YEREMIYA 50 - Bibliyeeda Ghaydit

Giing'ooyda Babeli

¹ Nih ng'asheanda rugu NG'UTAMIIDA gil aba badayda Babeli, aba iita ng'eanyiida eemeeda Galdayo, aba ghuuta Yeremiya was sibaneeda:

² “Arukwiida aba bugusta eemoojiga nea ghoapwaashchi iit, amiinda beendeerajeanda nea goorukwiidi, adoafunyi, nea gooyeenyi: ‘Babeli sigeanda, Beli sinung' ghabwaspwas, Merodaki ning'ut muuwda. Sanaamajeagaaschi sinung' ghabwaspwas, haleanjeadaanyi bada siipwaaspwaas.'

³ “Aba gideaba ghang'eada wiilooda ng'eanyiida ghayeawa eemeeda jea gang'uchi sea niny, ak gayghwanung' ghoah ng'eanyiidaanyi raghoonyeanda, ak ea maygwanda siida jea goobiida jeeda; siida ghana diyeayda, gaygamng'aw sean ea gwasheagiidi.

Biiknooda Israeli

⁴ “Ak aba askwearjoojigiga ea aba damandida, gwarugu NG'UTAMIIDA, fuga Israeli sea fuga Yuda gayghabwat geat, ak gooyeawdean nea ghapka; ak gaygagasa NG'UTAMIIDA was ASEETA nyaawa.

⁵ Ak gaygoobeariida naweeda gal Sayuni, nea googeal iheenga nyaawa heeda mida, nea gwayi, ‘Apkaani eekuuyeewana geat NG'UTAMIIDA aba neajeeda manda muudeanooda maygwaroosa fih.’

⁶ “Buuneedeanyu niiw gisilga saawa googeal iheenga giijeega; ak ghabeawa giijeeda ea ghwahita heayeeda, ak ea niroosa hilgweanda nyaawa fuufa.

⁷ Nea fuga sean nyas saawa ghwaak, nea gwayi weajoodiga nyaawa, ‘Aseasa mandaneasa giidiinyeanda, aba gideaba nisin riing'eeda aba badayda NG'UTAMIIDA, was giibinda nyaawa bea huumwa, NG'UTAMIIDA, was dea ghus ghweaniga nyaawa.’

⁸ “Amng'awa ariiteawana bugusta Babeli, ak gooriteawi ng'eanyiida fuga Galdayo, ak goowuurjeewi ghwarayga mida madeeda nooga.

⁹ Aba gideaba ng'ula, gaydasadu eemoojiga saang'a jea gwaleabu ng'eanyiida mida wiilooda ng'eanyiida ghayeawa ghapka gang'uchi Babeli; ak gaygwajip geat aba madeadaanyi. Hean ghang'eada hoowa gajeayaat; Geatka nyaawa gawuurji siida nal fuwean maygabiigu nea ghaghus geatinga.

¹⁰ Ak ng'eanyiida Galdayo majeepuusa gil; nea fuga sean geanda haleanjeeda gaygwalang'u, gwarugu NG'UTAMIIDA.

Giibeedeayda Babeli

¹¹ “Earapeadi ihoosaniin, earapeadi ing'weelayiin, Ea fuga geanda hearaniischoodeanyu, goodeambiiriidi haghweanda datas booga, nea agooga gooyeawdeaydi faraaseeda mideawa uurda,

¹² geamadu gayghahamng'eanyi muuchi, nea dea jiilneegwa gajeapwaaspwaas. Ng'ula gayghoah geeshteaba nuut aba jeeda eemoojiga sean, gayghoah dareapcheeda ghajaam ea eeshtearajeanda.

¹³ Aba badayda nyarasta NG'UTAMIIDA manda siida jea goobiida, gayghoah raghoonyeanda ak ghwahit; nea giliwas sih nyooh gwasin murdeeda Babeli gayghahamng'eanyi, ak gajeeshka aba deaneaduutkaaschi sean.

¹⁴ Ajiba geat aba badayda Babeli nea gooneaweesiini meadajeega sean, oogasean ooratu ghuweangean; afta niny, adoapuuchi eara geacheanagi, aba gideaba nisin riing'eeda aba badayda NG'UTAMIIDA.

¹⁵ Ang'eatng'eada ak goochuursi niny aba meadajeega sean, aba gideaba nibur; gealgaaschi niibeedeayi, ghamardaanyi sinyarjeaweada. Aba gideaba nih mureandooda NG'UTAMIIDA gil; awalda mureandooda, asimana niny gidasimaneegwa.

¹⁶ Oakghuumwa buuneeda ea mahisana booga Babeli, ea siida ang'waay barda damanda lajita booga; aba badayda ng'uta siida sawani buuneeda, ak gaygaba siisi yamsa geaw fugaaschi, nea gaba siisi mang'awsa ng'eanyiidaanyi.

Israeli gabiigu

¹⁷ “Israeli gisilleanda hoona ng'anyeeka ea gwasheagiidi. Aba madeeda sugoocheanda Ashuru gil dea ak niny, ak ghamneawa aba huuydeanda ea Nebukadreesa gil was sugoocheanda Babeli was dea hirjeaweada geakaaschi.

¹⁸ Asi gwayi NG'UTAMIIDA bea lugweega, was ASEETA Israeli: Ng'ula, gaydalas sugoocheanda Babeli ea ng'eanyiidaanyi, gawuurji gidaghayi aalasti sugoocheanda Ashuru.

¹⁹ Ak gaydeadeelsa Israeli ng'eanyiida nyaawa, ak gayghwaak booga jea ghwaheas uhuuda giijeega Garmeli ea Bashani, ak gaygwalang'u aba uhuuda heayeeniga Efraimu ea Gileyadi.

²⁰ Aba askwearjoojigiga ea aba damandida, gwarugu NG'UTAMIIDA, munyinda gajeegeanda aba jeeda ng'eanyiida Israeli, ak ea maygwanda, ghana riing'eeda aba ng'eanyiida Yuda, ak ea mwajeanyas earahay, aba gideaba aniini gaydasamsa fugiga ghayi aabuuchi ghoah boosteangean.

Girgweageeda ASEETA aba badayda Babeli

²¹ “Ascheang'da aweayeena ng'eanyiida Merataimu ang'ucheewana, ak goong'ucheewi fuga abiita Bekodi. Abwara ak ghoalaschi uhuuda fugaaschi, gwarugu NG'UTAMIIDA, ak goosinyi ng'asheega sean earukuneegwa.

²² Ghuuta ng'ucheeda gwanda jeeda ng'eanyiida, ea nyariida haw!

²³ Iijea ghwanyar mujiineeda was lagheaneeda ng'eanyiida ea eabwaay gawa ng'eanyi! Ghoawaataan Babeli raghoonyeanda aba bugusta eemoojiga!

²⁴ Neasineey ghaseeda ak gajeayaanyi Babeli ak ea minali; geenyasnyi ak geang'waanyi, aba gideaba ging'ucheewi NG'UTAMIIDA.

²⁵ NG'UTAMIIDA nijaat ghooriidaanyi bea dabita ng'ucheeda, ak gooruudu jarooda dabita ng'ucheeda bea nyarastaanyi, aba gideaba NG'UTAMIIDA was ASEETA bea lugweega gwandeawa gadiyeeda jea gwasin aba jeeda ng'eanyiida Galdayo.

²⁶ Apkaani ang'ucheewana aba meadajeega sean; oopiseada gijigoongaaschi; oomughuushta niny mughuusheanda booga, ak ghoalaschi uhuudeaba ng'eanyiini; adiidu goopuusi eara gil.

²⁷ Anuuseada heewgaaschi sean, anung'waada gwararang'eesa heeda jea eenuukiisa. Saawa dashageada, aba gideaba eaweeda nyaawa nihidu, was eaweeda jea ealasa.

²⁸ “Aleaydiit! Mang'aweanyeeka ea gea salda aba ng'eanyiida Babeli ghapka gwarukwiida aba hoowa bea Sayuniin mureandooda NG'UTAMIIDA was ASEETEANYA, was mureandooda gheeda sibata ASEETA.

²⁹ “Aguursiina fuga jakiida geatka ang'ucheewana Babeli ayaada buuneesean nal gwaradu ghuweang'da. Aneaweesiina mujiini; adaghawapta eara siyagi. Awalda mureandooda aba giteena giidiinyeanyeekaaschi; asimana gidasima buuneeda suurja aba gideaba nisin ghwarjeeda aba badayda NG'UTAMIIDA, was dea asagi Ghaydit bea Israeli.

³⁰ Ak aba nih gheareemangaaschi gaygoobeedeayi aba naweadingaaschi hees, sea fugaaschi bea ng'ucheeda sean gajealas uhuuda eaweedida, gwarugu NG'UTAMIIDA.

³¹ “Ng'ula, aniini gaydang'ucheeweey, Ea orjeeda siida ghwarjeeda, gwarugu NG'UTAMIIDA was ASEETA bea lugweega; aba gideaba nihidu eaweadaang'u, damanda jea dalasaneey.

³² Siida ghwarjeeda gajeeruusa ak ghoabeada, ak ea manda siida jea gagatkat, ak aniini gaydanung' ghwayeat beasta aba jeeda mujiinajeagaaschi, ak gayghwalas uhuuda haleanjeeda sean neaweesa niny.

³³ “Asi gwayi NG'UTAMIIDA bea lugweega: Fuga Israeli sisawan, sea fuga Yuda sisawanuudayi sea saawa; nea fuga ghayi ang'waay saawa ea niing'waay muuchi, ak ghaheawa gwasiksa gaweay.

³⁴ Lealnoocheanda nyaawa ea majeek; NG'UTAMIIDA bea lugweega gheawungaaschi. NG'UTAMIIDA bea lugweega. Niny gayghaweadeagwa muuchi ak abeeda ghwanung' gamnyeeni ng'eanyiida nea goodeawiit fuga abiita Babeli.

³⁵ “Ng'uta gwanda badayda fuga Galdayo, gwarugu NG'UTAMIIDA, ea badahuuka fuga abiita Babeli, ea badahuuka fugaaschi hees ea fugaaschi weaghoodi!

³⁶ Ng'uta gwanda badahuuka fuga bara lagheanga, ak abeeda gwadasheahiidi! Ng'uta gwanda badahuuka fugaaschi bea ng'ucheeda, ak abeeda gealas uhuuda!

³⁷ Ng'uta gwanda badahuuka faraasajeagaaschi ea badahuuka mutukwajeagaaschi, ea badahuuka lugweega sean bea eemoojiga mida bugusta nyaawa, ak ghang'ut muuwda gawuurji gadeemga! Ak gwanda nyariida badahuuka gijigoongaaschi sean, ak abeeda geegeanda!

³⁸ Ak ghwajaam beagaaschi, ak gajeekghaaw! Aba gideaba ng'eanyiida sanaamajeega, ak gang'ul geeska aba badahuuka sanaamajeega.

³⁹ “Asi gaygwandeayi diyeanga jarooda sea habiyoojiga Babeli, nea gwandeayi sea shageergweega; ak ea maygoobiida buuneeda earahay, ak ea maygoobiida buuneeda aba seaygoojiga sean.

⁴⁰ Gawuurji damanda ghayi ng'uta ASEETA Sodoma ea Gomora ea mujiinajeega neekeewa, gwarugu NG'UTAMIIDA, asi manda siida jea goobiida hoowa, ak ea manda siida was rabascheanda jea goobiida jeeda.

⁴¹ “Ng'ula, buuneeda ghapka nea gwaleabu wiilooda ng'eanyiida ghayeawa; eemeeda mideawa uurda ea sugoodiga saang'a nea gwaleabu muudeanooda ng'eanyiida sheagi.

⁴² Ak ghoang'waay ghuweanga nyaawa ea ng'utkeaka; fuga ng'weani gil, ak ea mabayiida buuneeda. Nyeashta nyaawa gawuurji dea basooda; ak gwading'da faraasajeega, ak gwajipta geat fuga ng'ucheeda aba badaydaang'u, Ea hudeaba Babeli!

⁴³ “Ak ghwayiiy sugoocheanda Babeli iita nyaawa, ak goosha uurda geatingaaschi; ak ghwanyas sawanadeeda ea ng'weaniidooda, uurji dea gatmooda bearji lajooda.

⁴⁴ “Ng'ula, gawuurji ng'adiida leabu jeeda dareabeeta Yordani ak ghoabita jeeda hilgweanda gisilga, ak ghwanyas haghweeda miy ak gaydahoan gwanung'usa heeda; ak gaydanung' gwaheedu dea aaloachi. Aba gideaba gawuurjeewean ng'eaha? Ak gaygaguurnean ng'eaha? Ak jeagiischoocheanda jea ghamiinaada aba madeedeanyu aneeda?

⁴⁵ Asi iinya gidabada NG'UTAMIIDA aba badayda Babeli, ea gidabada aba badayda ng'eanyiida Galdayo: Aba huumwa gaygoongiir dayeega manang'i bea nooga nyaawa; aba huumwa haghweeda nyaawa gayghahamng'eanyi aba badahuuka nyaawa.

⁴⁶ Nea aba nyeashta giing'ooyda Babeli gwasim geaw ng'eanyiida, ak shookcheandaanyi geayiiy aba jeeda eemoojiga.”