoyyoo ea hoyyoo,’ nea ea manda hoyyoo.

¹⁵ Gwayi NG'UTAMIIDA, ii muchu nea gwasin saawa munyinda ghwanyas baspaseega? Manda, earahay; mwanala eara gichea ghabwasbwasta. Hean gaygoobeedeaysa badayda fuga niibeedeayi; damanda aayaagi ghoorjooda gajeehiing'sa ng'eanyi.”

Fuga Israeli ghwanung'waada naweeda ASEETA

¹⁶ Gwayi NG'UTAMIIDA, “Amiinaada aba bugusta naweeda, ak ghoang'weardi, ak ghoapwaardi naweadingeaba garayi, heeda mida naweadinga miyas, ak ghoaduupchi, ak gayghwanyas gurooruunatkeagwa fuufeanda. Nea saawa gwayi, ‘Aseasa majeeska jeeda.’

¹⁷ Ng'ata geanyakneegwa furiischoodiga, ak geayeenyi, ‘Oaleaydiit nyeashta durumbeati!’ Ak gwayi saawa, ‘Aseasa majeeleeysiina iita.’

¹⁸ Asi oaleaydiit, Ea eemoojiga, ak ghoanali, Ea buuneeda, gichea ghwahash saawa.

¹⁹ Aleaydiit, Ea ng'eanyiida; ng'ula gaydeadu nyariida badaydeaba fiisu, ghoah haghweega sinaweega nyaawa, aba gideaba miigooleeysiita ng'asheegeasu; nea nijakta eara diigheanyeekeasu.

²⁰ Gaygwarachi naaha hideeda ooyeani ng'eanyiida Sheba, ghana geediga ng'andidi leabu ng'eanyiida sheagi? Haleanjeadaang'u sisabwa geadi sigwariida majeamwas Eara lukghumajeagaagu meahoosanan

²¹ Asi nih gidarugu NG'UTAMIIDA: ‘Ng'ula, gaydawiilsa madeedeaba fiisu gida ruusa fih jea ghwaruus; nea gaygwaruusa ghweaniga ea diibiga, eara giischeewda ea fuga rooroochi gaygoosha.’”

Weajoodiga leabu wiilooda ng'eanyiida ghayeawa

²² Gwayi NG'UTAMIIDA, “Ng'ula gwanda fuga jea ghapka nea gwaleabu ng'eanyiida mida wiilooda ng'eanyiida ghayeawa, eemeeda haw uur goodiing'diing'da nea gwaleabu heeda sheagi.

²³ Nea ghwasar ghuweanga ea ng'utkeaka nyaawa, fuga ng'weani mandeawana baydeayda, nyeashta nyaawa gwanyeariida basooda; nea gwading'da faraasajeega nea nijipta geat siyagi aba ng'ucheeda, gang'ucheeweey, Ea huda Sayuni!”

²⁴ Siyiinyi iita nyaawa, ng'ata gang'arng'ariidi geatingaasa; niing'waanyeasa muuwda, niing'waanyeasa lajooda uurji dea gatmooda weesa jeata.

²⁵ Adiidu giriti una jeeda madamnyeanda, ghana weelweela aba naweadinga; aba gideaba weajoocheanda gwandeawa ng'uta, nea haloota gwanda meadajeega sean.

²⁶ Ea hudeaba fugeasu, akweala beareadanga, ak giyeashti deareeda; agutuuni heareega ng'weani awuurjeewana siida ayeawdi jeaptaanyi asagi, aba gideaba gayghwahidu weajoocheanda gwashameasa.

²⁷ “Naayiinyeeyi huwa siichea gwasawiisa nea giideeni fugeasu ak abeeda ginali nea gisawiisi naweadinga fugeasu.

²⁸ Saawa niiw fuga nisidiischi, inyeesa gwaneayi nea ghwaak badahukeaba suurja; gahang'oonyatida lagheanga ea gharinga, sinaweega nyaawa ea munyas.

²⁹ Beasta eara ghwayeat muuchi, gharinyeanda eara gahuuyda beasta; ak beasta eara gahuuyda gharinyeanda ea maygwarachi gil, mayghoamu ghwasach fuga munyas.

³⁰ Saawa geeguura lapiyeeda mudugwarachi gil, aba gideaba NG'UTAMIIDA nijakta saawa.”