YEREMIYA 36 - Bibliyeeda Ghaydit

Baruku ghoasoamwa gitaabu aba jeeda gheeda sibata ASEETA.

¹ Gweaydeaba ang'wan bea sugoocheanduumeeda Yehoyakimu orjeeda Yosiya sugoocheanda Yuda, hean ghwahidu ng'asheanda NG'UTAMIIDA heeda Yeremiya ak gwayeesha.

² “Geani gitaabu ak ging'oorsi jeeda ng'asheega sean ghayi earukuneey aba badayda fuga Israeli, ea fuga Yuda, ea eemoojiga sean, ghang'eada eaweedida ghayi eabaloolaneeyiin, ghang'eada damanda ghayi bea Yosiya ea ghoah ghamneawa.

³ Gwadeepa fuga Yuda ghwayiiy ng'asheega munyas sean jea dasima saawa, ak gaba nih abuut naweadingaaschi munyas ak geasamsi giidiinyeanyeeka nyaawa ea riing'eega nyaawa.”

⁴ Hean ng'ata gaguursa Yeremiya Baruku orjeeda Neriya, hean ghang'oar Baruku ng'asheega sean bea NG'UTAMIIDA leabu ghuuta Yeremiya ghayi rukusa NG'UTAMIIDA niny.

⁵ Hean gwayeesha Yeremiya Baruku, “Aniini siweadanaani beata jeeda gheeda sibata ASEETA;

⁶ asi una, ak giisoami gitaabwajeanda ing'oorsi jeeda ng'asheega NG'UTAMIIDA leabu ghuuteanyu, ak giisoami ghwayiiy buuneeda aba jeeda gheeda sibata ASEETA. Nea eaweeda jea radana gajasoamwana ghwayiiy fuga sean bea Yuda, leabu jeeda mujiinajeega nyaawa.

⁷ Gwadeepa ghamwaash NG'UTAMIIDA nyaawa ak gaba nih abuut naweadingaaschi muy, aba gideaba nyarasta ea ng'weaninda ghayi rugu NG'UTAMIIDA aba badaydeaba fiisu aahaw muuchi.”

⁸ Hean Baruku orjeeda Neriya iidu gwasinda ng'asheesu seaniin gidarukusiinda Yeremiya was sibaneeda. Ak ghoasoamwa aba jeeda gitaabu ng'asheega NG'UTAMIIDA aba jeeda gheeda sibata ASEETA.

⁹ Hean gweaydeaba muut bea sugoocheanduumeeda Yehoyakimu orjeeda Yosiya, sugoocheanda Yuda, nea sheedeaba shageash gil, fuga sean mida Yerusalemu, ea fuga sean fuga Yerusalemu leabu mujiinajeega sean bea Yuda, hean geerukuta giiluuldeaydeaba geat aba madeeda NG'UTAMIIDA.

¹⁰ Ng'ata ghoasoamwa Baruku ng'asheega Yeremiya aba jeeda gheeda sibata ASEETA bea NG'UTAMIIDA, aba jeeda ghooriida Gemariya orjeeda Shafani was ng'oorshoocheanda, nea aba jeeda doodooda mida heetiyeada gil, bea naweeda gidaghuuteesh bea gheeda sibata ASEETA, hean ghoasoamwa nea ghwayiiy buuneesean.

Gitaabu geasoamwa aba madeeda fuga hees

¹¹ Hean Mikaya orjeeda Gemariya orjeeda Shafani iidu nea ghwayiiy ng'asheega sean bea NG'UTAMIIDA mida jeedeaba gitaabwajeandida,

¹² ghwararang'aada ak gawa jeeda gheeda sugoocheanda, jeeda ghooriida ng'oorshoocheanda, nea abeeda ea niibiitbiit fuga hees aba jeedida, nea geaba Elishama gil was ng'oorshoocheanda, ea Delaya, orjeeda Shemaya, ea Elinatani orjeeda Akbori, ea Gemariya orjeeda Shafani, ea Sedekiya orjeeda Hananiya, ea fuga hees sean.

¹³ Hean gwarukusa Mikaya saawa ng'asheega sean iiy damanda asoamwa Baruku gitaabu aba madeeda buuneeda.

¹⁴ Ng'ata goojeakta fuga hees sean Yehudi, orjeeda Netaniya orjeeda Sheleniya orjeeda Gushi, gawa heeda Baruku gwayeesha, “Geani gitaabwajeanda ghayi iisoami aba madeeda buuneeda ak giyeadu hiji.” Hean gageanu Baruku orjeeda Neriya gitaabu ak gweasa.

¹⁵ Ak geeyeesha niny, “Apteada ak giisoami.” Hean ghoasoamwa Baruku aba madeanyaawa.

¹⁶ Hean nea geayiiy ng'asheesu seaniin, gaba nih ang'weersa nuut aba muuwda, ak geeyeesha Baruku, “Ng'asheesu seaniin gajeerukusiina sugoocheanda.”

¹⁷ Hean geanyaash Baruku nea geeyeesha, “Heapi ng'asheesu seaniin giimuustiin ng'oara? Inyeesa gwarukuneey Yeremiya ak ging'waari?”

¹⁸ Ak ghwasha Baruku nea gwayeesha, “Ng'asheesu seaniin gwarukunean niny aba ghuutaanyi ak geang'oorsi jeeda gitaabu aba galaamu.”

¹⁹ Ng'ata gwayeesha fugiga heesiin Baruku, “Una funya geaw, ang'iing'i ea Yeremiya, nea adaghwanal sih heeda oondi.”

Sugoocheanda ghaghwarda gitaabwajeanda

²⁰ Hean geeweay heeda sugoocheanda ak geeweay gah, nea abeeda gitaabwajeandida ea siyiin jeeda ghooriida Elishama was ng'oorshoocheanda, ak geerukusa ng'asheesu seaniin sugoocheanda.

²¹ Ak goojeakta sugoocheanda Yehudi gawa ghamwaghaada gitaabu, ak gawa gageanu aba jeeda ghooriida Elishama was ng'oorshoocheanda. Hean ghoasoamwa Yehudi nea gooleeysiit sugoocheanda ea fuga hees miinaada aba madeeda sugoocheanda.

²² Nea aba damandida ea sheedang'wan gil, ak sugoocheanda abeeda gwanda jeedeaba gheanyi gwaju beasta rarayga aba gideaba damanda gooroogeeda gil.

²³ Iing'ata nea niisoamwa Yehudi meatkwaji samwagu ea ang'wan bea gitaabwajeanda, hean ghoang'waay sugoocheanda ghwalajaada gitaabwajeandida aba barda ak gwajaksa jeeda beasta rarayga ak ghwaak beasta ea goosha.

²⁴ Ak ea mabeala nea mabwaashaada hang'weaka nyaawa, sugoocheanda ghana fugaaschi bea gadiyeeda, iiy ng'asheesu seaniin.

²⁵ Nea abeeda Elinatani, ea Delaya, ea Gemariya, ea simearmear sugoocheanda gideaba adaghaghwarda gitaabwajeandida ak ea mamwasa ghwayiiy iita nyaawa.

²⁶ Hean goojeakta sugoocheanda Yerameli orjeeda sugoocheanda, ea Seraya orjeeda Asrieli ea Shelemiya, orjeeda Abdeeli eang'waay Baruku was ng'oorshoocheanda ea Yeremiya was sibaneeda, ak ghafuy NG'UTAMIIDA saawa.

²⁷ Iing'ata nea nighwarda sugoocheanda gitaabwajeandida bea ng'asheega ghayi ng'oar Baruku aba gidarukusiinda Yeremiya. Hean gawa ng'asheanda NG'UTAMIIDA heeda Yeremiya ak gwayeesha.

²⁸ “Asi geani gitaabwajeanda nuut ak ging'oorsi jeeda ng'asheega sean bea mwadi sean ghayi mida jeeda gitaabwajeandida bea mwadiin ak ghaghwarda Yehoyakimu was sugoocheanda Yuda.

²⁹ Ak gajeeshiina Yehoyakimu sugoocheanda Yuda gideaba ‘Gwayi NG'UTAMIIDA, ghamneawa nighwardi gitaabwajeandida, gaydaanyaashnyi gideaba, “Ghwasaan anda Yeremiya ghang'oar gideaba sugoocheanda Babeli gayghwahidu gwanyarja ng'eanyiini nea ghwalas uhuuda buuneeda ea diyeanga?”

³⁰ Asi gwayi NG'UTAMIIDA aba badayda Yehoyakimu sugoocheanda Yuda aba jeadaanyi manda siida jea gawa hoorgeeda gheambalmeeda Dawdi, nea mustaanyi gajeejaksa jarooda askweari ak ghwaak daknooda nea eawa ghwaak jeameeda.

³¹ Ak gaydalas niny ea jeataanyi ea fugaaschi bea gadiyeeda, aba badayda giidiinyeanyeeka nyaawa, ak gaydeadu ng'asheega munyas sean badayda nyaawa, ea badayda fuga Yerusalemu, ea fuga Yuda aba gideaba mamwasa gwayiing'shi.’”

³² Ng'ata gageanu Yeremiya gitaabwajeanda nuut ak ghoadaw Baruku orjeeda Neriya was ng'oorshoocheanda, ak ghang'oar ng'asheega sean leabu ghuuta Yeremiya was gea ghayi ghwarda aba beasta Yehoyakimu was sugoocheanda Yuda, ak geahaat ng'asheega saang'a uurji gea ghayi bea mwadi.