YEREMIYA 28 - Bibliyeeda Ghaydit

Yeremiya sea sibaneeda siguura Hananiya

¹ Hean aba jeeda sheedeaba muut bea gweaydeaba ang'wan bea gweayda ang'eada gheambalmeeda sugoocheanda siguura Sedekiya bea Yuda, hean goobaloolan aba jeeda gheeda NG'UTAMIIDA, ea madeeda ashoohoodiga, ea madeeda buuneeda Hananiya was orjeeda Asuri, nea niny abeeda ea sibaneeda gil nea gwaleabu ng'eanyiida Gibeoni, ak gwayi,

² Gwayi NG'UTAMIIDA bea lugweega, was ASEETA fuga Israeli: “Neahirji yookeeda sugoocheanda Babeli.

³ Aba jeemba gweanyeew iyeenya gaydeadeelu hiji dabita sean bea gheeda NG'UTAMIIDA ghayi geandeawa hiji Nebukadinesa sugoocheanda Babeli.

⁴ Ak eara sugoocheanda Yuda siguura Yekoniya bea Yehokimu gaydanung' gabiigu niny sea fuga sean ghayi siyaat ghealooniga, aba gideaba gwayi NG'UTAMIIDA, gaydahirja yookeeda sugoocheanda Babeli.”

⁵ Ng'ata goobalool Yeremiya sibaneeda siguura Hananiya aba madeeda ashoohoodiga ea madeeda fuga miinaada aba madeeda gheeda NG'UTAMIIDA;

⁶ ak gwayi Yeremiya, “Amin! Gagasa ghoadoabiiw NG'UTAMIIDA; gagasa ghwanung' NG'UTAMIIDA ghoah huumwa ng'asheega ramoorani, ak ghwanung' gabiikna Babeli dabita gheeda NG'UTAMIIDA sea fuga sean ghayi weay ghealooniga.

⁷ Asi ayiinya ng'asheesu ghamneawa eargu aba madeedeang'wean ea madeedeaba fiisu seaniini.

⁸ Sibangeaba garayi ghayi asheedeaweasa ang'iing'i ea aniini saawa ghwaramoar ng'ucheeda, ea geejeeda, ea geeyooda muy gayghang'ut ng'eanyoojiga saang'a ea gheambalmoojiga hees.

⁹ Nea inyeesa sibaneeda ramooran hoyyoo, inyeesa ng'asheega sibaneeda ghayi rugu gideaba goojeagu NG'UTAMIIDA ii was huumwa ng'asheagaaschi.”

¹⁰ Ng'ata gageandeawa Hananiyaheeda was sibaneeda yookajeega mida gheata Yeremiya, ak gwahirjeawi.

¹¹ Ng'ata gabalool Hananiya aba madeeda buuneeda sean, ak gwayeesha, “Gwayi NG'UTAMIIDA bea lugweega: Gaydahirjeawi aba jeemba gweanyeew iyeenya yookajeega Nebukadnesaheeda was sugoocheanda Babeli mida gheatkweaka eemoojiga sean.” Ng'ata ghang'eat gawa Yeremiya.

¹² Ng'ata nea niihiit sibaneeda siguura Hananiya hirjeawda yookajeega mida gheata Yeremiya, hean ng'asheanda NG'UTAMIIDA heeda Yeremiya, ak geeyeesha,

¹³ “Una ak giyeeshi Hananiya: ‘Gwayi NG'UTAMIIDA, Ang'iing'i nihirjeawayi yookeeda sisna gunyugweaka, ak aniini gaydasissa saawa yookeeda nyaawa bea gharinga.

¹⁴ Aba gideaba gwayi NG'UTAMIIDA bea lugweega, was ASEETA fuga Israeli: Nearasi gheatkeakeaba eemoojisu yookajeega sisina gharinga bea soomjeanduumeeda, ak gaygagadiyeesa Nebukadinesa was sugoocheanda Babeli, aba gideaba niny naadawji eara diyeanga jarooda.’”

¹⁵ Ng'ata gwayeesha Yeremiya sibaneeda siguura Hananiya, “Aleaydiit, Ea Hananiya, ang'iing'i miigoojeakneey NG'UTAMIIDA, nea ea ninung' ghamwas fiisu ng'uyeega.

¹⁶ Ak ghamneawa ging'ulayi, gwayi NG'UTAMIIDA, ‘Ng'ula gaydaang'aamwaneeyi badayda ng'eanyiida, nea gaymeawa aba jeedeaba gweanyi aba gideaba niihaagi buuneeda sidita NG'UTAMIIDA.’”

¹⁷ Nea aba jeedeaba gweaydida sheedeaba ispwa, hean ghami sibaneeda siguura Hananiya.