YEREMIYA 40 - Bibliyeeda Ghaydit

Yeremiya gwandeayi sea Gedaliya

¹ Nih ng'asheanda weah heeda Yeremiya gil leabu heeda NG'UTAMIIDA, damanda siksiina Nebusaradani Yeremiya ghang'amwa Rama, was shirikarajeanda haw ambal furiischoodiga. Abeeda shirikarajeanji ghwaat Yeremiya nea sirat aba munyaloalajeega sea fuga sean mida ghealooniga bea Yerusalemu ea Yuda ghayi siipaleak eayaat Babeli.

² Hean ghwaat shirikarajeanda haw ambal furiischoodiga Yeremiya nea gwayeesha, “NG'UTAMIIDA was ASEATAANG'U ghayi gwarugu ng'asheega munyas jea gwarina hiji.

³ Ak NG'UTAMIIDA ea niyeadu ak gwasinda gidaghayi rukuteayda, aba gideaba noonung'usi heeda NG'UTAMIIDA. Nea mooleeysiiniit niny ak ghoah gidahina badaydeang'wa ng'asheesu.

⁴ Asi ng'ula ghamneawa gaydeatin munyaloalajeega aba geatingaagu. Ak iidaahi gideaba ghwahit gajeeteayeena Babeli sea aniini, abeeda gihidu ak gaydaarearnyi muuchi. Nea iidaahi gideaba mwahida giideaydeanya sea ang'iing'i aba beata Babeli, abeeda ginung'waadi ng'ula ng'eanyiisean gwanda madeadaang'u heeda miy aba gheanyangaagu igasayi una.

⁵ Nea iimigassi beata, abeeda gibiikti heeda Gedaliya orjeeda Ahikamu, was orjeeda Shafani ghayi nung' sugoocheanda Babeli ghoah siida haw jea goombal mujiinajeega Yuda, ak guwi mideayeena niny aba bugusta buuneeda ghana una heeda was sean idaahi ghwahit aba headaang'u.” Hean iidu shirikarajeanda haw ambal furiischoodiga ghoadaw Yeremiya hamita ea haleanjeeda guskuseega ak gwasiksa gawa heechea gawa.

⁶ Hean ghang'eat Yeremiya gawa Mispa heeda Gedaliya orjeeda Ahikamu ak gwandeay sea niny aba bugusta fuga abit aba badayda ng'eanyiida.

Gedaliya ghoah sugoocheanda haw bea ng'eanyiida Yuda

⁷ Ng'ata nea ghwayiiy fuga hees bea lugweega mida jeeda ng'eanyiida bwara sea fuga nyaawa gideaba sugoocheanda Babeli niloat Gedaliya orjeeda Ahikamu ghoah sugoocheanda haw bea ng'eanyiida, ak ghoadaw niny headiga, ea gadeemga, ea diibiga was fuga barbari bea ng'eanyiida was gea ghayi sinung'wa heeda meapaleaga gaweay Babeli.

⁸ Hean geeweesa Gedaliya aba Mispa nea geaba: Shumwaheeli gil, orjeeda Netaniya, ea Yohana orjeeda Gareya, ea Seraya orjeeda Danhumeti, ea orjooga Efayi, Netofati, ea Yesaniya orjeeda Maaka, saawa ea fuga nyaawa.

⁹ Gedaliya was orjeeda Ahikamu orjeeda Shafani, hean gweaksa habeawooda saawa ea fuga nyaawa nea gwayeesha, “Adoabeali gideaba gajagadiyeesiina fuga Galdayo. Oopiidana jeeda ng'eanyiida, nea googadiyeesi sugoocheanda Babeli, ak ghwahit aba heedeang'wa.

¹⁰ Ak aniini gaydeabiida Mispa, ak ghaamiinaadi aba madeeda fuga Galdayo jea ghapka heedeanya, nea agooga gooptu difaayi ea haghweega geayda, ea nagheeda, ak haleanjeeni ghoayiinyi jeeda dabiteang'wa, ak goopiidi jeeda ng'eanyiideang'wa ghayi oang'waanyi.”

¹¹ Iidu nea ghwayiiy fuga sean bea Yahudi mida Moabu ea gea mida bugusta orjooga Amoni, ea gea mida Edomu, ea gea mida jeeda ng'eanyiisean, gideaba sugoocheanda Babeli ninung'wa heeda Yuda gheaptanga, ak Gedaliya orjeeda Ahikamu orjeeda Shafani ea niidaw hawunda jea goombal saawa.

¹² Hean gabiikna fuga Yahudi meadajeega sean ghayi sihoosa. Ak gaweay ea ghwahita ng'eanyiida Mispa ak geawaam difaayi ea haghweega saang'a muuchi bea geayda.

Nuusta Gedaliya

¹³ Hean gaweesa Gedaliya aba Mispa geaba Yohanani orjeeda Gareya, ea fuga hees sean bea shirikara mida ng'eanyiida bwara ak geeyeesha niny,

¹⁴ “Heapi gindeawi iita gideaba Baali was sugoocheanda fuga Amoni niijeagu Shumwaheeli orjeeda Netaniya gwanuusnyi?” Ak Gedaliya orjeeda Ahikamu ea mamwasa ng'asheega nyaawa.

¹⁵ Hean ghwalamda Yohana orjeeda Gareya ak gwayeesha Gedaliya aba Mispa aba makcheameeda, “Sikseani dawa dabwar Shumwaheeli orjeeda Netaniya, nea manda siida jea gwajeeng'u ng'asheanji, ghwasaan gwanuusnyi ak ghoadaarda fuga Yahudi, baseey geat ak gealas uhuuda easanga fuga Yuda?”

¹⁶ Ng'ata ghwalamda Gedaliya orjeeda Ahikamu ak gwayeesha Yohanani, orjeeda Gareya, “Adiidu gisini ng'asheanji aba gideaba ginapsi ng'uyeega Shumwaheeli.”