YEREMIYA 39 - Bibliyeeda Ghaydit

Giibeedeayda Yerusalemu

¹ Nea aba gweaydeaba shageash ea sheedeaba damanamughuush, bea sugoocheanduumeeda Sedekiya sugoocheanda Yuda. Hean ghwahidu Nebukadinesa was sugoocheanda Babeli sea lugoadaanyi sean gang'uchi sea Yerusalemu ak gwaneaweesa.

² Ak gweaydeaba damwanagi bea sugoocheanduumeeda Sedekiya bea sheedeaba ang'wan eaweedeaba shageash bea sheeda, hean geenyarja meatkweenagi bea ghamarda mujiini.

³ Hean gaweay gah, fuga hees sean bea sugoocheanda Babeli ak goobiitpiit aba dooshta mida bugusta: was Nergal-sharesa, Samgar-nebo, Sarsekimu bea Rabsari, Nergal-sharesa bea Rabmagi, sea fuga hees sean bea sugoocheanda Babeli.

⁴ Ak Sedekiya was sugoocheanda Yuda, ea lugoadaanyi sean hean daah saawa, geawapta ak geeriteawa mujiini eawa, nea geesik naweeda boostaaneeda sugoocheanda ak geesik dooshta mida bugusta ghamar iyeenya ak geeweay meatkweeda Araba.

⁵ Ak ghwaat geeshta nyaawa lugooda fuga Galdayo, iidu geanyasa Sedekiya mooheeda Yeriko ak geang'waay, ak geayaat heeda Nebukadinesa was sugoocheanda Babeli, aba Ribla mida ng'eanyiida Hamati, ak goorgweaksa niny.

⁶ Ng'ata gwanuuseada sugoocheanda Babeli orjooga Sedekiya aba madeadaanyi; aba hoowa bea Riblaan, ak gabiikta sugoocheanda Babeli gwanuuseada fuga hees sean bea Yuda.

⁷ Ea mabeachi nih iidu gwanyarjeawi gheanyanga Sedekiya ak gwarada aba biingu ak ghwaat Babeli.

⁸ Fuga Galdayo iidu ghaghwarda gheeda sugoocheanda ea gealga buuneeda, nea geenyarja ghamarda Yerusalemu.

⁹ Hean Nebusaradani, was shirikarajeanda haw ambal furiischoodiga ghoang'waay easanga buuneeda ghayi abit aba mujiini ak ghwaat Babeli, ea fuga ghayi was easanga nung'wa heeda mujiini ak gaweay gaguuy sea niny.

¹⁰ Iidu Nebusaradani was shirikarajeanda haw ambal furiischoodiga ghwanung'wa ng'eanyiida Yuda fiisu ng'ay barbari mandeawana gil, ak ghoadaw madameega sabiibu ea heechea eabwar aba damandida.

Yeremiya geetina ghealooniga

¹¹ Hean goobalool Nebukadinesa was sugoocheanda Babeli Nebusaradani was shirikarajeanda haw ambal furiischoodiga aba badayda Yeremiya nea gwayeesha.

¹² “Aada Yeremiya ak ging'ulayi muuchi, nea adisimi ng'asheanda muy, sinda gidagasiida niny.”

¹³ Nebusaradani was shirikarajeanda haw ambal furiischoodiga, ea Nebu-shasbani bea Rasbari, ea Nergal-sharesa, siida haw ambal fuga nala searoojiga miinga ea shirikarajeega hees sean bea sugoocheanda Babeli,

¹⁴ geecheakta buuneeda ak geang'aamwa Yeremiya doodooda furiischoodiga, ak geayiin geatinga Gedaliya orjeeda Ahikamu was orjeeda Shafani, ak ghwaat gheanyi hean goobiida bugusta buuneeda.

Rarooda Ebedmeleki

¹⁵ Hean gawa ng'asheanda NG'UTAMIIDA heeda Yeremiya, damandida mideewa ghealoonigean nea gwanda jeeda doodooda furiischoodiga ak gwayeesha,

¹⁶ “Asi una ak giibalooli Ebedmeleki was siida Gushi, ak giyeeshi, “Gwayi NG'UTAMIIDA bea lugweega, was ASEETA Israeli; ‘Ng'ula, gaydanung' gwasa ng'asheega ghayi eargu aba badaydeaba mujiineani, nea mii ng'asheega miyaasiin gil, gea munyasi, ak ng'asheesu gaygwasa nea ging'ulayi aba gheanyangaagu eaweecheanji.

¹⁷ Ak eaweecheanji gaydanung' ghuha, gwarugu NG'UTAMIIDA, ak ea majeayiinyi geatinga fugiga iiwaliin.

¹⁸ Aba gideaba aba huumwa gaydalealneey ak ea majeabwarnyi aba ng'ucheeda gaynyasa nyageadayda jea aghuuha eaweagaagu aba gideaba nimwaschaani. Gwarugu NG'UTAMIIDA.’”