YEREMIYA 49 - Bibliyeeda Ghaydit

Girgweageeda NG'UTAMIIDA aba badayda Amoni

¹ Iita fuga Amoni. Asi gwayi NG'UTAMIIDA: “Neada Israeli ea mandeawana orjooga? Ak ea mandeawana siida jea gwahearani? Abeeda ghwasaan inyas Milkomu ghoang'waay ng'eanyiida Gadi, nea goobiida buuneadaanyi jeesinga mujiinajeagaaschi?

² Asi, ng'ula, gayghwahidu askwearjoojiga, gwarugu NG'UTAMIIDA, Gaydanung' eayiiy ghuuta ng'ucheeda aba badayda Raba was mujiineeda fuga Amoni; gayghoah eemeega ea raghoonyeanda, nea gharang'weakaaschi gajealas uhuuda aba beasta ak abeeda gaygoombal fuga Israeli fuga ghayi ambal saawa, gwarugu NG'UTAMIIDA.

³ “Aguula, Ea Heshboni, aba gideaba Ayi silas uhuuda! Ooyeawda, Ea haweega Raba! Ookweala hang'weaka guniyajeega, agiisana, nea goosalsi hiji ea hiji aba bugusta hilgweanda! Aba gideaba Milkomu gajeepaleak, soomjeanduumeeda, sea ashoohoodigaaschi sea fugaaschi hees.

⁴ Ghwasaan inyas gighwari geaw aba badayda moohajeagaagu, Ea huda mandeawana masaweega, ang'iing'i gighusi haleanjeadaang'u iidiiwi, nea giyeeni, ‘Neada aniini gayghoan ng'eaha gang'ucheewean?’

⁵ Ng'ula, gaydeadu badahuukeagwa muuwda, gwarugu NG'UTAMIIDA was ASEETA bea lugweega, was dea jea gwaleabu heeda fuga sean neaweeseey, ak gajeahoaneegwa arita, ak gaygaba siisi sihoan aba madeadaanyi, ak ea manda siida jea ghabwada geat fuga mang'aw.

⁶ “Nea iing'ata ng'asheesu gaydeaguumsa fuga Amoni miyeenooda nyaawa, gwarugu NG'UTAMIIDA.”

Girgweageeda NG'UTAMIIDA aba badayda Edomu

⁷ Iita Edomu Asi gwayi NG'UTAMIIDA bea lugweega: “Neada ea mudugwanda gicha weaghuumeeda mujiineeda Demani? Ak ea niroada girgweageeda fuga mideawa weaghuumeeda? Neada weaghuumeeda nyaawa ea niisha?

⁸ Amng'awa, abiikta bwadaw, ak goopiidi uuta ng'eanyiida, Ea fuga Dedani! Aba gideaba gaydeadu habitkweeda Esawu badahuukeagwa, aba damanda jea dalas niny.

⁹ Ama hidu headaang'u fuga bit sabiibu neada saawa gajea moabuuda gea jea eeliimi? Ama deepa ghwahidu mareanghooga eawa, maygwanyarja ea ghwanyas gea ahiit saawa?

¹⁰ Ak ea naareachi Esawu jeataanyi sean, ak ghaajaachi headaanyi funyaat, ak abeeda ea maygudu ghoamu ghafuy geat. Diibigaaschi silas uhuuda, sea orjooga ghaamwat, ea giischeewdaanyi; ak ea meapuuda eara akaleala.

¹¹ Nung'usiina heeda banangaagu, gaydanung'waada goobiitpiit nea majeekcheewi; nea ghakghusan masinung'weagaagu.”

¹² Aba gideaba gwayi NG'UTAMIIDA: “Fugiga mamiisiina gideaba gayghwaleayda bayooktean gayghwaleayda, neada gajea mealasnyi? Majuna nea mealasnyi.

¹³ Aba gideaba aniini naayaaji habeawooda, gwarugu NG'UTAMIIDA, bea gideaba Bosra gajea muy, ak ea haloat, ea gidarearga, ea gidamuy, ea mooshteayda; nea mujiinajeagaaschi gayghoah eemeega galeagasean.”

¹⁴ Naanyaschi iita leabu heeda NG'UTAMIIDA, nea giijasoocheanda ea siicheagu bugusta eemoojiga: “Asi aghadoawana geat ak ghoapkaanyi ang'ucheewana niny, ak ghoang'eachi ang'ucheena!”

¹⁵ Asi ng'ula, gaydanung' mwanang'iida aba jeeda eemoojiga, nea geefoolnyi aba jeeda buuneeda.

¹⁶ Nea giimuuwdaang'u bea buuneeda ea ghwarjeadaang'u ea nireenganeey, nea ghwarjeeda gurooroadaang'u, ang'iing'eeda abiita gwaleadinga lagheanga, ang'iing'eeda abiita uhuuda heayeeda. Earapeadi niyiini giibindaang'u humng'eeda gawuurji dea rabearda, asi gaydahiing'naneey hoowa, gwarugu NG'UTAMIIDA.

¹⁷ “Ak Edomu, gajea haloat, nea gilinyoo ea sih nyooh ghang'ata gayghahamng'eanyi nea gabara reari aba badayda sawanaduutkaaschi sean jea ghwanyas.

¹⁸ Gaygawuurji gidaghayi sibwaayda busiinda Sodoma ea Gomora sea mujiinajeega neekeewa, gwarugu NG'UTAMIIDA, manda siida jea goobiida jeeda, ak ea manda siida jea goobiida gicha jeedida.

¹⁹ Ng'ula, gaygwascheeng'deayda ng'adiida leabu dareabeeta Yordani ak gawa heeda haghweeda miy nih gichea dahoanda Edomu nea geashamnyi gil; ak gaydanung' ghoahaaghwa eemeeda siida jea daloat. Aba gideaba neada gawuurjeewean ng'eaha? Ak gayghoamu ng'eaha goorgweaksean? Ak ea ana jeagiischoochean gil dea ammu ghamiinaada aba madeedeanyu?

²⁰ Asi iinya gidabada NG'UTAMIIDA sinooda aba badayda Edomu ea gidagasa sinooda aba badahuuka fuga abiita Demani. Ak eara dayeega manang'i bea gisilga gajeengiir; aba huumwa gaygwanda hamoodeaba ng'eanyiida aba heeda was hoorgeeda nyaawa.

²¹ Ak gwasim geaw ng'eanyiida aba nyeashta giibeedeayda nyaawa; nea ghuuta shooka nyaawa gajeayiiy aba basooda Shaamu.

²² Ng'ula, weajoocheanda gaygwascheeng'u ak ghang'eataayda rabearda, ak ghoayaaw meang'eagaaschi aba badayda Bosra, ea badayda gurooruunatka fuga meanyi bea Edomu abeeda eaweedida gaygawuurji guroorooda gatmooda eaweeda lajooda.”

Girgweageeda NG'UTAMIIDA aba badayda Dameski

²³ Iita Dameski “Hamati sea Arpadi ning'ut hirbabandeeda, aba gideaba ninyas ng'asheega munyas; ak ghwanyar aba muuwda, ak gwateemban gawuurji basooda moamu ghwasiinda.

²⁴ Fuga Dameski nibur iheenga, ak ea niyam geat nea gagasa gamng'aw, ak ea ning'ut muuwda haw; ninyas ng'weaniidooda ea giiseaneega, uurji dea gatmooda bearji lajooda.

²⁵ Iijea eamu gwaroosa fih mujiineeda geaw iit, was mujiineeda hooseaneega!

²⁶ Asi gheareemangaaschi gaygoobeedeayi aba naweadingaaschi hees, nea shirikareadaanyi sean gajealas uhuuda aba eaweedida, gwarugu NG'UTAMIIDA bea lugweega.

²⁷ Ak aniini gaydaayeat beasta aba ghamarda Dameski, ak gayghwaak ghoorajeega majeekcheewi bea Ben-hadadi.”

Girgweageeda eemeeda Gedari ea mujiineeda Hasori

²⁸ Iita Gedari ea sugoocheanduumeeda Hasori ghayi bwar sugoocheanda siguura Nebukadreesa. Nih gwarugu NG'UTAMIIDA: “Ng'eada, una ng'ucheewana Gedari! Lasa uhuuda fuga mida heeda ghayeawa!

²⁹ Geanda maheemajeega nyaawa ea gisilga nyaawa, ak gigeandi hang'weaka nyaawa sean bea beashooda ea haleanjeeda nyaawa sean; geanda ngamiyajeega nyaawa, ak gaygooyeawusa saawa buuneeda nea gwayi: ‘Munyinda gwanda meadajeega sean!’

³⁰ Amng'awa, aweayeena ea asheagiida, oopiidana uuta ng'eanyiida, Ea fuga abiita Hasori! gwarugu NG'UTAMIIDA. Aba gideaba Nebukadreesa was sugoocheanda Babeli gabada sinooda ng'asheega munyas aba badahuukeagwa, ak ea nibada wunooda gang'ucheeweegwa.

³¹ “Ng'eada, una ng'ucheewana eemeeda ghayeawa, abiitpiit nea gamnyeeni, gwarugu NG'UTAMIIDA, was gea mandeawana dooshinga ghana gharinga, sirata, was eemeeda mideawa geat.

³² Nea ngamiyajeega nyaawa gajeayaas, ak hawaniga nyaawa saang'a gayghoah easanga, ak gaydeadearsa meadajeega sean fuga laja guchoojiga nyaawa, gaydeasa habitkwajeega aba meadajeega nyaawa sean, gwarugu NG'UTAMIIDA.

³³ Ak Hasori gayghoah giibinda fureayoonga, nea ghoah raghoonyeanda damanda manda muudeanooda; ak ea manda siida jea goobiida hoowa, ak ea manda siida jea goobiida hoowa nea goobiideata gidabiitiida rabascheanda.”

Girgweageeda NG'UTAMIIDA aba badayda Elamu

³⁴ Ghwahidu ng'asheanda NG'UTAMIIDA heeda Yeremiya was sibaneeda aba badayda Elamu, aba damanda giing'eeta sugoocheanduumeeda Sedekiya was sugoocheanda Yuda.

³⁵ Asi gwayi NG'UTAMIIDA bea lugweega: “Ng'ula, gaydahirja ghuweang'da Elamu, was dea haw was uurda nyaawa;

³⁶ ak gaydeadu badayda Elamu jeameeda aba meadaji ang'wan biissa gwaleabu meadaji ang'wan bea humng'eeda; ak gaydanung' gwadarsa jeameedida seaniin, ak ea manda eemeeda mayghwahita heeda fuga Elamu ghayi sihoan.

³⁷ Ak gaydanung' ghabeal fuga Elamu aba madeeda weajoodiga nyaawa, ea madeedeaba fugiga gaseadayi gurooruunatka nyaawaan; ak gaydeadu ng'asheega munyas badahuuka nyaawa, was nyarasteanyu ng'waan, gwarugu NG'UTAMIIDA. Ak aniini gaydeamaseaw saawa ng'uta, bwak ea dalas uhuuda;

³⁸ ak gaydeambiit hoorgeedeanyu aba Elamu, ak ghaabwarji sugoocheanda sea fuga hees, gwarugu NG'UTAMIIDA.

³⁹ “Nea aba eawoojiga jea ghwahidu gaydeadeelu giibinda fuga Elamu, gwarugu NG'UTAMIIDA.”