YEREMIYA 23 - Bibliyeeda Ghaydit

Gidasirar jea galanya ghwahidu

¹ “Ashageada ea jeagiischoodiga sawan nea ghoadaarda hawanyoojiga haghweedeanya,” Gwarugu NG'UTAMIIDA.

² Asi gwayi NG'UTAMIIDA, was ASEETA fuga Israeli aba badayda jeagiischoodiga ahaaghwa fugeasu: “Agooga noataardi hawanyoojigeasu ak ghoahoanyi, nea ea mudu oahaaghwana. Aba gideaba gwayi NG'UTAMIIDA, gaydeargweakseegwa aba sinaweegeagwa munyas.

³ Ak abeeda gaydaamughuush easanga hawanyoojigeasu aba jeeda ng'eanyoojiga ghayi eadearsi, ak gaydeadeelu ghapka heeda haghweeda nyaawa, ak gaygabiikta gwaji nea gooheadiischi.

⁴ Ak gaydagasa jeagiischoodiga jea ghoahaaghwa saawa, ak maygudu gwanda muuwda ghana giiseaneega nea ea maygwanda dea jea ghwaroat, gwarugu NG'UTAMIIDA.

⁵ “Ak hean gwayi NG'UTAMIIDA, “Ng'ula gayghapka eawoojiga jea danung' gafirfirsa Dawdi damealeanda doabiiwaat, ak gaygoombaliischi gawuurji sugoocheanda aba weaghuumeeda, ea huumeanda ea aba doobiiwnata aba ng'eanyiida.

⁶ Ak aba damandaanyi Yuda gajeelealu, ak eara Israeli gaygaba seayu. Nea gichea eeguura gheawungaaschi ea nihi: ‘NG'UTAMIIDA doobiiwnateanya.’

⁷ “Ng'ata gwayi NG'UTAMIIDA, Asi ang'ula gayghapka eawoojiga, jea ea maygudu gwayi buuneeda, ‘Aba gidabiideata NG'UTAMIIDA was dea aruuna fuga Israeli ng'eanyiida Misri,’

⁸ ak ‘Aba gidabiideata NG'UTAMIIDA aruuna jeacheenga fuga Israeli ak goosheedeawa aba ng'eanyiida wiilooda ghayeawa ea jeeda ng'eanyoojiga sean ghayi adearsa.’ Ak abeeda gaygoobiida jeeda ng'eanyiida nyaawa.”

Giijasta Yeremiya aba badahuuka sibanga

⁹ Nea aba badayda sibanga: Gurooroodeanyu ea ninyar aba jih, nea eara geakeasu ea nileakghleakghi; neawuurjeewi siida boogideat, neawuurjeewi siida nijoar difaayi ng'weani, aba badayda NG'UTAMIIDA, ea aba badayda ng'asheagaaschi ghaydidi.

¹⁰ Aba gideaba ng'eanyiida ninyiit fuga mealuuli, nea ng'eanyiida ea niiguul aba ng'asheega riing'eeda, nea eara nyeega dareapcheeda ea nigajeamiidi. Naweadinga nyaawa ea munyas nea uurjeenga nyaawa ea marachi gil.

¹¹ “Sibaneeda ea ashoohoocheanda mabwada ASEETA, nea eara aba jeedeaba gheanyu munyasnacheeka nyaawa ea dahaachi. Gwarugu NG'UTAMIIDA.

¹² Naweadinga nyaawa gayghoaw heeda adareashi fih aba jeeda misaneeda, heeda jea ghwadarasha ak goobeedeayi; aba gideaba gwayi NG'UTAMIIDA, saawa gaydeasa nyariida, aba jeeda gweayda jea deargweaksa. Gwarugu NG'UTAMIIDA.

¹³ Aba heeda sibanga Samariya naadaayi ng'asheanda muy; inyeesa gwaramooran aba gheawunga Baali ak ghwanung' ghwaschoarda fugeasu bea Israeli.

¹⁴ Nea aba jeeda sibanga Yerusalemu ea naadaayi ng'asheanda nung' ghahamng'eanyi buuneeda inyeesa gamealuuli nea gwanaba ng'uyeega; inyeesa ghaweat fuga sina ng'asheega munyas, nea manda dea jea ghwayamwa geaw jeeda munyinda; aba giteena saawa niwuurji fuga Sodoma aba heedeanyu, nea fuga mida hoowa ea niwuurji Gomora.”

¹⁵ Asi gwayi NG'UTAMIIDA bea lugweega aba badayda sibanga; “Ng'ula gaydabiiw gidang'weanda, ak ghwanung' ghwali beega mideawa furooda; aba gideaba heeda sibanga Yerusalemu niiguuleesa ng'eanyiida sean nung'usiinda heeda bea ASEETA.”

¹⁶ Asi gwayi NG'UTAMIIDA bea lugweega: “Adiidu gooleeysiit ng'asheega ramooraseegwa sibanga rukuneegwa ghusooda mii huumwa; inyeesa gwarugu giirgweatka was gea nyaawa, nea mawoosa gea leabu ghuuta NG'UTAMIIDA.

¹⁷ Inyeesa gwayeeniisa galeagasean fuga fool ng'asheanda NG'UTAMIIDA, ‘Agooga gajabeaha seayu’; ea heeda gilinyoo ghwaduup gida nyaah gurooroadaanyi aba gidaghoosta, ‘Manda gil muy jea ghwanyaseagwa.’”

¹⁸ Nea aba jeeda nyaawa gajea nimiinaada ng'eaha aba madeeda girgweageeda NG'UTAMIIDA ghoaleaydiit ak ghoang'waay ng'asheanda, ghana gajea niiwal ng'eaha ak gooleeysiit?

¹⁹ Ng'ula, siilakghta NG'UTAMIIDA! Nea nuwa mwadi nyarasta ea shaarareeda neay gwaneayi ak gaygoobisa uhuuda siida muy.

²⁰ Nea nyarasta NG'UTAMIIDA ea moamu ghwayam geaw bwak ea ghwahit gida gasa gurooroadaanyi. Nea ng'asheega gajajeeng'ni galanya aba jeeda askwearjoojiga jea ghoan.

²¹ “Aniini miideajeakta sibang'su, iidu ea niweay; iidu ea mii deabalool, ak gwaramooran.

²² Inyeeda ghwanya ea nupka madeeda girgweageedeanyu, abeeda ghwanya gaygwarukwiisa fugeasu ng'asheegeasu, ak abeeda gaygwasachna jeeda naweadinga nyaawa munyas, ea jeeda sinaweega nyaawa munyas.

²³ Ng'ata gwayi NG'UTAMIIDA, “Aniini geawooschi ASEETA neeki, nea meawoosi ASEETA mida heeda sheagi?

²⁴ Ak gwayi NG'UTAMIIDA, heapi siida ghoamu goobiida heeda funyaat jea ea maydaamu dadaahi? Neada aniini ea mwaanyiidi humng'eeda ea ng'eanyiida? Gwarugu NG'UTAMIIDA.

²⁵ Naayiinyi gidarukwiida sibanga was gea ramoorani ng'uyeega aba gheawungeasu, nea gwayeena, ‘Nearamoorani, nearamoorani!’

²⁶ Gajeeyi bwak ea ghoah eeju, gideaba gaygwareengani sibanga fugeasu aba ng'uyeega naba aba gurooruunatka nyaawa?

²⁷ nea gwayeeniisa geat gayghwanung' gwaroosa fugeasu gheawungeasu aba ramooranga rukwiisa geat saawa, gawuurji gidaroosiinda ghweaniga nyaawa badita gheawungeasu aba gideaba ghabwat Baali?

²⁸ Sibaneeda mideawa giirgweatka daramoorana, aba dea mideawa ng'asheegeasu ginung'waadi gwarukwiida aba doobiiwnata. Heapi seendooda ghajaam ghoamu gabareanyi sea ngaano. Gwarugu NG'UTAMIIDA.

²⁹ Ng'ata gwayi NG'UTAMIIDA, ng'asheandeanyu mawuurji beasta, ea gameangooda inyeesa gwanyarja lagheanga ea ghoah basanga?

³⁰ Ng'ula gwayi NG'UTAMIIDA, Aniini geafuurjeewi sibanga, inyeesa gwajagwat ng'asheegeasu ak gaba nih adaw niirja.

³¹ Ng'ula geang'ucheewi sibanga, gwarugu NG'UTAMIIDA, inyeesa gwayeena aba ghuusiga nyaawa nea gwayi, ‘Gwarugu NG'UTAMIIDA’

³² Ng'ula geafuurjeewi fuga ramoorani ng'uyeega, gwarugu NG'UTAMIIDA, ak gwarukwiida nea ghwanung' ghwaschoarda fugeasu aba ng'uyeega nyaawa nea maduupa, nea ea meajeaktani ghana danung' gwasin; saawa hean marachi gil aba heeda fugeasu, gwarugu NG'UTAMIIDA.

Sareenda NG'UTAMIIDA

³³ “Inyas gaygoobearseey siyagi aba jeedeaba fiisu ghana sibaneeda, ghana ashoohoocheanda, gideaba, ‘Sareenda NG'UTAMIIDA naaha gil?’ abeeda gajeeshiina, ‘Sareenda agooga gil, ak gwayi NG'UTAMIIDA, aniini gaydaadaardaneegwa.’

³⁴ Ama inyas gwayi sibaneeda, ghana ashoohooda, ghana siyagi aba jeedeaba fiisu, ‘sareenda NG'UTAMIIDA,’ abeeda gaydalas siisi ea fugeaba gheanyi.

³⁵ Gaygaba siisi eesha giischeewoocheandaanyi ak ea niba nih eesha orjeeda geanyaawa, ‘Ghwanya naaha NG'UTAMIIDA?’ ghana ‘Gwayiin NG'UTAMIIDA?’

³⁶ Nea ea maygudu arukuni, ‘Sareenda NG'UTAMIIDA,’ gicha, aba gideaba sareenda gaba ng'asheega ghuuta siida, nea inyeesa ghoaschoardi ng'asheega ASEETA mideawa eaweega, was NG'UTAMIIDA bea lugweega, was ASEETEANYA.

³⁷ Ak gajayeeshiina sibaneeda, ‘NG'UTAMIIDA gwayiin,’ ghana ‘NG'UTAMIIDA gwayeeshiineeyiin.’

³⁸ Ng'ata gwayi NG'UTAMIIDA, inyas gooyeenyi, ‘sareenda NG'UTAMIIDA,’ aba gideaba nooyeenyi, “sareenda NG'UTAMIIDA,” nea ghayi ea neayeeshiineegwa, “Adiidu gooyeenyi, ‘sareenda NG'UTAMIIDA,’”

³⁹ abeeda goong'ulayi aba huumwa gaydaang'waanyeagwa ak geajaktaneegwa daang'aamwaneegwa madeedeanyu, agooga ea mujiineeda ghayi eagoonyeegwa sea ghweanigeagwa.

⁴⁰ Ak gaydeaneegwa baspaseega ea nyigooda maygwaroosa fih.’”