YEREMIYA 4 - Bibliyeeda Ghaydit

Guurnooda duukuunooda

¹ Gwayi NG'UTAMIIDA, “Inyas gajabiikni, Ea Israeli gajabiikni heedeanyu. Inyas gajageanda munyindeang'wa aba madeedeanyu, abeeda ea majeanyasnyi.

² Inyas gajaga habeawooda, ‘Aba gidabiideata NG'UTAMIIDA,’ aba huumeanda, ea aba doobiiwnata, ea aba alooheeda, abeeda gaygabadiischeesa geat eemoojiga aba gheawungaaschi, nea aba gheawungaaschi gayghoaghaambiit geat.”

³ Ng'asheesu gwarukusa NG'UTAMIIDA fuga Yuda ea gea abiita Yerusalemu gideaba: “Abwara madameegeagwa, nea adiidu goohisi booga jeeda halaghweenga.

⁴ Ea fuga Yuda ea gea abiita Yerusalemu, Ooyiila geat aba badayda NG'UTAMIIDA, ageanda mughooka gurooruunatkeagwa adiidu ghwayeata nyarasteanyu beasta, ak ghwayeat ea ghwaroat siichea gwanuus, aba munyasnacheeka gadiyoojigeagwa.”

Yuda geegasa eaghas

⁵ Arukwiida aba Yuda, nea gookuulji aba Yerusalemu nea gooyeenyi, “Aghuuda durumbeati aba jeeda ng'eanyiida sean; ookuula nea gooyeenyi ‘Aguuyeesiina hijagi ak goosalsi jeeda mujiinajeega mideawa hilooga!’

⁶ Amiinda beendeerajeanda nea gookeali Sayuni, amung'awa anyasa ghuhooda, adiidu ghoashing'di, aba gideaba gaydeana munyinda wiilooda ng'eanyiida ghayeawa, ea giibeedeayda haw.

⁷ Ng'adiida nirina jeeda surbataanyi, nihidu dararoocheanda eemoojiga, nirina heeda eawoojisu abiita nihidu ghabwara darari ng'eanyiidaang'u; nea ng'eanyiidaang'u gayghoah raghoonyeanda nea mujiinajeagaagu gayghoah eemeega manda jeeda sih.

⁸ Asi aba ng'asheanji ookweala hang'weaka beareadi, ak googutu heareega nea gooyeawdi; aba gideaba nyarasta ng'waan bea NG'UTAMIIDA miighang'amwa heedeanya.”

⁹ Gwayi NG'UTAMIIDA, “Eaweedida Sugoocheanda ea fuga hees gaygabur iheenga; nea ashoohoodiga gayghang'ut giiseaneega nea sibanga gayghahamng'eanyi.”

¹⁰ Hean geayeenyi, “Ea NG'UTAMIIDA was ASEETA, aba huumwa nireenganayi fiisu ea mujiineeda Yerusalemu nea giyeeshi, ‘Gajabeaha seayu’; nea ng'uta ea niriiksi saawa.”

¹¹ Aba damandida fiisu ea mujiineeda Yerusalemu gajeeyeesha, “Jeameeda geayda ng'waan leabu iheenga heayeeniga balang'da gaygaweesa fugeasu, ak ghoaleal ghana gwasisin,

¹² nih jeameeda ng'waan gil leabu heedeanyu. Nea ea aniini gil jea deergweaksa saawa.”

Yuda nineaweesa weajoodigaaschi

¹³ Ng'ula ghwahitaayda shamooghuutka mutukwajeagaaschi ghapkaanda jeameeda shaarara nea faraasajeagaaschi ea ng'weani ea ghwanaawa madoonyaka– eeshageada aba gideaba siisheali!

¹⁴ Ea Yerusalemu ahuuna munyinda mida gurooroadaang'u, ak abeeda gajeelealneey. Ghamneawa gajateemsheesiina ng'asheega munyas aba jeadaang'u ea ghoah eeju?

¹⁵ Ninya giijuureanda aba Dani ea aba giijeeda Efraimu nea gwaruku munyinda.

¹⁶ Argweaksiina eemoojiga gideaba niny gayghoan; adawa iita fuga Yerusalemu, “Gayghapka weajoodiga leabu ng'eanyiida sheagi; goojuur nea gaweesa mujiinajeega Yuda.

¹⁷ Nea gwaneawesiinda fuga fura madameega, aba gideaba ninung'wanaan heeda, ng'asheanji gwarugu NG'UTAMIIDA.

¹⁸ Naweadingaagu ea ng'asheagaagu niihaaknyi ng'asheesu. Nih nyariidaang'u gil nea ea ng'waan; Niny bwak ea gwasawan gurooroadaang'u.”

Yeremiya gagiisan aba badayda fugaaschi

¹⁹ Ea sawanadeeda, ea sawanadeeda! Geabeerbeershi aba sawanadeeda! Ea sawanaduutka hees bea gurooroodeanyu! Gwaduumduum gurooroodeanyu; Nea ea mwaamuusi dasiinda; Aba gideaba naayiinyi nyeashta durumbeati, Ea giijuureanda ng'ucheeda.

²⁰ Hashooda Iinyo ghang'ata hashooda, ng'eanyiida sean nidatasa maheemajeegeasu sinyarjeawi aba gheadi nuwaas, eara weageakeasu aba gheadi nuwaas.

²¹ Gaydang'ula beendeerajeanda ng'ucheeda ea ghoah eeju, nea ghaayiinyi nyeashta durumbeati?

²² “Aba gideaba fugeasu ea dasheahi, saawa mwanalaan; saawa diibiga dasheahi, saawa mandeawana fughareenga. Saawa ea milmili aba sinooda riing'eeda, Nea sinooda haleanjeeda doobiiweadi ea moamu.”

Yeremiya ghwadaah nyariida jea ghoan

²³ Ghaahaakchi ghaang' ng'eanyiida, ak ging'ulayi, nidatasa nea ea manda gida mida jeeda; ak eara humng'eeda, ea manda jeeda gheaboonyanga.

²⁴ Ng'ata ghaahaakchi ghaang' giijeega, hean ging'ulayi gwanyeara ghuusiga, ak eara heayeeniga gwasimsim gaweay mwadi ea bwadaw.

²⁵ Hean ghaang'weardi, ak ging'ulayi, mwaadaahi eara sih, nea eara dariidaka sean bea humng'eeda ea nidarda.

²⁶ Ng'ata ghaang'weardi, ak ging'ulayi, ng'eanyiida miy niiw eeshtearajeanda, nea eara mujiinajeagaaschi sean ea niibeedeayi aba madeeda NG'UTAMIIDA, madeeda nyarastaanyi ng'waan.

²⁷ Aba gideaba gwayi NG'UTAMIIDA, “Ng'eanyiida sean gayghoah raghoonyeanda; nea ea maydanung' ghwanyar ea goosha.

²⁸ Ak aba ng'asheanji gaygagutu heareega ng'eanyiida, nea eara humng'eeda mida dea daliili gayghwayamwa gwatuudu; ng'asheanji neargu nea maydasach; neabaysi nea maydayam geaw.”

²⁹ Aba giijuureanda fuga ding'iida faraasajeega ea fuga ghuweanga gaygaba mujiineani mang'aw; gaygwasalsa jeeda dareabeeta ea jeeda gwaleadinga; mujiinajeega sing'amwa jeeda, manda siida abiita jeeda.

³⁰ Heapi ang'iing'eeda sinung'waneeyi heeda, gaba naaha hang'weaksu areeri iikwealini, nea gijiipsi geaw suulga dahaabuun, nea giyeashi geaw dawakghta, nifoolnyi ng'wasangaagu, saawa gagasa eaweagaagu

³¹ Naayiinyi ghuuta nyaashta dea gatmooda weesa jeata, gwanyeariida dea gatmooda jea gwaji duweacheeda. Shooka huda Sayuni daktakta nea gagasa ghoahang'hang', ghamiinda geatingaaschi ak gwayi, “Deashageadi! Aba gideaba naahiili aba madeeda weajoodiga.”