YEREMIYA 35 - Bibliyeeda Ghaydit

Yeremiya ea fuga Babeli

¹ Ng'asheanji dea eah heeda Yeremiya gil leabu heeda NG'UTAMIIDA aba damanda Yehoyakimu, orjeeda Yosiya sugoocheanda Yuda, ak gwayeesha.

² “Una gheeh Rekabu ak giibalooli saawa, ak giyeadu saawa gheeda NG'UTAMIIDA, jeemba ghooriinagi amang'ata giidawi difaayi ghwali.”

³ Hean geageanu Yaasaniya orjeeda Yeremiya, orjeeda Habasiniya ea orjooga ghaamwat ea orjoagaaschi sean ea gheeh sean bea Rekabu.

⁴ Ak geayeadu saawa jeeda gheeda NG'UTAMIIDA, was jeeda ghooriida orjooga Hanani orjeeda Igdaliya, was siida ASEETA, neekeewa ghooriida fuga hees, nea abeeda gwanda uhuuda ghooriida Maaseya orjeeda Shalumu, was furiischoocheanda doodooda.

⁵ Ng'ata geageanu gweerajeega nyiit difaayi, ea gikoombajeega ak ghaayiinyi madeeda orjooga gheeh Rekabu ak geayeeshi “aleaha difaayi.”

⁶ Ak gwayeeshiinean, “Majealeaha difaayi, aba gideaba Yonadabu orjeeda Rekabu was ghweandeanya ghayi gwayeeshiineasa, ‘Adoaleayi difaayi, agooga ghana orjoogeagwa damanda manda muudeanooda.

⁷ Nea adoadeaschi gheeda nea adoohisti histeanga ghana sabiibu adoondeawi, ak gajoopiidana jeeda maheemajeanda galeagasean, nea goopiidi ea ghang'ata eawoojiga saang'a aba jeeda ng'eanyiida jea oopiidana nea goowooschi rabasta.’

⁸ Ak aseasa ea simwaschi ng'asheanda Yonadabu orjeeda Rekabu was ghweandeanya, aba ng'asheega sean rukuneasa, gideaba adoaleayi difaayi eawoojigaasa sean, aseasa ea gadeemgaasa ea orjoagaasa ea haweagaasa.

⁹ Ea gideaba adoadeaschi gealga jea eepiidana. Nea adeendeawi madamnyeanda sabiibu ghana madamnyeanda ghana histeanga.

¹⁰ Aseasa geepiidi jeeda maheemajeega, ak geamwaschi nea geesinyi ng'asheega sean rukuneasa Yonadabu was ghweandeanya.

¹¹ Damanda siyeeng'na Nebukadinesa was sugoocheanda Babeli ak ghwahidu ng'eanyiini, hean geeyeenyi, ‘Asi eeweaya Yerusalemu, iisiiwali lugooda fuga Galdayo, ea lugooda fuga Shaamu’, asi ghamneawa geendi Yerusalemu.”

¹² Hean ghwahidu ng'asheanda NG'UTAMIIDA heeda Yeremiya ak gwayeesha.

¹³ “Gwayi NG'UTAMIIDA bea lugweega was ASEETA Israeli, una ak giyeeshi fuga Yuda, ea fuga Yerusalemu, heapi moogasi oang'waanya giinealshooda ak gooleeysiit ng'asheegeasu? Gwarugu NG'UTAMIIDA.

¹⁴ Ng'asheega Yonadabu orjeeda Rekabu ghayi rukusa orjoagaaschi gideaba adaghwali difaayi, asi nisa eara ghamneawa mwali aba gideaba ghamwas ng'asheega ghweanda nyaawa. Ak aniini geabalooleegwa gheata sean ak ea mooleeysean iit.

¹⁵ Ak geajeagu fugeasu sean bea gadiyeeda sibanga saawa geajeagu heedeang'wa ak gwayeeshiineegwa, ‘Daba siisi abuut naweadingaaschi munyas, nea ghwanung'waada sinaweagaaschi munyas, nea ghwanung'waada eata geeshta aseecheeka gadiyeesa. Ak gajoopiidana jeedeaba ng'eanyiini ghayi eagoonyeegwa ea ghweanigeagwa.’ Ak ea moayiinyi iiteanyu nea mooleeysean iit.

¹⁶ Nea orjooga Yonadabu orjeeda Rekabu ea nisinda ng'asheega gidaghayi rukusiinda ghweanda nyaawa saawa, ak fiisu ea mooleeysean iit.

¹⁷ Asi aba ng'asheanji gwayi NG'UTAMIIDA ASEETA bea lugweega, ASEETA Israeli, ng'ula, gaydeadu ng'asheega munyas sean heeda fuga Yuda ea heeda fuga sean bea Yerusalemu aba gideaba geabalooli ak ea mooleeysean iit, geaguursi ak ea manyeara ghuusiga.”

¹⁸ Hean ghwalamda Yeremiya ak gwayeesha fuga gheeh Rekabu, “Gwayi NG'UTAMIIDA bea lugweega was ASEETA Israeli aba gideaba noamwaschi ng'asheanda Yonadabu was ghweandeang'wa, nea ghoang'waanyi ng'asheagaaschi rugu sean, nea goosindi gidarukuteayda sean.

¹⁹ Asi aba badaydeaba nih, gwayi NG'UTAMIIDA bea lugweega, was ASEETA Israeli, Yonadabu orjeeda Rekabu mayghanyi ea mwanyasa siida jea gagadiyeesean damanda manda muudeanooda.”