YEREMIYA 52 - Bibliyeeda Ghaydit

Giibeedeayda Yerusalemu

¹ Sedekiya abeeda gaba gweanyeew diktam ea agi damanda ang'eada sugoocheanduumeeda; ak goombaliischi gweanyeew damanagi aba Yerusalemu. Nea gheawunga ghaamwat geeguura Hamutali was hudeaba Yeremiya ghayi abiita Libna.

² Ak gwasin ng'asheanda muy aba madeeda gheanyanga NG'UTAMIIDA, gawuurji ng'asheega sean ghayi sin Yehoyakimu.

³ Hean ghwanyareas muuchi NG'UTAMIIDA aba badayda fuga Yerusalemu ea Yuda bwak ea ghahoana saawa madeeda gheanyangaaschi. Ng'ata ghaheawa Sedekiya sugoocheanda Babeli.

⁴ Hean nea ghwahita gweaydeaba shageash bea sugoocheanduumeadaanyi, aba sheedeaba damanamughuush, ea eaweeteaba damanamughuush, bea sheedida ghwahidu Nebukadreesa was sugoocheanda Babeli sea shirikareadaanyi gang'uchi Yerusalemu, ak gwaneaweesiina meadajeega sean ak ghamiinda maheemajeega nyaawa.

⁵ Geang'waay mujiini ea ghwahita gweaydeaba damwanagi bea sugoocheanduumeeda Sedekiya.

⁶ Eaweeteaba shageash bea sheedeaba ang'wan abeeda gwanda jalooda ng'waan jeeda mujiini, ak ea manda hamita jea ghwaak buuneedeaba ng'eanyiita.

⁷ Ng'ata geasaaw ghamarda mujiini; ak gamng'aw headiga sean bea ng'ucheeda ak gwariteawa jeeda mujiini eawa nea gwasik dooshta mida dageascheeda ghamarda asiyeenya, neekeewa boostaaneeda sugoocheanda, nea fuga Galdayo gwaneaweesa mujiini. Nea abeeda saawa ghwaat naweeda gal Araba.

⁸ Iidu gaweay shirikareeda Galdayo ghwaat geeshta sugoocheanda, ak ghoang'waay Sedekiya aba moohajeega Yeriko; ak ghwadarda shirikareadaanyi sean ak gwanung'usa heeda niny.

⁹ Ng'ata ghoang'waay sugoocheanda, ak gweadu ea ghoahiidu heeda sugoocheanda Babeli mida Ribla mida ng'eanyiida Hamati, amang'ata goorgweaksa.

¹⁰ Ak ghabwar sugoocheanda Babeli orjooga Sedekiya aba madeeda gheanyangaaschi, ak ghabwar eara fuga sean hees bea Yuda aba Ribla.

¹¹ Ng'ata gwalootu gheanyanga Sedekiya, ak gwarada aba biingu, ak ghwaat sugoocheanda Babeli niny ng'eanyiida Babeli, ak ghwayiin ghealooniga bwak ea ghwahita eaweeda jea ghameawa.

Nyarjeawda gheeda sibata ASEETA

¹² Muchu aba sheedeaba muut eaweeteaba damanamughuush bea sheeda was gweaydeaba damashageash bea sugoocheanda siguura Nebukadreesa, was sugoocheanda Babeli gawa Nebusaradani was shirikarajeanda haw ahaaghwa gea fur sugoocheanda Babeli ea ghwahita Yerusalemu.

¹³ Ak ghaghwarda gheeda NG'UTAMIIDA, ea gheeda sugoocheanda ea gealga sean bea Yerusalemu; giliwas gheeda haw iissa ghang'uda beasta.

¹⁴ Ea shirikareeda sean bea Galdayo, was gea mideayi sea shirikarajeanda haw bea gea furiischi, ak gwanyarjeaweada ghamarda sean neaweesa Yerusalemu.

¹⁵ Ng'ata gageanu Nebusaradani was shirikarajeanda haweewa gea furiischi ak ghwaat fuga mwaatkwa bea ghealooniga barbari muuchi aba jeeda buuneeda sea fuga mwaatkwa siipuusa jeeda mujiini sea fuga heawa ng'asheega ghayi heawa sugoocheanda Babeli, sea fuga mwaatkwa bea gadiyeeda was gearnoodiga.

¹⁶ Iidu gageanu Nebusaradani was shirikarajeanda haweewa gea furiischi ghwanung'waada fuga barbari muuchi ghoah fuga jea gwasisin sabiibu nea ghabwar ng'eanyi.

¹⁷ Nea daranajeega lagheanga oomng'i mida jeeda gheeda NG'UTAMIIDA, ea daranajeega ea basooda oomu mida jeeda gheeda NG'UTAMIIDA, gwanyarjeaweada fuga Galdayo ea ghoah basanga, ak ghwaat lagheanga oomng'i ea ghoahiita Babeli.

¹⁸ Ng'ata ghwaat dahuundiga, ea ganakwajeega, ea makaasajeega, ea haragweaka, ea dabita sigwariideawa hideeda, ea dabita sean bea lagheanga oomng'i sigadiydooscheata aba jeeda gheeda sibata ASEETA;

¹⁹ eara gweerajeega manang'i, ea buurjeeka, ea haragweaka, ea dahuundiga, ea haleanjeeda siyiina gheaboonyanga, ea dabita geediga ng'andidi, ea gweerajeega difaayi. Nea haleanjeeda dahaabu ghwaat shirikarajeanda ahaaghwa gea furiischi ea dahaabu gil, ea haleanjeeda sisna lapiya, ea lapiya.

²⁰ Nea daranajeega asiyeenya, ea basoanagi, ea heew damaniyeenya bea lagheanga oomng'i mida uuta basooda, ea gidingeayoojiga gheaboonyanga, ghayi sin Sulemani was sugoocheanda sissa gheeda NG'UTAMIIDA, nea lagheanga oomng'i bea haleanjeeni seaniini ea mwoamu eeteen durumanataanyi.

²¹ Nea daranajeega, geawunda daraneeda asagi gaba geatin damasis, nea mughuushnataanyi gaba geatin damaniyeenya, nea baraknataanyi gaba moorin ang'wan, ak ea buruk.

²² Ak giliwas darana gwanda uhuuda lagheanga oomng'i, nea geawunda giliwas uhuuda gaba geatin samwagu ea gilimwanang'; ak geeneaweesa uhuuda suulga sisna gheareedanga goomamaanga, nea gaba sean lagheanga oomng'i, nea geeneawsa uhuumba giliwas daraneeda. Ak eara daraneedeaba iyeenya gwasunu, gaba goomamaanga.

²³ Abeeda gwanda murdajeega goomamaangaji seedam ea damwalah; nea goomamaangajeega sean ea bughala aba badayda gheareedanga sineaweesa meadajeega sean.

Fuga Yuda geayaat Babeli

²⁴ Ng'ata gageanu shirikarajeanda haw ahaaghwa gea furiischi ak gageanda Seraya was ashoohoocheanda haw, sea Sefaniya was ashoohoocheandeaba iyeenya sea furiischoodigiga asamwagu bea gidaghuudiin;

²⁵ ak gageanu aba mujiini siyagi haw ambal fuga ng'ucheeda, sea fih ispwa bea girgweageeda sugoocheanda, sinyasa jeeda mujiini, sea ng'oorshoocheanda shirikarajeanda haw ng'oar fuga mida ng'eanyiida; ea fih laadam bea gea jeeda ng'eanyiida, was gea sinyasa bugusta mujiini.

²⁶ Ak gageanu Nebusaradani was shirikarajeanda haw ahaaghwa gea furiischi ak gageanda ak ghwaat heeda sugoocheanda Babeli aba Ribla.

²⁷ Ng'ata gageanu sugoocheanda Babeli ak ghabwar ea gameewa aba Ribla aba jeeda ng'eanyiida Hamati. Nih gisiyaata Yuda soomjeanduumeeda gil ak geang'aamwa ng'eanyiidaanyi.

²⁸ Nih mooneeda fuga aat Nebusaradani soomjeanduumeeda aba gweaydeaba ispwa, fuga Yahudi sagalamnyooji samwagu ea diktam ea samwagu;

²⁹ nea aba gweaydeaba damasis bea Nebukadreesa ghwaat aba Yerusalemu fih bughalaji sis ea diktam ea damaniyeenya;

³⁰ ak aba gweaydeaba diktam ea samwagu bea Nebukadreesa, gageanu Nebusaradani was shirikarajeanda haweewa gea furiischi ak ghwaat aba Yahudi fih bughalaji ispwa ea haradam ea muut ghoah soomjooga; mooneedeaba fiisu seaniin ea sagalamnyooji ang'wan ea bughalaji lah.

³¹ Ak aba gweaydeaba diktam ea damanispwa bea giibaleakta Yehoyakini was sugoocheanda Yuda, aba sheedeaba damaniyeenya, eaweeteaba diktam ea muut bea sheeda, gageanu Efil-merodaki was sugoocheanda Babeli, aba gweayda madeeda huweewa sugoocheanda, hean ghabwayda Yehoyakini was sugoocheanda Yuda ak gooruuna ghealooniga;

³² Hean goobaloola ng'asheega miyaasiin ak ghwayiin hoorgeadaanyi iheenga hoorgajeega sugoodiga mideawa aba Babeli.

³³ Ng'ata ghafwakta Yehoyakini hang'weaka ghealooniga. Ak giliwas askwearja aba jeeda eaweagaaschi iissa gweagiischi galeaga sean aba measeeda sugoocheanda.

³⁴ Ak iissa daghwardaanyi bea galeaga sean ghoadaw sugoocheanda Babeli aba giteena gidagasa aba giliwas eaweecha, ea ghwahita eaweeda jea ghameawa aba gidayang'da eaweagaaschi.