YEREMIYA 24 - Bibliyeeda Ghaydit

Sooscheew iyeenya bea shaboogheeta

¹ Ng'ata Nebukadinesa was sugoocheanda Babeli nea niyaat ghealooniga Yekoniya orjeeda Yehoyakimu, was sugoocheanda Yuda, niny sea fuga hees bea Yuda, ea gearnoodiga, ea fuga gadiyeata gidayda, nea ghang'eada Yerusalemu ea ghwahita Babeli, hean ghoahiimnaani NG'UTAMIIDA giirgweatsu: Ng'ula ghaadaayi sooscheewi iyeenya mida jeeda haghweega shaboogheeta nea gwanda madeeda gheeda sibata NG'UTAMIIDA.

² Nea sooscheanda madeeda ghwanyiit haghweega miyaasiin gawuurji gea haghweega madeeda, nea deaba iyeenya gaba haghweega munyas, ea munyas muuchi ea mwoamu eayaak.

³ Ng'ata gwayi NG'UTAMIIDA, “Gidaahi naaha, Yeremiya?” Hean geayeeshi, “Ghaadaayi haghweega shaboogheeta, haghweega miyaasiin ea gea munyas mwoamu eayaak.”

⁴ Ng'ata ghwaan ng'asheanda NG'UTAMIIDA heedeanyu.

⁵ “Gwayi NG'UTAMIIDA, was ASEETA fuga Israeli: Giduurji haghweesu miyaasiin bea shaboogheetean, hean eara fuga Yuda gaydanung' ghamiyaasiit was gea ghayi eanung' ghang'amwa hiji ak gaweay ghealooniga aba ng'eanyiida Galdayo.

⁶ Nea gaydaahaaghwa saawa muuchi, ak gaydaaghuumu gabiigu ng'eanyiini. Ak gaydanung' gang'adu, nea maygudu danung' goobeedeayi, hean gaydang'aapta ak ea maydaloata.

⁷ Gaydanyaksa guroorooda jea ghwanal gideaba aniini geawooschi NG'UTAMIIDA, ak gayghoah fugeasu ak eara aniini gaydoaw ASEETA nyaawa, aba gideaba gaygwayamsean geat aba gurooruunatka nyaawa.

⁸ “Asi gwayi NG'UTAMIIDA: Giduurji shaboogheeta munyas mwoamu eayaak, nih ea gichea dasima Sedekiya gil was sugoocheanda Yuda, niny sea fugaaschi hees, ea easanga siipuusa ng'eanyiini, gea abiita ng'eanyiida Misri.

⁹ Gaydanung' ghoah gisisit aba jeeda gheambalmoojiga sean bea ng'eanyiida, gayghoah fuga jea eemachiida nea geebara budeayi, nea geebara reari, nea geemooriida aba hiji nyooh dahoosa gaweay.

¹⁰ Ak gaydaahaak ng'uta, ea geejeeda, ea dawni, bwak ea goosha sean aba jeeda ng'eanyiida ghayi aadawji saawa ea ghweaniga nyaawa.”