YEREMIYA 51 - Bibliyeeda Ghaydit

Girgweageeda nuut bea Babeli

¹ Asi gwayi NG'UTAMIIDA: “Ng'ula, gaydeadu jeameeda nyariida badayda Babeli ea dea fuga abiita Galdayo;

² ak aniini gaydaat Babeli jeameeda jea gwanyarja ak gaygoobuus jeameeda niny, ak gaygoobuus ng'eanyiida ea ghoah raghoonyeanda; damanda jea ghapkaana gang'uchi sea niny aba meadajeega sean aba eaweeda sawanadeeda.

³ Adiidawi gheata fuga ratu ghuweanga, ghana gooshuup geat hang'weaka ng'ucheeda. Adibwaydi gheareemangaaschi; lasa uhuuda shirikareadaanyi sean.

⁴ Gaygoobeedeayi ak geabwar aba ng'eanyiida Galdayo, ak gajeesawan aba jeesinga naweadingaaschi.

⁵ Aba gideaba Israeli ea Yuda ea mii gwanung'usa heeda ASEETA nyaawa, was NG'UTAMIIDA bea lugweega; nea ng'eanyiida Galdayo ghwanyiit munyinda aba heeda dea Ghaydit Asagi bea Israeli.

⁶ “Amng'awa ariiteawana bugusta Babeli, daba siisi aghuuha eaweagaaschi! Adiidu gealas uhuudeang'wa aba ghoorjoadaanyi, aba gideaba nih damanda jea ghawaldaawa NG'UTAMIIDA mureandooda gil, ak gayghwalas aba giteaschi niny.

⁷ Babeli gikoombeeyda dahaabu gil aba geatinda NG'UTAMIIDA, nung' gaboogit ng'eanyiisean; ak ghwali eemoojiga difaayeadaanyi, ak aba sareani ghwanung' gang'ul eemoojiga geeska.

⁸ Babeli niibeadi ak gigiishachi nea mifurdani; ookuula aba badaydaanyi! Ayeani meajooda aba sawanadeadaanyi; gwadeepa ghahaap.

⁹ Gwachi geegasayi eahaabwa Babeli, ak ea mwahaabwa. Anung'usiina heeda, ak ghoanung' eeweaya gaba siisi weah ng'eang'da nyaawa; aba gideaba girgweageadaanyi nidiyeada ea ghwahita humng'eeda ak ea siitiing'da ea ghwahita dea daliil.

¹⁰ NG'UTAMIIDA niyeadu gitoobiiwseasa; apkaani, eerukwiida aba Sayuni gadiyoojiga NG'UTAMIIDA was ASEETEANYA.

¹¹ “Ashida geatka! Ageani igeambooniga! NG'UTAMIIDA nisat gurooruunatka sugoodiga Meedi, aba gideaba niny gidabada aba badayda Babeli nyarjeawda gil, aba gideaba nih mureandooda NG'UTAMIIDA, was mureandooda ghooriidaanyi sibata niny.

¹² Amiinda beendeerajeanda aba iheenga ghamarda Babeli; ak goomajeekchi furiischooda; ageani furiischoodiga; ak googeanu fuga jea gwasham; aba gideaba NG'UTAMIIDA nibada ak gwasim gidarugu aba badayda fuga abiita Babeli.

¹³ Ea orjeeda siida abiita ghuuta beega saang'a, ak guwoosi baruur aba haleanjeeda iidiiwi, nihidu muudeanoadaang'u, fuweanda eaweagaagu silach.

¹⁴ NG'UTAMIIDA bea lugweega niyeaksa geaw habeawooda: Aba huumwa gaydaanyiinyi buuneeda saang'a deena deashamga, ak gaygwargu nyeashta haw bea joordeang'wa.

Duumda Giigheambiita ASEETA

¹⁵ “ASEETA dea bwat ng'eanyiida gil aba uurdaanyi, was dea sin ng'eanyiida aba weaghuumeadaanyi, ea aba fughareadaanyi nea ghoadoabiiw humng'eeda.

¹⁶ Asi iinya daghataanyi gwasim geat beega aba humng'eeda, ak gwasin dung'usta siyeeng'na muudeanooda ng'eanyiida. Ak gwasin dadamandeeda roopta, nea ghwanung' ghwahidu jeameeda leabu ghoorajeega siitiiwiisa.

¹⁷ Giliwas sih nidashaahiit ak ea manda fughareeda; nea giliwas gidang'oocheanda dahaabu ea ninung' sanaamajeagaaschi ghabwaspwas; aba gideaba haleanjeadaanyi bada gaba ng'uyeega, ak ea manda jeesinga nyaawa jeameeda.

¹⁸ Marachi gil, reengaweega gil ak ghwahit; damanda jea ealasa eara saawa gajealas uhuuda.

¹⁹ ASEETA Yakobo mawuurji saawa, niny dea sin haleanjeeda sean, nea Israeli ea eemeeda was hearaniischoadaanyi; NG'UTAMIIDA bea lugweega gheawungaaschi.

Gulupta NG'UTAMIIDA

²⁰ Gwayi NG'UTAMIIDA, “Babeli guwoosi gulupteanyu ea dabiteanyu bea ng'ucheeda: iisindeayi sea ang'iing'i gaydanyarjeaweada eemoojiga ea gwalasa heayeeniga agi; iisindeayi sea ang'iing'i gaydalas uhuuda darooraka,

²¹ nea aba ang'iing'i gaydabwaashaada faraasi sea siida ding'da badayda; nea aba ang'iing'i gaydanyarjeaweada mutuku ea ghoah basanga sea siida mida jeeda;

²² nea aba ang'iing'i gaydabwaashaada ng'eedeeda ea gatmooda, nea aba ang'iing'i gaydabwaashaada gweargweeda waas ea gheareemaneeda; nea aba ang'iing'i gaydahirjeaweada gheareemaneeda ea huda;

²³ nea aba ang'iing'i gaydahirjeaweada jeagiischoocheanda ea gisilgaaschi; nea aba ang'iing'i gaydahirjeaweada sugoodiga hees sea shirikareeda hees.

Ghoorjooda Babeli

²⁴ “Ak gaydaadaw Babeli ea fuga sean bea Galdayo nea goong'ulayi agooga aba gheanyangeagwa aba badayda munyasnacheeka sean ghayi sin aba Sayuni, gwarugu NG'UTAMIIDA.

²⁵ “Ng'ula, aniini geesheang'nyi sea ang'iing'i ea giijeeda muy, gwarugu NG'UTAMIIDA giijeeda datas ng'eanyiisean; gaydaadoabiiw geatindeanyu damiinaneey, ak geang'adeaseey ng'eanyi aba jeesinga lagheanga, ak geasinyeey giijeeda sighwarda.

²⁶ Ak ea manda lagheaneanagi jea eegeandeawaneey jea ghoah dea washiini nea ghoah lagheaneanagi dea sindeeta, ak ang'iing'i gayhuuwa raghoonyeanda galeaga sean, gwarugu NG'UTAMIIDA.

²⁷ “Amiinda beendeerajeanda aba badayda ng'eanyiida, aghuuda durumbeati aba bugusta eemoojiga; asisiina eemoojiga jea gang'uchi niny, aguursiina sugoodiga jea gang'uchi sea niny, sugoodiga Ararati, ea Mini, ea Ashkenasi; iina madeadaanyi shirikareeda hees jea gang'uchi niny, ayeani faraasajeega deena dayeega deashamga.

²⁸ Asisiina eemoojiga gaweay gang'uchi niny, sugoodiga Meedi, sea sugoodiga ea fuga hees, sea giliwas daroar mida jeeda gheambalmeeda nyaawa.

²⁹ Ak ng'eanyiida ghaboadan nea ghoaniikgh aba sawanadeeda, aba gideaba gidabada NG'UTAMIIDA aba badayda Babeli gudugwanda heeda, gideaba gayghwanung' ghoah ng'eanyiida Babeli raghoonyeanda, nea manda fuga abiida jeeda.

³⁰ Gheareemanga ng'ucheeda bea Babeli ninung'waada ng'ucheeda, niibiitbiit aba heeda abiita; ak ea niisheala uurjeenga, ak ea niwuurji gadeemga; nea heeda abiita ea niyaak beasta, ak ea nigiishachi gidaghuudajeagaaschi bea gharinga.

³¹ Siyagi fwach ghafwach gwaroonyi nuut, nea gawa siida siicheakta gwaroonyi nuut, ak gwayeesha sugoocheanda Babeli gideaba mujiineadaanyi siing'waay aba meadajeega sean;

³² nea neaneachajeega siing'waay, nea sharahiida ea sing'uda beasta, ak shirikara ea ning'ut muuwda.

³³ Asi gwayi NG'UTAMIIDA bea lugweega, was ASEETA Israeli: Babeli gawuurji bugharjeanda silakiisa booga iihita damanda sisisina; ak ghwashoada gheadi nuwaas ak gayghwahidu damanda lajita.”

³⁴ “Nebukadreesa was sugoocheanda Babeli niyaagan, ak ghang'aalan, ak ea ninung' doaw dabicheanda was moongeanda, ak ghwanukghutaaydanaan ichibooda; ak ghoanyiit jeadaanyi aba haleanjeedeanyu miyaas, ak ea nijaktaneani.”

³⁵ Ghabasta sisimaneani aniini ea buweadeegeasu gagasa gaweesa Babeli,” ak gagasa gwayi fuga abiita Sayuni gideaba, “Foojeandeanyu gagasa gaweay badahuuka fuga abiita Galdayo,” ak gagasa gwayi Yerusalemu.

NG'UTAMIIDA gayghaweat Israeli

³⁶ Asi gwayi NG'UTAMIIDA: “Ng'ula, aniini gaydaweadeagwa ak ghaawaldi mureandooda aba badahuukeagwa. Ak gaydanung' ghaghajaamiit basoadaanyi nea ghaanung' ghwajaam healatkaaschi.

³⁷ Ak Babeli gayghoah raghwata eemeeda, nea ghoah giibinda fureayoonga, gayghoah gida jea ghwashikgh fih nea geeshka, nea manda siida jea goobiida jeeda.

³⁸ “Gayghoamuumda duwaawi ng'anyeeka; ak gayghoahaawdaayda dayeega ng'anyeeka.

³⁹ Iibearji dooghooda gaydasissa saawa ghweelmeeda ak ghaanung' gaboogit saawa, bwak ea gwareang'useadayi ak gwalil ruweanga mamuudeana ak ea mwang'eatng'eada, gwarugu NG'UTAMIIDA.

⁴⁰ Gaydearareang'deayda saawa gisilga jea eenuuseada gawuurji lagweendiga ea ghwarayga.

Gichea gabussa Babeli

⁴¹ “Gawuurjiin gisiyaata Babeli ak goosha duumsheesiinda ng'eanyiisean! Gidahuuwda Babeli raghoonyeanda aba bugusta eemoojiga!

⁴² Basooda nigulsa badayda Babeli; ak ea nidukuta seang'ayda laweajajeagaaschi.

⁴³ Nea mujiinajeagaaschi ea niiw raghoonyeanda, ak ea ng'eanyiida ghajaam gil was eeshtearajeanda, ng'eanyiida meabiiteena jeeda sih, ak ea manda siida jea gwasik jeeda.

⁴⁴ Ak gaydalas Beli aba Babeli, ak geageandeawi jeeda ghuutaanyi gida mida Ak ea maygudu gabiikta gaweesa eemeeda niny; ghamarda Babeli niibeada.

⁴⁵ “Ariteawana jeeda fugeasu! Daba siisi aghuuha eaweagaaschi aba nyarasta ng'waan bea NG'UTAMIIDA!

⁴⁶ Asi adagamis gurooruunatkeagwa, ak ea adaghang'udeagwa muuwda aba iita jea eayiiy aba jeeda ng'eanyiida, iihidu iita aba gwanyagi iidu ghwahidu iita gweayda niirja, nea gwanda jaliida jeeda ng'eanyiida, ak gang'uchi sugoocheanda sea sugoocheanda.

⁴⁷ “Asi, ng'ula, ghwahidu askwearjoojiga jea dalas sanaamajeega Babeli; ng'eanyiidaanyi sean gajeanung' ghabwaspwas buuneadaanyi sean gajeabarsa jeeda.

⁴⁸ Abeeda humng'eeda ea ng'eanyiida, sea haleanjeeda mida jeeda, gaygwasarman aba hooseaneega aba badayda Babeli; aba gideaba gayghapka fuga jea ghwalas uhuuda gang'uchi saawa jea gwaleabu wiilooda ng'eanyiida ghayeawa, gwarugu NG'UTAMIIDA.

⁴⁹ Babeli gajeabwaay aba bayiiga Israeli, gawuurji gida abeadaayda Babeli aba bayiiga muunda ng'eanyiisean.

Giijasta ASEETA weah heeda Israeli aba Babeli

⁵⁰ “Agoogeeda oomng'awi ghuuta ng'uta, ang'eatng'eada, ak ea adoamiinaadi! Oapkaada NG'UTAMIIDA eara awoosa sheagi, ak ghoapkaachi eara mujiineeda Yerusalemu aba fughareengeagwa:

⁵¹ ‘Aseasa siipwaaspwaaseasa; aba gideaba siyiinyi ng'asheega munyas; gheamamuunatkaasa nidukuta nyigooda, aba gideaba nihidu rabasta jeeda ng'eanyiida ghaydit bea gheeda NG'UTAMIIDA.’

⁵² “Asi, ng'ula, gayghwahidu askwearjoojiga, gwarugu NG'UTAMIIDA, jea dalas sanaamajeegeagwa, nea jeeda ng'eanyiidaanyi sean ghoaniin fuga shuweahuutka.

⁵³ Babeli eara diyeada ea hita humng'eeda, ak gideasi gheeda majeek aba hoowa, gayghwaana heedeanyu dea jea ghabwar niny, gwarugu NG'UTAMIIDA.

Nyariida nuut bea Babeli

⁵⁴ “Giiguuleanda! Shookcheanda leabu Babeli! Nyeashta nyariida haw gwaleabu ng'eanyiida Galdayo!

⁵⁵ Aba gideaba NG'UTAMIIDA gagasa gwanyarja Babeli, ak ghwanung' ghwasiinda nyeashtaanyi haw. Nea laweajajeagaaschi ghwanyaashta daghata beega saang'a, ak nyeashta daghanuunatka nyaawa goojuur;

⁵⁶ aba gideaba nihidu headaanyi dea jea ghwalas uhuudaanyi, badayda Babeli; gheareemangaaschi siing'waay, ghuweanga nyaawa sihirjeaweada ea ghoah basanga; aba gideaba NG'UTAMIIDA niny ASEETA mureandooda aba huumwa niny gayghawalda.

⁵⁷ Ak gaydanung' gaboogit fugaaschi hees ea fugaaschi weaghoodi, ea sugoodigaaschi hees, ea shirikareadaanyi hees, ea gheareemangaaschi bea ng'ucheeda; ak gaygwalil ruweanga maygamuudean ak ea mayghang'eat, gwarugu Sugoocheanda, nea gheawungaaschi ea NG'UTAMIIDA bea lugweega.

⁵⁸ “Asi gwayi NG'UTAMIIDA bea lugweega: Ghamarda haw bea Babeli gajeabwaay gawa ng'eanyi nea gidaghuudajeagaaschi geawi gajeaghwarda aba beasta. Ak buuneeda gagadiiy mwadaagha, nea goobuur geat eemoojiga aba gideaba huuydeanda nyaawa beasta.”

Giijasta Yeremiya geayaat Babeli

⁵⁹ Ng'asheanda Yeremiya was sibaneeda rukusa Seraya was orjeeda Neriya, orjeeda Maaseya, damanda adeayeewa Sedekiya was sugoocheanda Yuda ea ghwahita Babeli, aba gweaydeaba ang'wan bea sugoocheanduumeadaanyi. Nea abeeda Seraya ea siida haw ahaaghwa gheeda sugoocheanda.

⁶⁰ Ng'ata gang'oorsa Yeremiya jeeda gitaabu ng'asheega sean munyas jea ghwahidu badayda Babeli, ng'asheesu sean sing'waariin gaba badayda Babeli.

⁶¹ Hean gwayeesha Yeremiya Seraya: “Damanda jea wunana Babeli, sikteawana gideaba giisoami ng'asheesu seaniin,

⁶² ak giyeeni ‘Ea NG'UTAMIIDA, ang'iing'i girgu aba badaydeaba ng'eanyiini gideaba gaynyarja, ak ea manda gichea goobiida jeeda, adea siida gil ghana ea diyeayda, ak gayghoah raghoonyeanda damanda manda muudeanooda.’

⁶³ Ak iihiidi giisoomandeaba gitaaboani, girasi badayda lagheaneeda, ak gijaksi bugusta eenda Furati,

⁶⁴ nea giyeeni, ‘Nih gichea ghwaakta Babeli eenda gil, ak ea maygudu gabiikta gwascheeng'u, aba badayda ng'asheega munyas jea deadu badaydaanyi’.” Ng'asheega Yeremiya gaweay ea ghwahita hiji.