YEREMIYA 26 - Bibliyeeda Ghaydit

Yeremiya geayaat madeeda girgweageeda

¹ Damanda ang'eada sugoocheanduumeeda Yuda Yehoyakimu was orjeeda Yosiya, hean ghwahidu ng'asheanji nea gwaleabu heeda NG'UTAMIIDA,

² “Gwayi NG'UTAMIIDA: Miinaada aba doodooda gheeda NG'UTAMIIDA, ak giidawi iita mujiinajeega sean bea Yuda ng'asheega ghayi earukusi fuga fugeani ghadooweeda jeeda gheeda NG'UTAMIIDA; nea adiidu gifunyi eara gil.

³ Gwadeepa gooleeysiit, ak gaba nih duukuuna aba naweadingaaschi munyas, ak abeeda eara aniini gaydaduukuuna munyinda ghayi eagasayi dasima saawa aba munyasnacheeka nyaawa.

⁴ Ak abeeda gajeeshiina saawa, ‘Gwayi NG'UTAMIIDA: Inyas ea mooleeysiinean iita, nea ghoayaachi huumeanyeekeasu ghayi eagoonyeegwa,

⁵ ghana iimoosissiini mureeda ng'asheega fugeasu bea gadiyeeda was sibaneeda eajeaku heedeang'wa galeagasean, earapeadi mooduupi,

⁶ Ak abeeda gaydanung' gawuurji gheawi gidaghayi eanyarjeawdi Shilo, ak gaydanung' ghoah mujiineani gida simoashta aba jeeda eemoojiga sean bea ng'eanyiida.’”

⁷ Hean ghwayiiy ashoohoodiga, ea sibanga, ea buuneeda sean ng'asheega rugu Yeremiya aba jeeda gheeda NG'UTAMIIDA.

⁸ Hean ahiit Yeremiya rukunooda ng'asheega sean ghayi adaw NG'UTAMIIDA jea gwarukwiisa buuneeda, hean ghwaang'waayi ashoohoodiga, sea sibanga ea fuga sean ak geeyeesha, “Ang'iing'i gaymeawa!

⁹ Ghwasaan ang'iing'i giramwaari aba gheawunga NG'UTAMIIDA, nea giyeeni, ‘Gheawi gaygooshealda dea Shilo, nea eara mujiineani gayghoah raghoonyeanda, maygoobiida jeeda sih’?” Hean gwaneaweesa buuneeda sean Yeremiya aba jeeda gheeda NG'UTAMIIDA.

¹⁰ Iinea ghwayiiy ng'asheesu fuga hees bea Yuda, hean ghang'eada jeeda gheeda sugoocheanda ak gaweay jeeda gheeda NG'UTAMIIDA ak goopteadawa hoorgajeega nyaawa naweeda gal gidaghuudajeega gudea eashish bea gheeda NG'UTAMIIDA.

¹¹ Ak gwayeesha ashoohoodiga ea sibanga heeda fuga hees gideaba, “Siisi gammiisa miyeeda, aba gideaba gwaramoorasa gea munyas mujiineani, gawuurji gidooyiing'si geat aba iidigeagwa.”

¹² Ng'ata goobalool Yeremiya fuga hees sean ea fuga sean, nea gwayeesha, “NG'UTAMIIDA niijeakneani daramoorasa gheawi ea mujiineani ng'asheega munyas ghayi eargu nea gooyiing'si geat.

¹³ Asi biissa ayamwa naweadingeagwa ea sinaweegeagwa, ak goosisi mureeda ng'asheega ghuuta NG'UTAMIIDA was ASEETEANG'WA, ak abeeda NG'UTAMIIDA gaygwaduukuuna aba badayda ng'asheega munyas ghayi nibada aba badahuukeagwa.

¹⁴ Ak aniini, goong'ulayi geandi geatingeagwa. Asimanean gidoadaayi gideaba ghwadoabiiw aba heedeang'wa.

¹⁵ Asi anala ng'asheanji gideaba inyas goonuuscheani, abeeda gajoahaaga geat foojeanda manda giidiinyeanda, ea badaydeaba mujiineani ea fuga mida jeeda, nea ea huumwa gil gideaba goojeakneani NG'UTAMIIDA darukuneegwa ng'asheesu seaniini.”

¹⁶ Ng'ata gwayeesha fuga hees ea buuneeda sean heeda ashoohoodiga ea sibanga gideaba, “Siisi mamiisiina miyeeda, aba gideaba goobalooleasa aba gheawunga NG'UTAMIIDA was ASEETEANYA.”

¹⁷ Ng'ata ghang'eatng'eat gwearsu ng'ay bea ng'eanyiida ak goobalool fuga bwat geat, nea gwayeesha,

¹⁸ “Damanda waseewa sugoocheanda Yuda Hesekiya ghwaramoaran Mika was mujiineeda Moresheti ak gwayeesha fuga sean bea Yuda: ‘Gwayi NG'UTAMIIDA bea lugweega, mujiineeda Sayuni gajeabwar gawuurji gida sibariida madamnyeanda; Nea Yerusalemu gajeanung' ghoah eemeega, nea giijeeda gheeda sibata ASEETA gayghoah dareabeeta haw.’

¹⁹ Heapi iyoong'ulayi Hesekiya was sugoocheanda Yuda sea fuga sean bea Yuda gwanuus niny? Iyoong'ulayi niny ea moawala gheang'da NG'UTAMIIDA, nea gamus baydeayda NG'UTAMIIDA, ak hean ea maduukuuna NG'UTAMIIDA aba ng'asheega munyas ghayi rugu jea gwasima saawa? Ghamneawa geegasayi eapuuna habitkweeda bugusteanya.”

²⁰ Nea abeeda gwanda sih nuut ramoorana aba gheawunga NG'UTAMIIDA, nea ea Uriya gil bea Shemaya, nea gaba ng'eanyiida Giriyat-yearimu. Nea gwaramoorasa ng'asheega munyas mujiineani ea ng'eanyiini gawuurji ng'asheega Yeremiya.

²¹ Iinea ghwayiiy ng'asheesu sugoocheanda siguura Yehoyakimu sea gheajiroodigaaschi sean, sea fugaaschi sean, hean gagasa sugoocheanda gwanuus niny; hean iinea ghwanyas iita Uriya hean ghang'ut muuwda, ak ghaghuudaada ea gawa Misri.

²² Ng'ata goojeakta sugoocheanda was Yehoyakini Elinatani bea Akbori sea fuga suurja gaweay Misri.

²³ Hean ghoang'waayi Uriya aba Misri ak gweadu heeda sugoocheanda was Yehoyakimu, hean ghabwara ng'uta ak gabung'sa mustaanyi heeda bung'eadinga fuga gealaani.

²⁴ Ak hean geatinga Ahikamu orjeeda Shafani ghoahaaghwa Yeremiya ea meahaaga geatinga fuga munyas ea meenuusa.