YEREMIYA 27 - Bibliyeeda Ghaydit

Yeremiya ghwayiin gheataanyi yooki

¹ Nea ghoang'eat gheambalmeeda Yuda sugoocheanda siguura Sedekiya bea Yosiya, hean ghwahidu heeda Yeremiya ng'asheanda leabu heeda NG'UTAMIIDA nea gwayeesha,

² Hean gwayeeshiinean NG'UTAMIIDA: “Sisiina geaw mareamarooda ea yookeeda ak girasi gheataang'u.

³ Ajeaksiina giijasta sugoocheanda Edomu, ea dea Moabu, ea sugoocheanda orjooga Amoni, ea sugoocheanda Diro, ea dea Sidoni aba geatinga giijasoodiga fuga Yerusalemu heeda Sedekiya was sugoocheanda Yuda.

⁴ Rukusiina ng'asheanda jea gwarukusa fuga nyaawa hees: gideaba, ‘Gwayi NG'UTAMIIDA bea lugweega, was ASEETA fuga Israeli: Nih gichea arukusiina fugeagwa hees gil:

⁵ “Aniini gil dea aabwachi ng'eanyiida ea buuneeda, ea diyeanga mida badayda ng'eanyiida aba uurdeanyu ea aba geatindeanyu doabiiwaat ak inyeesa ghaadawji siida bwariiy gurooroodeanyu.

⁶ Ng'ata ghamneawa naadawji Nebukadinesa sugoocheanda Babeli, was siideanyu bea gadiyeeda ng'eanyoojisu seaniin, ak eara diyeanga sean mida badayda ng'eanyiida ea naadawji niny danung' gagadiiyeesa.

⁷ Nea eara eemoojiga sean gaygagadiyeesa niny sea orjeedaanyi ea diibigeaba gaaschi, bwak ea gagul damanda jea ghoabeada ng'eanyiidaanyi; ak abeeda eemoojiga saang'a ea sugoodiga hees gayghwanung' ghoah niny soomjeanda nyaawa.

⁸ Ng'ata gwayi NG'UTAMIIDA, “‘“Inyas eemeanagi ghana sugoocheanduumeanagi ii magadiyeesiina Nebukadinesa was sugoocheanda Babeli, nea marasiina gheatkweaka nyaawa yookeeda sugoocheanda Babeli, abeeda gaydaaga ghoorjooda eemeeni aba ng'uta, ea geejeeda, ea aba dawni, bwak ea dahuuyda saawa aba geatindaanyi.

⁹ Adiidu gooleeysiit sibangeagwa, ea fugeagwa bara lagheanga, ea deareemng'ajeegeagwa, ea giijoodigeagwa, ea beeneedigeagwa, eeniiseegwa, ‘Agooga majagadiyeesiina sugoocheanda Babeli.’

¹⁰ Aba gideaba ng'uyeega gil gidaramooraseegwa, ak hean gayghwanung' eang'aamwaneegwa ng'eanyiideang'wa, ak gaydahooseegwa heeda sheagi, ak hean gajooshealana.

¹¹ Aba ng'eanyiida nyooh gwarasa gheatkweaka nyaawa yookeeda sugoocheanda Babeli nea gagadiiyeesa, abeeda gaydanung' goobiida ng'eanyiida nyaawa, gaydanung' ghabwar ng'eanyi nea ghoabit ng'eanyi, gwarugu NG'UTAMIIDA.”’”

¹² Nea eara Sedekiya was sugoocheanda Yuda ea nearukusi ng'asheega uurji suh, gideaba, “Rasiina gheatkeakeagwa yookeeda sugoocheanda Babeli, ak googadiyeesi ak abeeda gaybeaha seayu.

¹³ Ghwasaan gaymwasa ashealana ang'iing'i sea fugaagu aba ng'uta, ea geejeeda, ea aba dawni, gawuurji gida ghayi nyaashta NG'UTAMIIDA aba badayda eemeeni, maygagadiyeesa sugoocheanda Babeli?

¹⁴ Adiidu gooleeysiit ng'asheega rukuneegwa sibanga nea gwayeena, ‘Adiidu googadiyeesi sugoocheanda Babeli,’ suh ng'asheega ng'uyeega gil.

¹⁵ Aba gideaba gwayi NG'UTAMIIDA, Aniini mii deajeagu sibang'su, inyeesa gwaramooran ng'uyeega aba gheawungeasu, ak aba ng'asheanji gaydahooseegwa dea sheagi ak gajooshealana, agooga sea sibanga ramooriiseegwa.”

¹⁶ Ng'ata geabalooli ashoohoodiga ea fiisu seaniin, nea geayeeshi, Gwayi NG'UTAMIIDA, “Adiidu gooleeysiit ng'asheega sibanga inyeesa gwaramooraseegwa nea gwayi, ‘Ng'ula, dabita gheeda NG'UTAMIIDA gajeebisa eeteelna Babeli,’ suh ng'asheega ng'uyeega gil gea ramooran.

¹⁷ Adiidu gooleeysiit saawa, agadiyeesiina sugoocheanda Babeli ak gajabeaha seayu. Ghwasaan gajamwasa ghoah mujiineani raghoonyeanda?

¹⁸ Inyas saawa ea sibanga, nea inyas ng'asheanda NG'UTAMIIDA gwanda jeeda nyaawa, abeeda ginung'waadi gamearmearani NG'UTAMIIDA bea lugweega, gideaba dabita sinung'wa jeeda gheeda NG'UTAMIIDA, ea jeeda gheeda sugoocheanda Yuda ea jeeda mujiineeda Yerusalemu adiidu geayaat Babeli.

¹⁹ Aba gideaba gwayi NG'UTAMIIDA aba badayda daranajeega ea basooda, ea gisidiiwa haleanjeeda, ea dabita siipuusa jeedeaba mujiineani,

²⁰ nea gea mwaada Nebukadinesa sugoocheanda Babeli, damanda aat ghealooniga Yekoniya orjeeda Yehoyakimu was sugoocheanda Yuda nea ghwanung' ghabeawa Yerusalemu niny sea fuga hees bea Yuda ea Yerusalemu–

²¹ ayiinya girugu NG'UTAMIIDA bea lugweega, was ASEETA fuga Israeli, aba badayda dabita ghayi sinung'usa jeeda gheeda NG'UTAMIIDA, ea jeeda gheeda sugoocheanda Yuda, ea Yerusalemu:

²² gajeayaat gaweay Babeli ak gaygoobiida hoowa bwak ea gagul eaweeda jea daapkaat, gwarugu NG'UTAMIIDA. Ak abeeda gaydaaghuumu ak geadiiwsi hiji.”