YEREMIYA 21 - Bibliyeeda Ghaydit

Gearamoar joorda Yerusalemu

¹ Nih ng'asheanda hidu heeda Yeremiya gil nea gwaleabu heeda NG'UTAMIIDA, damanda ajeaksa niny sugoocheanda siguura Sedekiya geaba Bashuri bea Malkiya ea Sefaniya was ashoohoocheanda bea Maaseya, ak gwayeesha,

² “Musiischeewaneasa aba heeda NG'UTAMIIDA, aba gideaba Nebukadinesa was sugoocheanda Babeli nigasa gang'ucheeweasa; abeeda gwadeepa NG'UTAMIIDA ghabwaydaneasa aba giteena deamdeamangaaschi, ak gajiidu ghwanung' ghang'amwa heedeanya.”

³ Ng'ata gwayeesha Yeremiya saawa:

⁴ “Gichea arukusiina Sedekiya ea nihi, ‘Gwayi NG'UTAMIIDA, was ASEETA fuga Israeli: Ng'ula gaydanung' gwayamseegwa geat dabita ng'ucheeda mida geatingeagwa oong'utooscheati sugoocheanda Babeli ea heeda fuga Galdayo was gea ninaaweagwa aba badayda hilooga mujiini; ak gaydaamughuush aba giteena ghapka bugusteaba mujiineani.

⁵ Ak eara aniini gaydang'ucheeweegwa aba geatinda doabiiwaat nea haw uur, aba nyarasta ea ng'weaninda.

⁶ Ak gaydahuuyda fuga sean abiita mujiineani, buuneeda ea diyeanga; hean gaygoosha sean aba geeyooda dawni.

⁷ Ng'ata, gabiikta gwayi NG'UTAMIIDA, Sedekiyaheeda was sugoocheanda Yuda, sea fugaaschi bea gadiyeeda, ea fuga mida jeedeaba mujiineani gea gudu gwandeawa eaweega ghuha dawni, ea ng'uta, ea geejeeda gaydaahaak geatinga sugoocheanda Babeli was Nebukadinesa ea geatinga weajoodiga nyaawa, ea geatinga fuga gasa eaweega nyaawa. Ak gaygahuuyda saawa aba ng'uta, ak ea mayghabwayda saawa, ghana gwalagu, ghana ghawiish jih.’

⁸ “Ak gajeeshiina fiisu: ‘Gwayi NG'UTAMIIDA, ng'ula naayiinyi madeedeang'wa ghuhooda ea miyeeda.

⁹ Gilinyoo goobiida jeedeaba mujiineani gajeabwar aba ng'uta, ea geejeeda, ea geeyooda muy; aba gea jea gaweay ghoahiimda geat aba heeda fuga Galdayo was gea nighaseagwa gayghaghu ak gaba seayu.

¹⁰ Aba gideaba gwayi NG'UTAMIIDA; Neafursinyeewi mujiineani aba munyinda nea mii aba gea miyaasiin gil, gajeataw sugoocheanda ng'eanyiida Babeli ak gaygoojoon beasta.’

Girgweageeda gheeda sugoocheanda Yuda

¹¹ “Ak gajeeshiina gheeda sugoocheanda Yuda, ‘Aleaydiit ng'asheanda NG'UTAMIIDA,

¹² Gwayi NG'UTAMIIDA, Ea gheeh Dawdi “‘Asina ng'asheega doobiiweadi gidang'eada sakteayda, Ak goolealni geatinga siida ghabwas fuga goola eang'waay, Adiidu ghwayeata nyarasteanyu beasta, Ak ghwayeat nea maygudu gwanda siichea gwanuus. Aba sinaweegeagwa munyas.’”

¹³ “Ng'ula, gaydang'ucheeweegwa, Ea fuga abiita moangoachi Ea gea mida jeeda lagheaneeda mida mooheeda; Agoogeeda ooyeenayi, ‘Gayghwararang'aan ng'eaha gang'ucheeweasa, ghana gayghoamu ng'eaha ghwahidu heeda siipiiti?’ Gwayi NG'UTAMIIDA,

¹⁴ Gaydeargweakseegwa aba giteena sinaweegeagwa, gaydeajoon beasta dareabeataanyi, ak gayghaghwarda haleanjeeda sean neaweesa niny.”