YEREMIYA 31 - Bibliyeeda Ghaydit

Fuga Israeli gabiikta ng'eang'da nyaawa

¹ “Gwayi NG'UTAMIIDA, gayghwahidu damanda jea doawa ASEETA fuga sean bea Israeli, nea saawa gayghoah fugeasu.”

² Ak gwayi NG'UTAMIIDA, “Fugiga ghayi siramagu aba ng'utean, ghwanyas dagheerjeanduumeeda aba dareapcheeda damanda gaseewa fuga Israeli fuufta.

³ Ghayi gabusean NG'UTAMIIDA ak gwayi, asi naabwariinyeeyi aba bariinyeega manda muudeanooda, ak gaydandeawa doobiiwnata aba headaang'u.

⁴ Gaydadeasnyi gicha, ak gajeadeasnyi, Ea huda miyeasat bea Israeli, ak gajuna jeeda deangheeda nyaawa aba hooseaneega.

⁵ Ak gayhista sabiibu gicha aba uhuuda giijeega Samariya, fuga hista gaygwahista ak gaygahoosan aba haghweagaaschi.

⁶ Aba gideaba gwanda eaweeda jea gaguurdeawa furiischoocheanda uhuuda heayeeda ng'eanyiida Efraimu, ‘Ang'eada, ak geescheang'di eeweaya Sayuni Heeda NG'UTAMIIDA was ASEETEANYA.’”

⁷ Aba gideaba gwayi NG'UTAMIIDA, “Asarmasiina Yakobo aba hooseaneega, Nea goolaksi nyeashta haw bea hooseaneega eemoojiga, Arukwiida nea ghoatawji giigheambiita, nea gooyeenyi, ‘Ea NG'UTAMIIDA lealni fugaagu Boosteanga Israeli.’

⁸ Ng'ula gaydeana saawa wiilooda ng'eanyiida ghayeawa, Ak ghaabwadi geat saawa aba muudeanooda ng'eanyiida. Ak gayghapka gea ng'oowi ea gea jikiida, Ea gadeemga gweayiideadi, ea gea bearji lajooda jeata, Ak gaygabiigu hiji eemeeda haw.

⁹ Gayghapka nea gooyeawda, Ak gaydaadoabiiw nea ghaahawdi, nea geasiikschi heeda eenda mida beega, bea naweeda doabiiwaat, nea aba naweedida ea maygwaruusa geat, aba gideaba aniini geawooschi ghweanda Israeli nea Efraimu ea duweacheedeanyu gil.

¹⁰ “Ooleeysiiniit ng'asheanda NG'UTAMIIDA, Ea eemoojiga, arukwiida aba ng'eanyoojiga sheagi bea ghuuta basooda, nea gooyeenyi, ‘Dea adabwaarda fuga Israeli gayghabwadageat niny, nea niny gaygafurda gidafuriideayda jeagiischoocheanda gisilgaaschi.’

¹¹ Aba gideaba NG'UTAMIIDA nisiksa Yakobo nea gootina niny geatinga dea hoauur ea gaburdeawa niny.

¹² Ak gayghapka ak gwasarman aba ghuuta haw aba uhuuda giijeeda Sayuni, nea geesalsa alooheeda NG'UTAMIIDA, ak booga, ea difaayi, ea nagheeda, ea dayeega manang'i bea gisilga, ea muhooga, ea gurooruunatka nyaawa gaygawuurji boostaaneeda siyiin beega ak ea maygut ghang'ut gurmeahiida.

¹³ Hean gahoosan haweega nea ghang'was, nea eara gheareemanga ea gweargwa gahoosan, aba gideaba gaydayam giinyahuushooda nyaawa ghoah hooseaneega ak gaydaahaawda saawa, nea ghaadawji saawa hooseaneega nea geageandeawi gurmeahiida.

¹⁴ Ak gaydealang'u gurooruunatka ashoohoodiga, aba ghashneeda, nea fugeasu gaygwalang'u aba alooheedeanyu gwarugu NG'UTAMIIDA.”

Baydeayda NG'UTAMIIDA aba heeda fuga Israeli

¹⁵ Ak gwayi NG'UTAMIIDA: “Siyiiy ghuuta siida aba Rama, shooka ea heareega raanya. Raheli gooyeawda diibigaaschi, nea mamwasa eara hawdeayda aba gideaba diibigaaschi mudu gwanda.”

¹⁶ Ak gwayi NG'UTAMIIDA: “asi nabwa ghuutaang'u adiiyeawdi nea eara gheanyangaagu adagwarina dabeaka, aba gideaba gaynyasa giimearda aba gadiyeadaang'u, gwarugu NG'UTAMIIDA, ak gayghapka nea gwaleabu ng'eanyiida weajoocheandaang'u.

¹⁷ Nea gwanda rarooda aba eawoojigaagu huuydean, gwarugu NG'UTAMIIDA ak diibigaagu gaygabiigu ng'eanyiida nyaawa.

¹⁸ Aba huumwa naayiinyi ghuuta Efraimu, nea gooyeawdeaydunu, ‘Nilaschaan ak ea silasan, nea geawuurjeewi meayda mwanala yooki, yamwaan ak gaydayamwa, aba gideaba ang'iing'i guwoosi NG'UTAMIIDA was ASEETEANYU.

¹⁹ Aba huumwa iisiyamwan geaduukuuni Ama ng'ata giinealshooda sinalan, Hean ghaang'waanyi madeang'deanyu, ak ghaabwaspwaschi, Asaha ak geahirbabanyi, aba gideaba geageandi baspaseega gheareemaneanduumeedeanyu’.

²⁰ Efraimu orjeedeanyu aabwariinyi niny jeepteanyu aabwariinyi muuchi gil nea inyeesa iyeamuuwji, abeeda ea gudu daapkaat. Gurooroodeanyu inyeesa gagal headaanyi aba alooheeda aba huumwa gaydabwayda niny, gwarugu NG'UTAMIIDA.

²¹ “Aroora naweadingaagu, miinda geediga jea aroorana, apkaada muuchi naweedida haw bea bareandean, naweedida ilaabiin; Biikni ea huda miyeegeanu bea Israeli, biikni heeda mujiinajeesu ikaaguun.

²² Ak gayneaydooscheena ea ghoah eeju, Ea huda miidoabiiwaat? aba gideaba NG'UTAMIIDA nisin ng'asheanda eesh aba badayda ng'eanyiida gatmooda gaygafur ng'eedeeda.”

Nyageadayda mida mwadi

²³ Gwayi NG'UTAMIIDA bea lugweega was ASEETA Israeli; “Inyas geabiikti danung' ghwanyagaada fuga Israeli Abeeda saawa gaygwarukwiida ng'asheesu aba jeeda ng'eanyiida Yuda ea jeeda ng'eanyiidaanyi sean nea gwayi, ‘Gagasa gagoonyi NG'UTAMIIDA ghawooda, Ea ng'eanyiida miy Ea heayeeda ghaydit!’

²⁴ Ak fuga Yuda ea mujiinajeagaaschi sean, gaygoobiida hijagi sea fuga barooda ea fuga aheagwiischi ea gisilga nyaawa.

²⁵ Gea mideawa bureanda gaydanung' goosha bureanda nyaawa, nea gea mandeawana uurjeenga gaydanung' ghwanyas uurjeenga.”

²⁶ Hean ghaang'eachi, ak ghaang'weardi ak ruweangeasu ea innya aba heedeanyu.

²⁷ “Ng'ula gayghwahidu eawoojiga gwarugu NG'UTAMIIDA, jea danyiida ng'eanyiida Israeli ea ng'eanyiida Yuda buuneeda ea diyeanga, gawuurji gidahissideayda siida histeanga.

²⁸ Nea aba damanda easikteawi ghaaloati, ak geajakti, ghaarughusti, ak ghaadataschi, ak ghaalaschi uhuuda nyaawa, abeeda gaydabada gideaba gaydang'aapta ak ghaadeaschi, gwarugu NG'UTAMIIDA.

²⁹ Ak eaweedida ea maygudu gwayi buuneeda: ‘Gweargwa niyaak sabiibooda ng'waan. Ak geeshatka diibiga nyaawa ea nideang'suusi.’

³⁰ Ak gaygaba siisi jea ghabwar riing'eadaanyi, nea gabwageaw, nea gilinyoo ghwaak sabiibooda ng'waan geeshatkaaschi gaygwadeang'suusi.

³¹ “Ng'ula, gayghwahidu eawoojiga, gwarugu NG'UTAMIIDA, ea dasina neajeedeesh sea fuga Israeli ea fuga Yuda.

³² Nea mawuurji neajeeda ghayi easinyi sea ghweaniga nyaawa, damanda ghayi ang'waanyi saawa ak gearuuni ng'eanyiida Misri, earapeadi datas neajeedeanyu, earapeadi eawooschi siyeeda aba heeda nyaawa, gwarugu NG'UTAMIIDA.

³³ Ak neajeeni gaydasin sea fuga Israeli, iing'ata eawoojigiga, gwarugu NG'UTAMIIDA, gaydayiin diigheandeanyu jeenyaawa ea jeeda gurooruunatka nyaawa, gaydang'waar ak gaydoaw ASEETA nyaawa, nea saawa gayghoah fugeasu.

³⁴ Nea manda siida jea ghoanaal giischeewoocheandaanyi, ghana orjeeda ghaamwat, nea gwayeesha, ‘nala NG'UTAMIIDA,’ aba gideaba gayghwanalan sean, ghang'eada dea mwanang'eawa saawa aba jeenyaawa, Ea ghoah dea haweewa saawa aba jeenyaawa, gwarugu NG'UTAMIIDA, aba gideaba gaydasamsa giidiinyeanyeeka nyaawa, nea maygudu daapkaat riing'eega nyaawa.”

³⁵ Gwarugu NG'UTAMIIDA, dea adawi buuneeda aseeta arearu, ak ghoah weeshinda askweari nea sheeda ea miinga ghoah weeshinda eawa, dea inyeesa ghwanung' gabalagu basooda nea gwajaku laweajajeagaaschi– NG'UTAMIIDA bea lugweega gheawungaaschi gil.

³⁶ “Haleanjeeni sibwatiin inyas ghang'amwa madeedeanyu, abeeda jeata fuga Israeli ea maygudu ghoah buuneeda aba madeedeanyu damanda manda muudeanooda.” Gwarugu NG'UTAMIIDA

³⁷ Gwayi NG'UTAMIIDA, “inyas geamu eeteen humng'eeda nea geamu eanyas sindeeta ng'eanyiida aba hoowa hiing'aadaan, abeeda gaydajakta jeata fuga Israeli aba badayda suh sean siniin, gwarugu NG'UTAMIIDA.”

³⁸ “Ng'ula, ghwahidu askwearjoojiga gwarugu NG'UTAMIIDA, gajeadeas mujiineani aba badayda NG'UTAMIIDA, ghang'eada madalooda Hananeli ea gagul ghwanooda dooshta.

³⁹ Nea mareamarooda siiteeniida gaygawa mwadi ea ghwahita heayeeda Garebu, ak gayghaghwan geaw ea ghwahita Goa.

⁴⁰ Nea moangoachiyda sean bea muscheeka ea deareeda ea madameega sean ea ghwahita ghealooda Gidroni nea gagul ghwanooda dooshta faraasi, mida meatkweeda ghayeawa, gayghoah heeda ghaydit bea NG'UTAMIIDA mwajealoata nea majeenyarja damanda manda muudeanooda.”