YEREMIYA 33 - Bibliyeeda Ghaydit

Heeleeda nuut bea rarooda

¹ Hean iidu ghwahidu ng'asheanda NG'UTAMIIDA heeda Yeremiya niba iyeenya, damanda mideewa ghealooniga aba jeeda doodooda furiischoodiga ak gwayeesha,

² “Gwayi NG'UTAMIIDA bwat ng'eanyiida, NG'UTAMIIDA sin ak goomajeek ng'eanyiida, gheawungaaschi NG'UTAMIIDA gil.

³ Guurnean ak gayghwanya ghuuteanyu, ak gaydaahiimneey ng'asheega hees hang'oonyi minali.

⁴ Aba gideaba gwayi NG'UTAMIIDA was ASEETA Israeli, aba badaydeaba gealsu bea mujiinajeanjiin ea gealga sugoodiga Yuda sinyarja aba gideaba gajeeneaweesa ak geeng'uchi.

⁵ Gayghapka gang'uchi sea fuga Galdayo, ak gayghwanyiit muscheeka buuneeda ghayi eanuuseadi aba nyarasteanyu ea ng'weanindeanyu nea aba ng'asheega nyaawa munyas sean mujiineani gaydanung'wa heeda.

⁶ Ng'ula, gaydagoonyi majeeknata ea heapta ak gaydaahaap saawa, nea gaydeadaheachsa saawa hoyyooyda haw ea huumeanda.

⁷ Ak gaydeadeelsa fuga Yuda, ea gea Israeli miyeenooda ghayi bea mwadi.

⁸ Ak gaydeahuun saawa aba ng'asheega nyaawa munyas sean, ghayi adiiysean, ak gaydasamsa ng'asheega nyaawa munyas sean ghayi adiiysean nea ghoah ramaseanda aba heedeanyu.

⁹ Nea mujiineani aba heedeanyu gheawunga gajea hoosaneat ea gwarsiinda ea giigheambiita aba madeeda eemoojiga sean bea ng'eanyiida was gea jea ghwayiiy ng'asheega sean miyaasiin easisi, ak saawa gayghang'ut muuwda ea gooboodani aba ng'asheega sean miyaasiin ea hoyyooyda jea daadaw mujiineani.

¹⁰ “Gwayi NG'UTAMIIDA aba jeedeaba ng'eanyiini ooyeenyiin, ‘nih raghoonyeanda gil manda siida ghana diyeayda’ aba jeeda mujiinajeega Yuda ea naweadinga Yerusalemu was raghoonyeanda manda siida ghana diyeayda bea ng'eanyiida ghana diyeayda aba hooweani gajeayiiy gicha.

¹¹ Ghuuta hooseaneega ea ghuuta ghweelmeeda ea ghuuta siida geeshi ea ghuuta sibeeda ea fuga eena: ‘Abadiischeesiina NG'UTAMIIDA bea lugweega Aba gideaba NG'UTAMIIDA aamiy, Baydeaydaanyi manda muudeanooda!’ Ak gaydeadeelsa ng'eanyiini miyeenooda ghayi bea mwadi, gwarugu NG'UTAMIIDA.

¹² “Gwayi NG'UTAMIIDA bea lugweega, aba hiji was raghoonyeandean, manda siida ghana diyeaydean ea mujiinajeagaaschi sean, gaygwanda heeda jea goobiida jeagiischoodiga nea gooluul gisilga nyaawa.

¹³ Aba jeeda mujiinajeega heayeeniga, ea jeeda mujiinajeega mooheeda ea jeeda mujiinajeega Negebu, ea jeeda ng'eanyiida Benjamini, ea heeda neekeewa Yerusalemu, ea jeeda mujiinajeega Yuda gaygwasik gicha gisilga hing'eadayda geatingaaschi nea gwayiida saawa; gwarugu NG'UTAMIIDA.

¹⁴ “Ng'ula, gayghwahidu eawoojiga, gwarugu NG'UTAMIIDA, jea dasina ng'asheanda miy ghayi earguun aba badayda fuga Israeli ea aba badayda fuga Yuda.

¹⁵ Ak eaweedida, ea damandida gaydanung' ghaftu damealeanda giibinda doabiiwaat aba jeata Dawdi, ak gaygwasin girgweageeda ea doobiiwnata aba jeedeaba ng'eanyiini.

¹⁶ Nea eaweedida Yuda gajeelealu ak Yerusalemu gaygoobiida nea gaba seayu. Ak nih ea gheawungaaschi jea eeguura gil, ‘NG'UTAMIIDA Doobiiwnateanya.’

¹⁷ “Aba gideaba gwayi NG'UTAMIIDA, aba jeata Dawdi mayghwaroat siida jea gawa hoorgeeda gheambalmeeda fuga Israeli.

¹⁸ Ak ashoohoodiga dooshta fuga Lawi mayghwaroat siida jea gwanda madeedeanyu ak ghoadayda haleanjeeda sisabwa geadi bea ghadooweeda sighwarda, ea dearanga sisabwa geadi bea ghadooweeda nea gwasin lukghumeeda damanda manda muudeanooda.”

¹⁹ Hean ghwahidu ng'asheanda NG'UTAMIIDA heeda Yeremiya.

²⁰ “Gwayi NG'UTAMIIDA, iyoodataschi neajeedeanyu askweari ea neajeedeanyu bea eawa, ak ea mutugwanda askweari ea eawa aba damandaanyi.

²¹ Abeeda ea majoamuusa ageanda neajeedeanyu ghayi easinyi sea Dawdi was siideanyu bea gadiyeeda geasinyi neajeedeanyu sea Dawdi gideaba inyeesa aba jeataanyi gaygwanda siida jea gawa hoorgeadaanyi, nea inyeesa gaygwanda ashoohoodiga dooshta Lawi jea gagadiyeesean.

²² Aba giduurjeata lugooda humng'eeda, mwoamu eeyiida, ghana iseaskweanda basooda mwoamu eeteen, asi ea gichea daahaata jeata Dawdi gil was siideanyu bea gadiyeeda ea fuga Lawi gadiyeesean.”

²³ Hean ghwahidu ng'asheanda NG'UTAMIIDA heeda Yeremiya.

²⁴ “Heapi gidarugu fiisu mii innya bea gideaba ‘NG'UTAMIIDA gealga ghayi asiyeenya loat nihista’? Asi nih gidafoolda fugeasu gil, aba gideaba ea mawoosa eemoojiga aba madeeda nyaawa.

²⁵ Gwayi NG'UTAMIIDA, inyas ea mamajeegiida neajeedeanyu bea askweari ea deaba eawa, ea hamurajeega humng'eeda ea ng'eanyiida;

²⁶ abeeda gaydajakta jeata Yakobo ea Dawdi was siideanyu bea gadiyeeda, ak ea maydaloat siyagi aba jeataanyi goombal jeata Abrahamu, Isaka, ea Yakobo. Aba gideaba gaydeadeelu fuga nyaawa mida ghealooniga ak gaydabwayda saawa.”