YEREMIYA 30 - Bibliyeeda Ghaydit

Neajeeda NG'UTAMIIDA sea fugaaschi

¹ Ng'asheanda hidu heeda Yeremiya nea gwaleabu heeda NG'UTAMIIDA:

² “Gwayi NG'UTAMIIDA was ASEETA Israeli: Ng'oorsiina jeeda gitaabu ng'asheega sean earukuneey.

³ Aba gideaba gwayi NG'UTAMIIDA, ng'ula gayghapka eawoojiga jea deadeelsa fugeasu nyageadayda, fuga Israeli ea Yuda, gwarugu NG'UTAMIIDA, ak gaydanung' gabiigu jeeda ng'eanyiida ghayi aadawji ghweaniga nyaawa, ak gaygoombal.”

⁴ Suh ng'asheega baloola NG'UTAMIIDA gil aba badayda Israeli ea Yuda;

⁵ “Gwayi NG'UTAMIIDA: Siyiinyi ghuuta shookcheanda muuwda, bea haloota, nea maba hoyyoo.

⁶ Ooteemsheena, ak ghoadaayi, heapi ng'eedeeda ghoamu gwaji baleanda? Ghwasaan anda ghaadaayi gilinyoo ea ng'eedeeda gil ghoang'waay manandaanyi aba geatingaaschi gawuurji gatmooda mideawa lajuutka? Nea eara gheamamuunatka nyaawa ea niyamwa oorma?

⁷ Aba huumwa eaweedida gajea haw Manda eaweeda jea eegala; Eaweeda giiseaneega gil aba fuga gheeh Yakobo; Ak eara gwasa gajeelealna jeedida.

⁸ “Gwayi NG'UTAMIIDA bea lugweega, iining'ata eaweecheandida, abeeda gaydahirjeawi yookeeda mida gheatkweaka nyaawa, nea geang'acheaway munyaloalajeega gheatkweaka nyaawa, nea eara rabasta ea maygudu ghwanung' ghoah saawa soomjooga nyaawa.

⁹ Ng'ata gaygagadiyeesa NG'UTAMIIDA was ASEETA nyaawa, ea sugoocheanda nyaawa siguura Dawdi, jea daaghaambiit ghoahaaghwa saawa.

¹⁰ “Adiidu gibeali, Ea Yakobo gwarugu NG'UTAMIIDA, siideanyu bea gadiyeeda, Adiidu gigiisani, Ea Israeli; aba gideaba, gaydalealneey nea gindi dea sheagi, ea jeacheengaagu mida ng'eanyiida siipaleaksa. Yakobo gaygabiigu ak gaba seayu, ak ea manda siichea ghoabeal.

¹¹ Aniini geandeayi sea ang'iing'i, gaydalealneey, gwarugu NG'UTAMIIDA, ak gaydahuuyda eemoojiga ghayi eanung' adarsiina jeeda nyaawa, ak agooga ea maydahuydaneegwa. Gaydaaganeeyi ghoorjooda beacheeweeyi, nea ea maydasikseegwa nea miideargweakseegwa.

¹² “Aba gideaba gwayi NG'UTAMIIDA: Dam eamgaagu maygaheaba, ak eara deaneaduutkaagu ea maygaheaba.

¹³ Manda siichea gwaduupeegwa, Nea ea manda meajooda jea ghoahaap deaneadeadaang'u Nea manda gichea ghoahaapnyi.

¹⁴ Nea ng'wasangaagu ea mudu ghoapkaanyi; Mudu gwaduupeeyi; Aba gideaba naabwardaneeyi gil eawooschi weajoocheanda, Siyaaganeeyi ghoorjooda manda baydeayda, Aba gideaba ramaseandaang'u aahaw, Nea riing'eagaagu ea saang'a muuchi.

¹⁵ Ghwasaan giiyeawdi dameamgaagu? Sawanaduutkaagu maygoosha Aba gideaba ramaseanyeekaagu aasaang'a Nea riing'eagaagu aasaang'a muuchi Ghoaw gideasimaneeyi ng'asheesu seaniin.

¹⁶ Asi gilinyoo gwasawanyi, eara niny gajeesawan, Nea weajoodigaagu sean, aba giteena sean gajeepaleak; Nea gea ghaseegwa eara saawa gajeeghas, Ak eara gea ang'waanyeagwa eara saawa gajeeng'waayi.

¹⁷ Ak gaydeadeelneeyi majeeknataang'u, Nea eara deaneaduutkaagu gaydaahaap, Gwarugu NG'UTAMIIDA earapeadi siguureeweeyi dea sijakta: ‘Sayuneeda mudu gwanda siituuba!’

¹⁸ “Ng'ata gwayi NG'UTAMIIDA: “Ng'ula gaydeadeelu nyageadayda maheemajeega Yakobo, Ak ghaabwaydi heeda abiita; Nea mujiini gajeedeeksa badayda eemeegaaschi, Nea gheeda sugoocheanda gajeebiikta eedeeksa heeda ghayi bea mwadi.

¹⁹ Nea jeeda nyaawa gaygwarina duumjeenga badiischooda, Ea nyeashta fuga hoosana. Gaydanung' ghoahaada nea maygang'ayiit, Gaydanung' eesisa mureeda nea majeang'ay.

²⁰ Diibiga nyaawa gaygawuurji gida ghayi bea mwadi; Nea gayghoahaada guuyeeda nyaawa aba madeedeanyu, Ak gaydaaga ghoorjooda gea minighis saawa.

²¹ Nea sugoocheanda nyaawa gaygaba jeeda nyaawa, Nea sugoocheanda gea goombal saawa gaygwarina jeeda nyaawa; Gaydanung' gwaneekiisean, ak gayghwahidu murdeedeanyu, Aba gideaba gayghoamu ng'eaha gwaneekiisean aba uurdaanyi? Gwarugu NG'UTAMIIDA?

²² Ak gajahuuwa fugeasu, Ak eara aniini gaydoaw ASEETEANG'WA.”

²³ Ng'ula, siilakghta NG'UTAMIIDA Niiruudu nyarastaanyi, Ea shaarareeda ng'waan Gaygoobisa iheenga fuga munyas.

²⁴ Nyarasta ng'waan bea NG'UTAMIIDA maygabiikta bwadaw Bwak ea ghoahiit gidagasa gurooroadaanyi. Nea ng'asheesu gajanala jeeda askwearjoojiga jea ghwahidu.