YEREMIYA 41 - Bibliyeeda Ghaydit

¹ Hean aba sheedeaba ispwa bea gweaydida, gawa Shumwaheeli was orjeeda Netaniya, was orjeeda Elishama, was siyagi aba jeeda dooshta sugoocheanda, ak ea siyagi gil aba jeeda shirikareeda hees bea sugoocheanda, sea fih damanamughuush mideayi sea niny ak gaweesa heeda Gedaliya orjeeda Ahikamu aba hoowa bea Mispahiin, ak gweagiischi sean aba Mispa,

² ng'ata ghang'eat Shumwaheeli, was orjeeda Netaniya sea fugiga atamanamughuush mideawean hean ghang'eat ak ghabwar Gedaliya was orjeeda Ahikamu, orjeeda Shafani aba ng'uta, ak ghabwar dea nung' sugoocheanda Babeli goombal ng'eanyiida.

³ Ng'ata ghabwar Shumwaheeli fuga sean bea Yahudi mideayi sea Gedaliya aba Mispa, sea fuga Galdayo sidaah aba hoowa was fuga ng'ucheeda.

⁴ Hean eaweeteaba iyeenya nea ning'ata nuusta Gedaliya, nea manda siida nal iiteaba ng'asheanji,

⁵ ghwahidu fuga saang'a leabu Shekemu ea gea leabu Shilo ea gea leabu Samariya, was fih seedam nea nireakghu deamuuka nyaawa nea nibwaashaada hang'weaka nyaawa, nea nibwaashaada sasanuuka nyaawa, nea gweana geatinga nyaawa haleanjeeda ghadooweeda was hideeda ak gweadu gheeda sibata NG'UTAMIIDA.

⁶ Hean ghabeawa Shumwaheeli was orjeeda Netaniya hoowa bea Mispahiin ak gawa roonyeeda nea gooyeawdeada. Ng'ata nea gwaroonyi saawa gwayeesha, “Apkaani jeeda gheeh Gedaliya was orjeeda Ahikamu.”

⁷ Hean nea gwanda bugusta mujiini gageanu Shumwaheeli was orjeeda Netaniya sea fugiga mideawean ak ghabwar fugiga ak gwahisa jeeda healadeeda.

⁸ Iidu gwanda fih damanamughuush aba jeenyaawa eesha Shumwaheeli, “Adiidu gibwarjeasa, aba gideaba geendeawi gijigoonga ngaano, ea nganooyda ng'weani, ea nagheeda, ea maleeda sifuy aba jeesinga madameega.” Hean ghwanung'waada ea mudu ghabwar saawa sea fuga mideawa.

⁹ Nea shoomandida hisa Shumwaheeli muscheekeaba fugiga bwariin ea shoomanda hawi ghayi sin sugoocheanda siguura Asa aba furoodeaba geaw aba badayda Baasha was sugoocheanda Israeli; ak ghoanyiit Shumwaheeli was orjeeda Netaniya shoomanda aba fugiga bwariin.

¹⁰ Ak ghoang'waay Shumwaheeli fuga sean abit mida hoowa bea Mispahiin, was haweega sugoocheanda sea fuga sean abit aba Mispa was fuga geanu Nebusaradani, was shirikarajeanda haweewa furiischoodiga nea abeeda ea niideaga Gedaliya orjeeda Ahikamu. Shumwaheeli orjeeda Netaniya nigeanda fiisu ghoah giing'oonyanga ak ghang'eat gawa ea ghwahita heeda fuga Amoni.

¹¹ Nea abeeda Yohanani orjeeda Gareya sea shirikareeda sean bea lugweega mideawa iidu nea ghwayiiy iiteaba ng'asheesu sean munyas sin Shumwaheeli was orjeeda Netaniyahiin,

¹² hean gageanu headiga nyaawa sean ak gaweay gang'uchi sea Shumwaheeli orjeeda Netaniya. Hean geeng'eessa niny aba ghuuta leehooda mida Gibeoni.

¹³ Hean daah fuga sean mideayi sea Shumwaheeli ea Yohanani orjeeda Gareya sea fuga sean hees bea lugweega nea gwandeayi sea niny, gahoosan.

¹⁴ Iidu fugiga sean ghayi aat Shumwaheeli ghoah giing'oonyanga aba Mispahiin ghwayam geat gabiikta heeda Yohanani orjeeda Gareya.

¹⁵ Ng'ata ghawaapta Shumwaheeli was orjeeda Netaniya aba madeeda Yohanani sea fih sis, ak gaweay heeda fuga Amoni.

¹⁶ Hean gageanu Yohanani was orjeeda Gareya sea fuga sean hees bea lugweega mideayi sea niny ghwaat fugiga sean abit was gea ghayi nung' Shumwaheeli orjeeda Netaniya ghoah giing'oonyanga aba Mispa iing'ata nea nibwar Gedaliya orjeeda Ahikamu, shirikara, ea gadeemga, ea diibiga, ea gulanga, was gea eana Yohanani Gibeoni.

¹⁷ Gaweay ak goobiida Geruti Gimhamu neekeewa Betlehemu, nea gagasa gaweay Misri

¹⁸ aba badayda fuga Galdayo; ghoawal saawa, aba gideaba Shumwaheeli orjeeda Netaniya nibwar Gedaliya was orjeeda Ahikamu, was dea iin sugoocheanda Babeli goombal ng'eanyiida.