YEREMIYA 29 - Bibliyeeda Ghaydit

Barawajeanda Yeremiya weah heeda fuga Yahudi aba Babeli

¹ Suh ng'asheega barawajeanda ajeaksa Yeremiya aba Yerusalemu gweargwa mida ghealooniga, ea ashoohoodiga, ea sibanga ea buuneeda sean, ghayi aat Nebukadinesa Babeli nea ghang'eada Yerusalemu.

² Nea ng'asheanji gwasin nea abeeda ea niweewa Yerusalemu sugoocheanda was Yekoniya, sea ghaamwat, ea fuga hees bea Yuda ea Yerusalemu, ea gearnoodiga, ea fuga gadiydooschi gidayeeka.

³ Nea barawajeanda ghwaada geadi Elasa orjeeda Safani, ea Gemariya orjeeda Hilkiya, was gea ajeakta Sedekiyaheeda was sugoocheanda Yuda, gaweay Babeli heeda sugoocheanda siguura Nebukadinesa. Nea barawajeanda ghwanyaashtunu:

⁴ “Gwayi NG'UTAMIIDA bea lugweega, was ASEETA fuga Israeli, heeda fuga ghayi earuuteawi Yerusalemu, ak geanung' gaweay ghealooniga aba Babeli:

⁵ Adeasa gealga ak ghoamwanyi jeesinga; ahista booga ak ghoayaaji gichea ghwaheas jeeda.

⁶ Ageesheena ak goojiili diibiga haweega ea gea orjooga, ak goonyeariisi orjoogeagwa gadeemga, nea ghoayeashti haweegeagwa, ak gaygwaji haweega ea orjooga, ooheadiischeena nea adiidu goong'ayiichi.

⁷ Agasa nyageadayda aba jeeda mujiineeda aayaadeegwa ghealooniga, amoasha NG'UTAMIIDA aba badaydeaba mujiineani, aba gideaba iinyas nyageadayda eara agooga gajanyagaada.

⁸ Aba gideaba gwayi NG'UTAMIIDA bea lugweega, was ASEETA Israeli; Adiidu ghoamwaschi gwareenganeegwa sibanga ea deareemng'ajeega mida jeedeang'wa, nea adiidu gooleeysiit giirgweatka nyaawa;

⁹ aba gideaba inyeesa gwaramooraseegwa ng'uyeega aba gheawungeasu; nea ea miideajeagu. Gwarugu NG'UTAMIIDA.

¹⁰ “Ng'ata gwayi NG'UTAMIIDA, “Iyoanyiichi gweanyeew laadam ea damanamughuush aba Babeli, abeeda gaydabareaseegwa, ak ghaahiichi neajeedeanyu, ak gaydaaghuumneegwa hiji.

¹¹ Aba gideaba gwayi NG'UTAMIIDA, aniini ghaanali gida eabadayi aba badahuukeagwa, gea bea nyageadayda, maba munyinda, ak ghaahiimneegwa ghusooda.

¹² Ak abeeda gajaguurneani ak gajapkaani amoasha ghawooda, ak gaydealeeyseegwa iit.

¹³ Ak gajagaseadanean ak gajanyasaan; inyas googaseadaneani aba gurooruunatkeagwa,

¹⁴ ak gajanyasaan, gwarugu NG'UTAMIIDA, ak gaydanung' anyasa nyageadayda ak geaweamneegwa aba jeeda eemoojiga sean ea jeeda ng'eanyoojiga sean ghayi eahooseegwa, ak gaydaaghuumneegwa heeda ghayi earuuteawaneegwa ak ghaanung' aweayeena ghealooniga.

¹⁵ “Agooga nooyeenyi, ‘NG'UTAMIIDA ninyakneasa sibanga aba Babeli.’–

¹⁶ Ak gwayi NG'UTAMIIDA aba badayda sugoocheanda apteadawa hoorgeeda gheambalmeeda bea Dawdi, ea fuga sean abiita jeedeaba mujiineani, ea buweadeegeagwa ghayi mooteayeewani ghealooniga.

¹⁷ ‘Asi gwayi NG'UTAMIIDA bea lugweega; Ng'ula, gaydajaksa ng'uta jeeda nyaawa, ea geejeeda, ea geeyooda muy, nea ging'ulayi gaydanung' gawuurji haghweega munyas bea shaboogheecheanda mwoamu eayaak.

¹⁸ Nea gaydaat geeshta aba ng'uta, ea geejeeda, ea geeyooda muy, ak ghoah gichea easit aba jeeda gheambalmoojiga sean bea ng'eanyiida, ak ghoah gida simwaashta, gichea goobeeli fih, gichea eemachiida nea geefool aba bugusta eemoojiga ghayi eahoosi jeenyaawa,

¹⁹ aba gideaba mooleeysiina iit ng'asheegeasu, gwarugu NG'UTAMIIDA, earukuneegwa galeagasean aba ghuusiga fugeasu bea gadiyeeda was sibanga, ak hean ghoaheawi ooleeysiina iit, gwarugu NG'UTAMIIDA.’–

²⁰ Oaleaydiit ng'asheanda NG'UTAMIIDA, agoogeeda sean earuuteawaneegwa Yerusalemu ak ghaanung' aweayeena ghealooniga aba Babeli:

²¹ ‘Ng'ata gwayi NG'UTAMIIDA bea lugweega, was ASEETA Israeli, aba badayda Ahabu was orjeeda Golaya ea Sedekiya orjeeda Maaseya, ghayi ramooran ng'uyeega aba gheawungeasu: Ng'ula gaydaahaak saawa geatinga Nebukadinesa was sugoocheanda Babeli ak gayghabwar goosha aba madeedeang'wa.

²² Nea aba gisin saawa, gilinyoo gwanda ghealooniga gaygwarukwiida mooshteawi nea gwayeena, “Gagasa ghwanung' NG'UTAMIIDA uurjeewana Sedekiya ea Ahabu ghayi ghwarda sugoocheanda Babeli,”

²³ aba gideaba gwasin ng'asheega baspaseega aba Israeli, ak gamealuuli sea gadeemga giischeewda nyaawa, ak gwarukwiida ng'asheega ng'uyeega aba gheawungeasu, ng'asheanda ghayi mii dayeesha asina, ng'asheesu ghaanali, nea naaghwaldi ghaang', gwarugu NG'UTAMIIDA.’”

Barawajeanda Shemaya

²⁴ Ak gajeeshiina Shemaya orjeeda Nehelamu:

²⁵ “Gwayi NG'UTAMIIDA bea lugweega, was ASEETA Israeli: “Niijeakti barawajeanda aba gheawungaagu gaweesa fuga sean mida Yerusalemu, ea heeda ashoohoocheanda siguura Sefaniya was orjeeda Maaseya, ea heeda ashoohoodiga sean nea giyeeshi,

²⁶ ‘Ang'iing'i ninung' NG'UTAMIIDA una hoorgeeda ashoohoocheanda siguura Yehoyada, ak ghwanung' miineadaysiina gheeda NG'UTAMIIDA ak gilinyoo gaba geaw iiramoaran, gajang'waanya ak giradayi aba ghealooniga ea munyaloalajeega.

²⁷ Ghwasaan anda mii miina gheang'da Yeremiya bea ng'eanyiida Anatoti aba gideaba gagala geaw sibanga?

²⁸ Aba gideaba goojeagu iita Babeli, ak gwayi, “Agooga gajoopiidaana ghealooniga gil geaw, adeeksheena ak goopiidi gealgeagwa, abwara madameegeagwa ak ghoayaaji gichea ghwaheas jeeda.”’”

²⁹ Ng'ata ghoasoamwa barawajeanji ashoohoocheanda siguura Sefaniya aba madeeda Yeremiyaheeda was sibaneeda.

³⁰ Ng'ata ghwahidu ng'asheanda NG'UTAMIIDA heeda Yeremiya, ak gwayeesha,

³¹ Ajeaksiina iita fuga mida ghealooniga, ak giyeeshi, ‘Nih gida rugu NG'UTAMIIDA gil aba badayda Shemaya was siida ng'eanyiida Nehelamu: Aba gideaba Shemaya niramooraseegwa earapeadi mii deajeagu, ak ea ninung' aghusa ng'uyeega,

³² ak aba ng'asheanji gwayi NG'UTAMIIDA: Ng'ula, gaydeargweaksa Shemayeeda ng'eanyiida Nehelamu niny sea jeacheangaaschi; ak ea maygwanda eara siyagi jea eapuut aba jeeda fugaaschi jea ghwadaah miyeenooda jea dasisa fugeasu, aba gideaba ninung' ghaheawa buuneeda NG'UTAMIIDA.’”