YEREMIYA 25 - Bibliyeeda Ghaydit

Weajoocheanda leabu wiilooda ng'eanyiida ghayeawa

¹ Ng'asheanda hidu heeda Yeremiya bea fuga sean bea Yuda, aba jeeda gweaydeaba ang'wan bea gheambalmeeda Yehoyakimu orjeeda Yosiya was sugoocheanda Yuda (nea abeeda ea gweayda madeeda gil bea Nebukadinesa was sugoocheanda Babeli),

² damanda rukusa sibaneeda was Yeremiya fuga sean bea Yuda ea fuga abiita Yerusalemu.

³ “Aba gweanyeew diktam ea samwagu, gidang'eada gweaydeaba damasamwagu bea gheambalmeeda Yosiya orjeeda Amoni, sugoocheanda Yuda, ea ghoah ghamneawa, gicha gabiigu ng'asheanda NG'UTAMIIDA heedeanyu, ak gearukuneegwa galeagasean, ak agooga ea mooleeysiini iita.

⁴ Ak agooga ea mooleeysiini iit nea ea mooduupi, earapeadi NG'UTAMIIDA ajeaku galeagasean giijasoodigaaschi was sibanga,

⁵ nea gwayeena, ‘Daba siisi yamna geaw aba jeeda naweadingaaschi munyas ea sinaweagaaschi munyas, ak abeeda gajanyas giibinda jeeda ng'eanyiida ghayi nigooneegwa NG'UTAMIIDA, agooga sea ghweanigeagwa aba garayi ak gayghoah deang'wa ghang'eada garayi ea ghoah damanda manda muudeanooda;

⁶ adiidu gooweayi aghadoawana nea googadiyeesi aseecheeka suuk, nea adiidu ghoanyareaschaani aba haleanjeeda oosini geatingeagwa. Ak abeeda ea maydaminighiseegwa.’

⁷ Hean gwayi NG'UTAMIIDA, agooga mooleeysean iit, ng'ata hean ghoanyareaschaani aba gadiyoojiga oosini geatingeagwa, hean ghoahaaji geat minighista.

⁸ “Ng'ata gwayi NG'UTAMIIDA bea lugweega: “Aba gideaba mii asisiina mureeda ng'asheegeasu,

⁹ ng'ula gaydeajeagu eemoojiga mida wiilooda ng'eanyiida ghayeawa, gwarugu NG'UTAMIIDA, ea Nebukadinesa siideanyu bea gadiyeeda was sugoocheanda Babeli, hean gaydanung' ghapka gang'uchi ng'eanyiini ea fuga abiita jeeda, ea eemooji ascheayi sea saawa; hean gaydahuuyda goosha, ak gaydanung' ghoah gichea easit, nea geemachiida, nea geefool damanda manda muudeanooda.

¹⁰ Ak gaydahuuyda aba jeeda nyaawa giijuureanda rearga ea giijuureanda hooseaneega, ea hooseaneega siyeeda ea gea sibeeda, ea nyeashta lagheaneeda sing'ealiida ea gheaboong'nyeanda.

¹¹ Ng'eanyiini gayghoah raghoonyeanda, ak eemoojisu gaygagadiyeesa sugoocheanda Babeli aba gweanyeew laadam ea damanamughuush.

¹² Ng'ata gwayi NG'UTAMIIDA, Nea iing'ata gweanyeew laadam ea damanamughuush, abeeda gaydaaga ghoorjooda sugoocheanda Babeli ea eemeedida, ea ng'eanyiida fuga Galdayo, aba munyasnacheeka nyaawa, ak gaydanung' ghoah ng'eanyiida gida marachi gil damanda manda muudeanooda.

¹³ Ak gaydeadu badaydeaba ng'eanyiita ng'asheega sean ghayi eargu, ea ng'asheega sean sing'oorsa jeedeaba gitaaboani, ghayi ramoorasa Yeremiya badayda eemoojiga sean.

¹⁴ Aba gideaba eemoojiga sean ea sugoodiga hees gayghoah soomjooga; ak gaydawalda aba giteena sinaweega nyaawa ea gadiyoojiga geatinga nyaawa.”

Girgweageeda ASEETA aba badayda eemoojiga

¹⁵ Ng'ata gwayeeshiinean NG'UTAMIIDA, was ASEETA Israeli: “Geandeawana geatindeanyu gikoombeeyda difaayi was nyarasta, ak giileaydi eemoojiga ghayi eajeakseeyi.

¹⁶ Hean gaygwaleeyshi, ak geanung' gwaneayi iheenga, ak gwarooda iheenga nyaawa aba ng'uta eajeaksi jeenyaawa.”

¹⁷ Ng'ata geageandi gikoombeeyda mida geatinda NG'UTAMIIDA, ak ghaanung' ghwaleaydaawa eemoojiga sean ghayi ajeaksean NG'UTAMIIDA;

¹⁸ ak abeeda Yerusalemu ea mujiinajeega Yuda, ea sugoodigaaschi ea fuga hees, gaydanung' ghoah raghoonyeanda, ea gida marachi gil, ak geemachiida ea geemooriida ea ghoah ghamneawa;

¹⁹ ak eara Farao was sugoocheanda Misri, ea fugaaschi bea gadiyeeda, ea fugaaschi hees, ea fugaaschi sean,

²⁰ ea rabasta sean mida bugusta nyaawa; ea sugoodiga sean bea ng'eanyiida Usi ea sugoodiga sean bea ng'eanyiida Filisti (was Ashkeloni, ea Gasa, ea Ekroni, ea easanga Ashdodi);

²¹ ea Edomu, ea Moabu, ea orjooga Amoni

²² ea sugoodiga sean bea Diro, ea sugoodiga sean bea Sidoni, ea sugoodiga ghuuta basooda, mida giigheawda basooda;

²³ ea fuga Dedani, ea Deema, ea Busi, ea gea laja guchoojiga nyaawa;

²⁴ ea sugoodiga sean bea Arabiya, ea sugoodiga sean bea eemoojiga guuyi abiita eeshtearajeanda;

²⁵ ea sugoodiga sean bea Simri, ea sugoodiga sean bea Elamu, ea sugoodiga sean bea Mediya;

²⁶ ea sugoodiga sean bea wiilooda ng'eanyiida ghayeawa, gea neeki ea gea sheagi, nea gabatiisiindooschi, nea sugoodiga mida badayda ng'eanyiida. Aba iining'ata saawa hean abeeda gayghwaleaydaawa sugoocheanda Babeli.

²⁷ “Ak hean gajeeshiina saawa, ‘Gwayi NG'UTAMIIDA bea lugweega, was ASEETA fuga Israeli: Aleeysheena, ea aboogida ama ng'ata gookeeschi, hean ak goobeedeayi ea araanya ng'eedita aba ng'uta eajagu bugusteang'wa.’

²⁸ “Ama inyas ghaheawa ghoang'waayi ak ghwaleayda gikoombeeyda mida geatingaagu, abeeda gajeeshiina, ‘Gwayi NG'UTAMIIDA bea lugweega: Gajaleayda aba uurda!

²⁹ Ng'ula gaydang'eat dasin gea munyas aba jeedeaba mujiineeda sing'assa gheawungeasu, iyoong'ulayi ghoamuuschi aghuuhana bayiiga? Agooga majoamuusa aghuuha, aba gideaba gaydajaksa ng'uta badayda fuga bea ng'eanyiida, gwarugu NG'UTAMIIDA lugweega.’

³⁰ “Ak abeeda gayramoarana aba badayda nyaawa ng'asheesu seaniin, ak gajeeshiina: ‘NG'UTAMIIDA gayghoaghweandan aba humng'eeda, gayghwanya ghuutaanyi aba headaanyi ghaydit abiita; gayghoaghweandan aba uurda fugaaschi; gaygoojuur nea ghwanyaashta fuga muura haghweega sabiibu; gaygoojuursa fuga sean bea ng'eanyiida.

³¹ Nyeashta gayghwanya ea gagul muudeanooda ng'eanyiida, aba gideaba NG'UTAMIIDA gayghoahaakta eemoojiga; nea gaygoorgweaksa eemoojiga sean mideawa eaweega, nea gea munyas gayghoahaak ng'uta.’ Gwarugu NG'UTAMIIDA.

³² “Asi gwayi NG'UTAMIIDA bea lugweega; Ng'ula, gayghoaptu munyinda jea ghang'eada eemeanagi ea gagul niirja, nea gaygang'eedu shaarareeda leabu dea sheagi!

³³ “Nea gea jea ghabwar NG'UTAMIIDA eaweedida gayghang'eada meatkweenagi bea ng'eanyiida ea gagul niirja. Nea majeeyeawda, ghana eamughuush ghana eebuy; gaygawuurji ng'ooyanga aba badayda ng'eanyiida.

³⁴ “Agutuuni heareega, nea gooyeawdi Ea jeagiischoodiga, ayeashta deareeda, ea sugoodiga hawanyoojiga, aba gideaba eaweeda jeeng'deang'wa ea giidaardeaydeang'wa niriighaan, ak gajoopeedeayiida lagweendiga sighwal.

³⁵ Nea ea maygudu gwanda heechea gamng'awsa jeagiischoodiga, nea eara sugoodiga hawanyoojiga ea maygwanda heechea gwasalsa.

³⁶ Oaleaydiit shooka jeagiischoodiga, ea heareega sugoodiga hawanyoojiga! Aba gideaba NG'UTAMIIDA nidatas haghweadinga nyaawa,

³⁷ nea hawaniga eawoojisu abit ng'eanyi ea siitaarda, aba nyarasta ng'waan bea NG'UTAMIIDA.

³⁸ Niwuurji ng'adiida nung'wa heeda gwaleadaanyi ng'eanyiida nyaawa niiw eeshtearajeanda nea gweagu ng'uta siida muy, ea nyarastaanyi ng'waan.”