YEREMIYA 38 - Bibliyeeda Ghaydit

Yeremiya geapuuta jeeda healadeeda ghajaam

¹ Abeeda Shefatiya orjeeda Mataniya, ea Gedaliya orjeeda Bashuri, ea Yakali orjeeda Shelemiya, ea Bashuri orjeeda Malkiya, ghwayiiy ng'asheega rukusa Yeremiya buuneesean nea gwayeesha.

² “Gwayi NG'UTAMIIDA, siida mida jeedeaba mujiineani gajeabwar aba ng'uta, nea ghabwar jalooda ea dawni. Nea dea weah heeda fuga Galdayo ea mayghami ak gajeataw giibinda uurji dea easanga ak gayghaghu.

³ Ak gwayi NG'UTAMIIDA, mujiineani gajeayiin geatinda lugooda sugoocheanda Babeli ak gayghoang'waay.”

⁴ Hean ghwalamda fuga hees ak gwayeesha sugoocheanda, “Siisi ghang'wana geabwar ghami, aba gideaba ghwanung' gang'arng'ariidi geatinga lugooda ng'ucheeda siipuusa jeedeaba mujiineani, ea geatinga buuneesean, aba badaydeaba ng'asheesu sirukusa saawaan; Aba gideaba siisi magakiisiina fiisu ng'asheega miyaasiin gagakiisa gea munyas.”

⁵ Ng'ata ghwalamda Sedekiya was sugoocheanda ak gwayeesha, “Ng'ula siisi gwanda geatingeagwa, aba gideaba sugoocheanda maygwasin gidamoogasi agooga.”

⁶ Hean geang'waay Yeremiya ak geapuuta jeeda healadeeda Malkiya orjeeda sugoocheanda, healadeeda gwanda doodooda furiischoodiga, nea geapuutaawa mareamarooda. Ak jeedeaba healadeedida ea manda beega geaghus sheang'weeda ak Yeremiya gwalik sheang'weedida.

⁷ Ak Ebedmeleki was siida eemeeda Gushi, was gulaneeda, gadiiyi aba gheeda sugoocheanda, iidu nea ghwayiiy gideaba siipuuta Yeremiya jeeda healadeeda, nea aba damandida sugoocheanda goopteada aba dooshta Benjamini–

⁸ Hean gaweesa Ebedmeleki sugoocheanda ak gwayeesha.

⁹ “Ea siideanyu haw sugoocheanda, fiisu nisin ng'asheanda muy; sijaksa Yeremiya was sibaneeda jeeda healadeeda, aba huumwa gayghabwar jalooda aba gideaba jeeda mujiini manda hamita.”

¹⁰ Hean gwayeesha sugoocheanda Ebedmeleki, was siida eemeeda Gushi, “Geani fih samwagu aba hiji ak gooweayi ooruuni Yeremiya was sibaneeda aba jeeda healadeeda damanda mii ghameawa.”

¹¹ Ng'ata gageanu Ebedmeleki fugiga ak goodeayi sea niny ak gawa jeeda gheeda sugoocheanda was heeda siitiiwiisa haleanjeeda ak gageanu hang'weaka ghayi sijakta ea weageaka woosi, ak ghoabuuta jeedeaba healadeedida aba mareamarooda ghoadaw Yeremiya.

¹² Ak gwayeesha Ebedmeleki was siida Gusi Yeremiya, “Geani hang'weaksu ea weageaksu ak giyiini hiing'eadayda mareamarooda aba ghushghustaang'u.” Ak gwasindunu Yeremiya.

¹³ Hean geeruuna Yeremiya jeedeaba healadeedida aba mareamarooda, ak goobiida Yeremiya doodooda furiischoodiga.

Sedekiya ghoanyaashta ng'asheanda aba heeda Yeremiya

¹⁴ Ak goojeakta Sedekiya was sugoocheanda buuneeda eeyeadu headaanyi Yeremiya was sibaneeda, ak geeyeadu gidaghuuteaba samwagu bea gheeda sibata ASEETA bea NG'UTAMIIDA, ak gwayeesha sugoocheanda Yeremiya, “Gaydaanyaashnyi ng'asheanda ak ea adufunyanaan gil.”

¹⁵ Ghwalamda Yeremiya ak gwayeesha Sedekiya, “Inyas gearukuneey huumeanda maynuuseani? Nea iyearukuneey gichea beada majaleeysean iiti?”

¹⁶ Hean gweaksa habeawooda sugoocheanda was Sedekiya Yeremiya aba makcheameeda nea gwayeesha, “Aba gidabiideata NG'UTAMIIDA ninyeeda ghayi sinneasa gurooruunatkaasa, maydanuusnyi nea maydayiinyi geatingeaba fiisu gasa gwanuusnyiin.”

¹⁷ Hean ghwalamda Yeremiya ak gwayeesha Sedekiya, “Gwayi NG'UTAMIIDA was ASEETA lugweega, was ASEETA Israeli, inyas giriti easiina geaw fuga hees bea sugoocheanda Babeli, abeeda gajaghuuha geaw nea eara mujiineani ea majeanung' goosha aba beasta, nea eara ang'iing'i ea fugeaba gheang'u gajaghuuha.

¹⁸ Nea inyas giheawi rita una easiina geaw fuga hees bea sugoocheanda Babeli, abeeda mujiineani gajeayiin geatinda fuga Galdayo ak saawa gayghaghwarda aba beasta, nea eara ang'iing'i ea mayghuha aba geatinga nyaawa.”

¹⁹ Hean Sedekiya was sugoocheanda gwayeesha Yeremiya, “Aniini ghaawalji fuga Yahudi ghayi salsa heeda fuga Galdayo, gajiidu ghwayiinan geatinga nyaawa ak gwajukean.”

²⁰ Ghwalamda Yeremiya ak gwayeesha, “Manda majeayiinyi geatinga nyaawa, eaniyean mwasa ng'asheanda NG'UTAMIIDA aba ng'asheesu earukuneeyiin, abeeda gaybeaha seayu nea ginyasi eaweega.

²¹ Nea inyas giheawi rita easiina geaw saawa, asi nih ng'asheanda ahiimnaan NG'UTAMIIDA gil.

²² Ng'ula, gadeemga sean sinung'wa jeeda gheeda sugoocheanda Yuda, gajeeruuta ak geayaat heeda fuga hees bea sugoocheanda Babeli, ak gadeemsu gaygwayi, ‘Fugaagu iduupcheewi neekeeweey nireenganeey, ak saawa ea nijoarnyi, aba gideaba geeshangaagu ghamneawa niibita jeeda sheang'weeda ak ea niyam geat gabiikta bwadaw ak ghwanung'waneey heeda.’

²³ Ak gadeemgaagu sean, ea orjoagaagu sean, gajeegeanda eeyeasa fuga Galdayo, ak ang'iing'i ea mayghuha. Gajeayiinyi geatinda sugoocheanda Babeli, nea mujiineani gajeaghwarda aba beasta.”

²⁴ Hean ghwalamda Sedekiya ak gwayeesha Yeremiya, “Ng'asheesu adaghwayiiy sih gajiidu gimeawi.

²⁵ Nea fuga hees iiyiiy gideaba sibalooli sea ang'iing'i, ak ghapka headaang'u ak gwayeeshiineey, ‘Rukuneasa ng'asheega irukusi sugoocheanda, adifunyaneasa, ak aseasa ea majeenuuseey, ea ng'asheega rukuneey sugoocheanda.’

²⁶ Abeeda gajeeshiina saawa, ‘Geamuschi sugoocheanda gideaba adaghoadealdanaani gheeh Yonatan adiidu geameewsi hoowa’.”

²⁷ Hean gaweesa fuga hees Yeremiya, ak geanyaash, ak gwarukusiinda saawa gidarukusiinda sugoocheanda. Ak geanung'waada ea mudeepalool, aba gideaba manda siida iing'shi nea gabalool sea sugoocheanda.

²⁸ Hean goobiida Yeremiya doodooda furiischoodiga bwak ea ghoah damanda giibeedeayda Yerusalemu.