YEREMIYA 48 - Bibliyeeda Ghaydit

Nyariida Moabu

¹ Iita Moabu. Asi gwayi NG'UTAMIIDA bea lugweega, was ASEETA Israeli: “Nebo shageada, aba gideaba nimunyiidi! Giriataimu siipwaaspwaasnyi, ak ea sigeandaneeyi; hilgweandaang'u siipwaaspwaas ak geenyarja;

² Alooheeda Moabu mudugwanda earahay. Nea aba Heshboni geebada ng'asheega munyas aba badaydaanyi: ‘Asi eenyarja adagabiikta ghoah eemeeda!’ Ak eara ang'iing'i, Ea Madmena, gajeanung' siinda; gaygamaseawneey ng'uta.

³ “Aleeysiina iit! Shookcheanda leabu Horonaimu, ‘Datasta ea nyariida haw!’

⁴ Moabu sinyarjaneey; shookcheandaanyi siyiiy ea ghwahita Soari.

⁵ Nea fuga ghuh ghwascheang'da gaweay Luhiti ak ghwascheang'da nea gooyeawda; nea aba rarang'eanooda Horonaimu ghwayiiy shookcheanda nyariida.

⁶ Amng'awa! Oakghuuha geat! Asaldeayda digeeda jarooda aba dareapcheeda!

⁷ Aba gideaba Moabu gighusi uurdaang'u ea haleanjeadaang'u iidiiwi, ak eara ang'iing'i gajeegeandaneey; nea Gemoshi gaygwarita gawa ng'eanyiida siipaleaksa, sea ashoohoodigaaschi sea fugaaschi hees.

⁸ Nea nyarjeawi giliwas mujiini, ak ea manda mujiineeda jea ghaghu; Mwangwachi gaygoosha, nea ng'eanyiida awiida gajeenyarja, gawuurji gidarukuteayda NG'UTAMIIDA.

⁹ “Agurgursiina Moabu bung'eeda, ak abeeda gaygabay ghwanyar; nea mujiinajeagaaschi gayghoah raghoonyeanda, ak ea maygwanda jeeda sih.

¹⁰ “Simwaashta siidida sina gadiyeeda NG'UTAMIIDA ghaleehoodean; ak ea simwaashta siidida nung' ea moahiida ng'utaanyi foojeandean.

Mujiinajeega Moabu geenyarjeaweada

¹¹ “Moabu nimnyeeni ghang'eada gheareemaneanduumeadaanyi ak ea nisiindaayda difaayeeda measasada; ak ea meegeandeawana jeedeaba dabicheanji ak geayiin jeedeaba dabicheanji, ak ghanyea mii eepaleak; nea samneadaanyi gwanda jeeda ak shearoadaanyi ea mwayamwa.

¹² “Asi, ng'ula, gwayi NG'UTAMIIDA, gayghwahidu eawoojiga, jea deajeakna headaanyi fuga jea ghwayam niny, nea ghoaghajaam dabitaanyi, ak gwanyarjeaweada gikoombajeegaaschi ghoah basanga.

¹³ Ak Moabu gayghabwaspwas aba badayda Gemoshi, gawuurji gidabwasbwasta gheeh Israeli aba badayda Beteli, was dea ghus saawa.

¹⁴ “Gooyeenyiin agooga, ‘Aseasa geewooschi fuga daruuschi ea fuga majeekcheewi bea ng'ucheeda’?

¹⁵ Nihidu dea jea gwanyarja Moabu sea mujiinajeagaaschi, nea gheareemangaaschi miyaasiin ghwararang'aada gaweay eenuuseada, gwarugu Sugoocheanda, nea gheawungaaschi ea NG'UTAMIIDA bea lugweega.

¹⁶ Habitkweeda Moabu nineekiit muuchi, nea sawanadeadaanyi ghwaan nea ghwalamwajaan.

¹⁷ Agiisana aba badaydaanyi, oogasean neekeewa niny, sea buuneesean nal gheawungaaschi; eena, ‘Gagiinyaataan bileangida majeek, was bileangida miy’.

¹⁸ “Rarang'aanana jeeda giigheambiitaang'u, ak giipteadi aba bugharjeanda ghajaam, Ea orjeeda siida abiita Diboni! Aba gideaba nihidu dea jea gwanyarja Moabu nihidu dea jea gang'ucheeweey; ninyarja hilgweandaang'u majeek.

¹⁹ Miinaada aba ghuuta naweeda ak giing'weardi, Ea orjeeda siida abiita Aroeri! Anyaasha siida fwach ea gatmooda mang'aw; eena, ‘Neada ea nipnu naaha?’

²⁰ Moabu siipwaaspwaas, aba gideaba ning'ut ghwarjeeda; aguula nea giiyeawdi! Arukwiida aba Arnoni, gideaba Moabu ninyar.

²¹ “Ak girgweageeda ea nihita ng'eanyiida eaweeda, badayda Holoni, ea badayda Yasa, ea badayda Mefati,

²² ea badayda Diboni, ea badayda Nebo, ea badayda Bet-diblataimu,

²³ ea badayda Giriataimu, ea badayda Bet-gamuli, ea badayda Bet-meoni,

²⁴ ea badayda Gerioti, ea badayda Bosra, sea mujiinajeega sean bea ng'eanyiida Moabu, was dea sheagi ea dea neeki.

²⁵ Gujaweeda Moabu sihirja, nea geatindaanyi ea nigiinya, gwarugu NG'UTAMIIDA.

Moabu gajeahiing'u

²⁶ “Moabu anung' gaboogit, aba gideaba goodiing'u geaw aba heeda NG'UTAMIIDA; asi Moabu gaygoobeerbeershi aba jeeda geeseagaaschi, ak niny gaygwashka buuneeda.

²⁷ Neada Israeli ea mooshiki agooga? Neada niny geanyasa jeeda mareanghooga, nea iissa iibalooli badaydaanyi goodiindiili iheengeagwa?

²⁸ “Ang'amwana mujiinajeega, ak goopiidi jeeda lagheaneeda, Ea fuga abiita Moabu! Awuurjeewana ghariibajeanda sissa ghooriidaanyi mareeta mida ghuuta shoomanda.

²⁹ Siyiinyi iita ghwarjeeda Moabu– gideaba gaba ghwarja muuchi– ea giidiing'noadaanyi bea geaw, ea ghwarjeadaanyi, ea weashweashtaanyi, ea gidadaakta geaw aba jeadaanyi.

³⁰ Ak ghaanali ghwarjeadaanyi, gwarugu NG'UTAMIIDA; ghwarjeadaanyi gaba ng'uyeega, ak gadiyoojigaaschi gaba ng'uyeega.

³¹ Asi gaydeaguul aba badayda Moabu; ak gaydeajuur aba badayda Moabu sean; aba gideaba geayeawdi aba badayda fuga Gir-heresi.

³² Geayeawdaneey ang'iing'i, boostaaneeda Sibma ea ghang'al fuga Yaseri! Damealgaagu niweay ea ghoaghaawa basooda, ak gaweay ea ghwahita basooda Yaseri; ak ea niibisa haghweagaagu bea geayda dea jea gwanyarja ea sabiiboadaang'u jea laja.

³³ Ghweelmeeda ea hooseaneega sigeanda aba jeeda ng'eanyiida jiila muuchi bea Moabu; ak ea neahuuydi difaayi aba heeda simuriisa; ak ea manda siida jea ghamuush nea goojuur aba hooseaneega.

³⁴ “Fuga Heshboni ea Eleale gooyeawda; nea shooka nyaawa geayiiy aba Yahasa; ak ghwayiiy gea mida Soari ak ghwayiiy gea sheagi mida Horonaimu ea Eglat-shelishiya. Aba gideaba eara beega Nimrimu sinung'usa heeda.

³⁵ Ak gaydabwar giliwas sih aba ng'eanyiida Moabu, gwarugu NG'UTAMIIDA, was gilinyoo goodayiida lukghumeeda aba heetiyeada nea ghaghwarda geediga ng'andidi aba ASEATAANYI.

³⁶ Ak gurooroodeanyu gagiisan aba badayda Moabu nea ghwanyaashta durumbeati aba badayda fuga Gir-heresi; asi baruureega nyas niisha.

³⁷ “Aba gideaba giliwas uhuuda sireakghu nea gealach giliwas deamuuyeanda; nea geatinga sean gwanda mooshteanya siireadayda; nea mananuunatka sean geerasa hang'weaka guniyajeega.

³⁸ Nea iheenga ghoorajeega sean bea Moabu ea jeesinga naweadingaaschi hees gwanda shooka hiji wassean, aba gideaba neanyarji Moabu gawuurji dabicheanda mii miy, gwarugu NG'UTAMIIDA.

³⁹ Ak aba gidagiinyeata! Ookuula! Ea giyamda geaw Moabu aba baspaseega! Nih gichea eejuukiida Moabu gil ea gichea ghwanung' ghahamng'eanyi buuneesean neaweesa niny.”

Moabu mayghawaapta

⁴⁰ Aba gideaba gwayi NG'UTAMIIDA: “Ng'ula, siida gayghang'eataayda rabearda asas, ak ghoayaaw meang'eagaaschi aba badayda Moabu;

⁴¹ mujiinajeega gajeaghas nea ghoorajeega nyaawa majeekcheewi gajeabwar. Nea gurooruunatka gheareemanga meanyi bea Moabu aba eaweedida gaygawuurji guroorooda gatmooda damanda lajooda;

⁴² Moabu gajealas uhuuda ak ea mudu ghoah eamwa, aba gideaba goodiing'u geaw aba badayda NG'UTAMIIDA

⁴³ Muuwda, ea shoomanda, ea ghaseeda gwanda madeadaang'u, Ea orjeeda siida abiita Moabu, gwarugu NG'UTAMIIDA!

⁴⁴ Siida mang'awa muuwda gayghoabita jeeda shoomanda, nea siida siyeeng'na jeeda shoomanda gayghoang'waay gadageeda. Aba gideaba gaydeadu ng'asheesu seaniini badayda Moabu aba gweayda jea dalas, gwarugu NG'UTAMIIDA.

⁴⁵ “Fuga mang'aw bur gafuuf aba Heshboni nea gagasa heeda jea goobiida nea gaba seayu; aba gideaba niyeat beasta ghang'eada Heshboni, nea ng'ushapta beasta ghang'eada gheeh Sihoni; ak ea ninuus moonghajeega Moabu, ea iheenga fuga ajuuri.

⁴⁶ Shageada ang'iing'i, Ea Moabu! Fuga bada Gemoshi silas uhuuda; aba gideaba orjoogeagwa siyaat ghoah giing'oonyanga, nea haweegeagwa geayaat ghoah giing'oonyanga.

⁴⁷ Ak aba askwearjoojiga jea ghwahidu gaydeamajeek Moabu gwarugu NG'UTAMIIDA.” Asi girgweageeda Moabu gabeachi hiji.