YEREMIYA 46 - Bibliyeeda Ghaydit

Misri geajoar aba Garkemishi

¹ Ng'asheanda NG'UTAMIIDA weah heeda Yeremiya was sibaneeda aba badayda eemoojiga.

² Aba iita ng'eanyiida Misri. Iita lugooda Farao siguura Neko, was sugoocheanda Misri, neekeewa ghuuta eenda Furati mida Garkemishi ghayi joar Nebukadreesa was sugoocheanda Babeli aba gweaydeaba ang'wan bea Yehoyakimu was orjeeda Yosiya, was sugoocheanda Yuda:

³ “Asina igeambooda mwanang' ea igeambooda haw, ak guwi mwadi ng'ucheena!

⁴ Sina habadiga faraasajeega; ak gooding'di Ea fuga ding'da faraasajeega! Amiinaada nea goondeawi ngoofajeegeagwa bea gharinga, ashida ng'utkeakeagwa, ak gookweali hang'weakeagwa bea gharinga!

⁵ Ghwasaan inyas ghaadaayi ng'asheesu? Ning'ut muuwda ak ghwayam geat gabiikta bwadaw. Gheareemanga nyaawa sibwar, ak gwasalda nea ghwalamwajaada; nea masachsiina ghaat bwadaw– nea gwanda muuwda meadajeega sean! gwarugu NG'UTAMIIDA.

⁶ Fuga daruuschi moamu gwasalda, Nea dea mwaay ea moamu ghawaapta; aba wiilooda ng'eanyiida ghayeawa neekeewa eenda Furati siruusa ak goobeedeayi.

⁷ “Nih ng'eaha, adiing'u geaw ea gawuurji eenda Nayliin, uurji eeniga daruuschi beega nyaawa?

⁸ Misri niidiing'u geaw ea gawuurji Nayli, gawuurji eeniga daruuschi beega nyaawa. Gwayi, gaydeadiing'u geaw, gaydadukuta ng'eanyiida, gaydanyarja mujiinajeega ea fuga mida jeeda.

⁹ Asi aweayeena mwadi, Ea faraasajeega, ang'ucheena, Ea mutukwajeega ng'ucheeda! Anung'waada gwardu fuga ng'ucheeda: Fuga Gushi ea gea Buti mideawa igeambooniga; fuga Ludi, nal fuwean aba ghuweang'da.

¹⁰ Eaweedida eaweeda NG'UTAMIIDA was ASEETA bea lugweega, Eaweeda waldeayda mureandooda, ak ghawalda mureandooda niny aba heeda weajoodigaaschi. Ak gayghwaak ng'uta ea gwalang'u, ak ghwali foojeanda nyaawa ea ghwarikgh. Aba gideaba NG'UTAMIIDA bea lugweega gwanda lukghumeadaanyi wiilooda ng'eanyiida ghayeawa neekeewa eenda Furati.

¹¹ Siyeang'da una Gileyadi, ak gooyeadu meajooda, Ea haweega miyeasat bea Misri! Aba gideaba noaleayi meachkweega saang'a marachi gil; ak ea maynyasa heapta earahay.

¹² Ak ea niyiiy eemoojiga iita baspaseegaagu, nea ng'eanyiida ea ninyiit shookaagu; aba gideaba siida daruus niibeedeaysa siida daruus; ak ea niibeedeayi sean duwaawi.”

Hinooda Nebukadreesa

¹³ Nih ng'asheanda rukusa NG'UTAMIIDA Yeremiya gil was sibaneeda was iita gichea ghwaanda Nebukadreesa was sugoocheanda Babeli ak ghabwar ng'eanyiida Misri:

¹⁴ “Arukwiida aba ng'eanyiida Misri, ak ghoapwaashchi iita aba Migdoli; oapwaasha iita aba Nofu ea aba Dahpanesi; nea gooyeeshi, ‘Miinaada nea guwoosi hidaat, aba gideaba ng'uta ghwaak meadajeagaagu sean.’

¹⁵ Ghwasaan siidaang'u daruus inyas gamng'aw? Ghwasaan jurukutaang'u inyas mwamiinaada? Gweagu gideaba ghabwaay NG'UTAMIIDA ea gawa ng'eanyi.

¹⁶ Eemeadaang'u gwaruusa geat ak goobeedeayi, ak gaba siisi eesha nuut, ‘Ng'eada, ak ginung' eebiikta heeda fugaasa ea ng'eanyiida ghayi sijiiliiseasa, aba badayda ng'uta siida sawaneasa.’

¹⁷ Ang'asiina gheawunga suuk Farao, was sugoocheanda Misri, ‘Siida hoanyaash amiikta aseeta mwadaagha.’

¹⁸ “Aba gideabideati, gwarugu Sugoocheanda, was gheawungaaschi NG'UTAMIIDA bea lugweega, ak gawuurji Dabori gidageawda aba dang'adiga giijeega, ea giijeeda Garmeli neekeewa basooda, nih gichea ghwaanda gil.

¹⁹ Ea fuga abiita ng'eanyiida Misri! Ootiing'diing'da sareendeang'wa aba gideaba gajeayaadeagwa soomjeanduumeeda. Aba gideaba Nofu gajeenung'usa heeda, gajeenyarja, ak ea maygoobiida sih jeeda.

²⁰ “Misri haghweanda miyi, ak ea nihidu headaanyi munyinda leabu wiilooda ng'eanyiida ghayeawa.

²¹ Nea fugaaschi siitaw gadiyeeda mida jeenyaawa gawuurji muhooga riisheadi; ak eara saawa ea niyam geat ak gwasalda sean, ak ghwaraay ghamilikghta; aba gideaba nihidu eaweeda sawanadeeda nyaawa, was eaweeda jea ealasa.

²² “Ak gwanyeariida ghuusiga nyaawa dea ichibooda fwach; aba gideaba weajoodigaaschi ghapkaana uurda, ak ghapka gang'uchi niny aba joomajeega, gawuurji fuga bwaanyaada geediga.

²³ Ak saawa gayghabwar dareabeataanyi, gwarugu NG'UTAMIIDA, earapeadi mwoamu eeweay jeeda, aba gideaba aasaang'a ea gaburdeawa deashamga; saawa eamu eeyiida.

²⁴ Hudeaba Misri gajeapwaaspwaas, niny gajeayiin geatinga fuga leabu wiilooda ng'eanyiida ghayeawa.”

²⁵ Gwayi NG'UTAMIIDA bea lugweega, was ASEETA Israeli, “Ng'ula, aniini gaydalas Amoni was ASEETA Debesi, ea Farao, ea Misri ea aseecheekaaschi ea sugoodigaaschi, ea Farao sea fugiga awali gheang'dean.

²⁶ Ak aniini gaydayiin geatingeaba fugiga gasa gurooruunatka nyaawa ea geatinga Nebukadreesa was sugoocheanda Babeli sea fugaaschi hees. Ak abeeda Misri gaygoobiida buuneeda gawuurji eawoojiga ghayi bea garayi, gwarugu NG'UTAMIIDA.

NG'UTAMIIDA gayghaweat buuneadaanyi

²⁷ “Asi ang'iing'i adibeali, Ea Yakobo siideanyu bea gadiyeeda, ghana hirbabana, Ea Israeli; aba gideaba, gaydalealneey nea geawooschi sheagi, sea jeataang'u gwarina ng'eanyiida siipaleaksa. Yakobo gaygabiigu ak ghahawda nea gamnyeeni, nea manda siida jea ghang'uda muuwda.

²⁸ Adibeali, Ea Yakobo siideanyu bea gadiyeeda, gwarugu NG'UTAMIIDA, aba gideaba aniini geandeayi sea ang'iing'i. Aba gideaba gaydalas uhuuda eemoojiga sean aba heeda ghayi eahooseey, nea ang'iing'i ea maydalasnyi muuchi. Gaydalasnyi aba giteascheeweey, maydanung'waadaneey ea mwaalaseey.”