YEREMIYA 37 - Bibliyeeda Ghaydit

Sedekiya gawa gamus Yeremiya ng'asheanda

¹ Nebukadinesa ghoadaw gheambalmeeda Sedekiya orjeeda Yosiya ak gawa hoorgeeda Goniya orjeeda Yehoyakimu aba ng'eanyiida Yuda.

² Ak Sedekiya ea fugaaschi bea gadiyeeda ea fuga ng'eanyiida Yuda ea meeleeysiina iit ng'asheega NG'UTAMIIDA, ghayi rukuna ghuuta Yeremiya was sibaneeda.

³ Hean goojeakta Sedekiya was sugoocheanda Yehukali orjeeda Shelemiya, ea Sefaniya orjeeda Maaseya was ashoohoocheanda gaweay heeda Yeremiya was sibaneeda ak gwayeesha, “Mwaasha NG'UTAMIIDA was ASEETEANYA aba badahuukaasa.”

⁴ Nea aba damandida Yeremiya ea gudu goobal geaw gwaneay aba bugusta buuneeda, aba gideaba miyeejaksa ghealooniga.

⁵ Iidu nea ghapka lugooda Farao leabu ng'eanyiida Misri, abeeda lugooda fuga Galdayo neaweesa Yerusalemu nea ghwayiiy iidi hean ghwadarda ghwanung'wa heeda Yerusalemu.

⁶ Hean gawa ng'asheanda NG'UTAMIIDA heeda Yeremiya was sibaneeda ak gwayeesha.

⁷ “Gwayi NG'UTAMIIDA was ASEETA Israeli, gajayeeshiina sugoocheanda Yuda, ajeakneegwa heedeanyu, ‘Ang'ula, lugooda Farao ghapka ghaweadeagwa ak gaygabiikta Misri was ng'eanyiida nyaawa.

⁸ Ak gaygabiigu gicha fuga Galdayo ak gaygang'uchi sea mujiineani, ak gayghoang'waay ak ghaghwarda.

⁹ Asi gwayi NG'UTAMIIDA, adooreenganay geat nea gooyeenyi, “Fuga Galdayo gayghwanung'waneasa heeda ak gaweay.” Aba huumwa mayghwanung'waneegwa heeda.

¹⁰ Eara gwachi ajoara lugooda sean bea fuga Galdayo, oong'ucheewi ak ghoabit fuga sisawan aba jeeda maheemajeega nyaawa. Fiisu sisawaniin gayghang'eatng'eat ak ghaghwarda mujiineani aba beasta.’”

Yeremiya geang'waay ak geejaksa ghealooniga

¹¹ Iidu nea nidarda lugooda fuga Galdayo aba Yerusalemu, aba gideaba ghoawal lugooda Farao.

¹² Hean ghang'eada Yeremiya Yerusalemu ak gawa ng'eanyiida Benjamini ghoang'waay gidaduuksa niny aba bugusta buuneeda.

¹³ Damanda mideewa gidaghuuta dooshta Benjamini, abeeda gwanda furiischoocheanji siguura Iriya orjeeda Shelemiya bea Hananiya, hean ghoang'waay Yeremiya was sibaneeda nea gwayeesha, “Ang'iing'i giwaapti una guuyeewana fuga Galdayo.”

¹⁴ Ghwalamda Yeremiya ak gwayeesha, “Manda aniini meawani daguuy sea fuga Galdayo.” Ak Iriya niny ea mamwasa, ak ghoang'waay Yeremiya ak ghwaat heeda fuga hees.

¹⁵ Hean gwanyareeksa fuga hees Yeremiya ak geabwar ak geejaksa ghealooniga jeeda gheeda Yonatan, was ng'oorshoocheanda, aba gideaba geanung' ghoah gheeda siratiisa buuneeda.

¹⁶ Iidu Yeremiya nea gawa ghealooniga ak goobiida hoowa ea gageanu eawoojiga saang'a.

¹⁷ Hean goojeakta Sedekiya was sugoocheanda buuneeda eeweay eamwaghaada, ak ghoanyaash sugoocheanda Yeremiya aba makcheameeda aba jeedeaba gheanyi nea gwayeesha, “Gwanda ng'asheanda leabu heeda NG'UTAMIIDA?” Ghwasha Yeremiya ak gwayeesha, “Gwanda.” Hean gwayeesha, “Gajeayiinyi geatinga sugoocheanda Babeli.”

¹⁸ Ghwalamda Yeremiya ak gwayeesha Sedekiya was sugoocheanda, “Giidiinyeandeanyu naaha aba headaang'u ghana heeda fugaagu bea gadiyeeda ghana heedeaba fiisu, bwak ea ajaksean ghealooniga?

¹⁹ Gwanda yeenu ghamneawa sibangeagwa ghayi ramooraseegwa nea gwayi, ‘Sugoocheanda Babeli majang'ucheewana nea maygang'uchi ng'eanyiini?’

²⁰ Asi ghamneawa geamuscheey aleeysean iit ea siideanyu haw was sugoocheanda, ak gimwasi gideamuscheey aba headaang'u eaniyean adiideelsean ghealooniga jeeda gheeda Yonatan was ng'oorshoocheanda, adiidu geameewsi hoowa.”

²¹ Hean ghwanung' Sedekiya was sugoocheanda goobiida Yeremiya doodooda furiischoodiga, ak geataw galeagasean mukaateanagi leabu heeda fuga sina mukaate, bwak ea goosha mukaateeyda mujiini. Hean goobiita Yeremiya doodooda Furiischoodiga.