Biblia Todo Logo
Bìoball air-loidhne

- Sanasan -

YEREMIYA 5 - Bibliyeeda Ghaydit


Riing'eeda Yerusalemu

1 Asalda nea gooweayi mwadi ea bwadaw aba jeeda naweadinga sean bea Yerusalemu, oang'wearda nea gooshageachi, Agasa aba jeeda bugharjeandaanyi ak ghoadayi ea jea adaaha siyagi sina doobiiwnata nea gagaseadayi huumeanda; ak abeeda gaydabwayda.

2 Eara gwayeena, “Aba gidabiideata NG'UTAMIIDA,” gudu gweaga habeawajeega ng'uyeega.

3 Ea NG'UTAMIIDA, neada gheanyangaagu ea mang'ula huumeanda? Ang'iing'i nihuuydi saawa ak ea masamsiina; ang'iing'i nihuteawayi, ak ghaheawa gwaduukuuna. Niihang'oonyi gurooruunatka nyaawa ea ghwanaawa lagheanga; nea ea niheawa gwaduukuuna.

4 Hean geayeenyi, “Suh fuga barbari gil, nea ea mandeawana fughareenga; saawa mwanala naweeda NG'UTAMIIDA, ea digheanyeeka ASEETA nyaawa.”

5 Gaydaweesa fuga hees, ak geabaloolji; aba gideaba saawa ghwanal naweeda NG'UTAMIIDA, ea digheanyeeka ASEETA nyaawa.” Nea gawuurji sean aba gideaba nihirja machookajeega nyaawa, ak gang'acheawi ghealooniga nyaawa.

6 Asi gaygwarina ng'adiida jeeda dareabeeta ak gayghwanaw saawa, nea gaygwarina jeeda eeshtearajeanda fureayoonga ak gaygahuuyda saawa. Nea marirda ghwaak shageata aba badayda mujiinajeega nyaawa, siisi nyooh gwariteawa jeeda gajeanung' ghoah basanga; aba gideaba ramaseanyeeka nyaawa aasaang'a, nea yamiteaba geat ea haw.

7 “Gaydasamsiindaneagwaan? Diibigaagu ninung'wanaan heeda, nea ea niyaak habeawooda aba gheawunga fuga mandeawana aseecheeka. Hean ghaang'aati ea gwalang'u hean ghang'eat gwahiseada ak gooweameesa gealga gadeemga hiseada.

8 Siing'aata, muuchi ak gawuurji jiirgwa faraasajeega, gaba nih gasa gatmooda giischeewoocheandaanyi.

9 Heapi maydaaga ghoorjooda aba ng'asheesu seaniin? Ng'asheanji gwarugu NG'UTAMIIDA; nea ea maydawalda aba badayda eemeeda uurji suh?

10 “Adiyeada nea goosiikchi jeeda madamnyeandaanyi bea sabiibu ak ghoadataschi, nea adiidu goohuydi goosha; alajaada damealgaaschi, aba gideaba maba NG'UTAMIIDA.

11 Aba gideaba gheeh Israeli ea gheeh Yuda mudea doobiiweadi aba heedeanyu, ng'asheanji gwarugu NG'UTAMIIDA.


NG'UTAMIIDA nijakta fuga Israeli

12 Nirugu ng'uyeega aba badayda NG'UTAMIIDA, nea gwayeena, ‘Niny manda gichea gwasin; manda riing'eeda jea ghoan heedeanya, nea ea mayghwaageasa geejeeda.

13 Sibanga gayghoah jeameeda; manda ng'asheanda jeeda nyaawa. Nih gayghoah gichea eesima saawa!’”

14 Ak ghamneawa gwayi NG'UTAMIIDA, was ASEETA bea lugweega: “Aba gideaba nibaloola ng'asheanji, ng'ula gaydanung' ghoah beasta ng'asheega aayiinyi ghuutaang'u, ak ghoah fiisu ghweenga, ak gaygwaduulu saawa beasta.

15 Geayeenyi aniini NG'UTAMIIDA, ea gheeh Israeli, ng'ula gaydeajeagu eemeanagi leabu heeda sheagi. Eemeeda hees uurjeen, nea eemeeni gaba garayi, eemeeda moayiinyi iita nyaawa, nea majoamuusa anala gidabaloola.

16 Nea roogheaka nyaawa gawuurji bung'eeda abwaraghuut, saawa ea daruusi.

17 Gayghwaak boogeagwa ea hamiteang'wa; nea gaygahuuyda orjoogeagwa ea haweegeagwa; ak gwaduulu hawanyoojigeagwa bea dugwa ea nooga; nea gayghwaak sabiiboodeang'wa ea shaboogheeteang'wa; nea mujinajeegeagwa bea hilooga geawi oomng'awsi gayghoadaarda aba ng'utkeaka nyaawa.”

18 “Gwayi NG'UTAMIIDA, eara aba eawoojigiga, maydahuydaneegwa ea aduuleana.

19 Aba inyas gaygwayi fugaagu, ‘Ghwasaan NG'UTAMIIDA was ASEETEANYA gwasimaneasa ng'asheesu?’ abeeda gajeeshina saawa, ‘aba gidoonung'sindaneani heeda ak googadiyeesi aseecheeka eemoojiga aba ng'eanyiideang'wa, eara agooga gajagadiyeesina rabasta aba jeeda ng'eanyiida mii deang'wa.’”


ASEETA ghamiin gheang'da fugaaschi

20 Adayda iiteaba ng'asheanji aba gheeh Yakobo, rukwiida aba Yuda:

21 “Oaleaydiit ea fuga dasheahi nea manda fughareenga, fuga mideawa gheanyanga, nea mwadaaha gil, mideawa iidiga, nea mayiing'shi.

22 Gwayi NG'UTAMIIDA, Agooga moawali gheanyangeasu? agooga moabwaadani aba madeedeanyu? Ghaayiinyi iseaskweanda ghoah moonghooda basooda, Hilgweanda jea ghwaraay basooda ghwanaawa; Eara ghwalas laweajajeega, mayghoamu ghwanaawa, eara goojuur laweajajeega mayghoamu ghwanaawa.

23 Nea fiisu gwandeawa gurooruunatka sicheeda; niyam geat ak gaweay.

24 Nea jeesinga nyaawa ea mayeena, ‘Anung' eawala gheang'da NG'UTAMIIDA was ASEETEANYA, was dea goona roopta aba damandaanyi, roopta doomeelda ea dea meahooda, nea gwanyakneasa damanyoojiga lajita booga.’

25 Munyasnacheekeagwa niisheagiit haleanjeeni seaniin, nea riing'eegeagwa ea ning'amwa miyinda heedeang'wa.

26 Nea fuga munyas gwanda bugusta fugeasu; gawuurji fuga mida shageata dariidaka. Inyeesa gwasin ghasooda; jea ghaghas buuneeda.

27 Gawuurji sooscheanda nyiit jeeda dariidaka, gealga nyaawa gamaruuri ng'uyeega; nea ea niiw meanang'oodiga hees,

28 niriisha nea niweeriidi. Nea mwanala biikteaydeaba bwadaw aba sinooda munyinda inyeesa ghwalach girgweageeda nea ghaghwan inyeesa ea maweada bananga ghwanyas nyageadayda, nea mamiineadaysiina huumeanda fuga barbari.

29 Gwayi NG'UTAMIIDA, maydaaga ghoorjooda aba ng'asheesu? nea maydawalda aba heeda eemeeda uurji nih?”

30 Ng'asheanda sham fih nea leeheadi siyiing'sa jeeda ng'eanyiida:

31 sibanga niramoar ng'uyeega, nea ashoohoodiga gagadiiy nea ghwaat naweadinga nyaawa; nea fugeasu ghabwariiy gwasunu ng'asheesu, ak gajasina naaha iihidu mudeanoodeaba ng'asheesu?

The Bible in Datooga © Bible Society of Tanzania, 2015.

Bible Society of Tanzania
Lean sinn:



Sanasan