YEREMIYA 20 - Bibliyeeda Ghaydit

Jaliida Yeremiya sea ashoohoocheanda siguura Bashuri

¹ Ng'ata ashoohoocheanda siguura Bashuri, was orjeeda Imeri, nea niny abeeda ea siida haw miineadaysa gheeda NG'UTAMIIDA, hean ghwayiiy ng'asheega ramooran Yeremiya.

² Ng'ata ghabwar Bashuri Yeremiyaheeda was sibaneeda, ak gwajaksa ghealooniga mida gidaghuuta duukusa heetiyeada bea Benjamini aba jeeda gheeda NG'UTAMIIDA.

³ Iimuchu sakteayda gootin aba ghealooniga Bashuri sibaneeda was Yeremiya, hean gwayeesha Yeremiya niny, “NG'UTAMIIDA maygudu gaguureeweeyi Bashuri, hean geeguureeweeyi Haloota gwanda meadajeega sean.

⁴ Aba gideaba gwayi NG'UTAMIIDA: Ng'ula, gaydanung' huwa haloota aba badaydaang'u ea heeda fuga irooroocheewi. Hean gaygahuuyda ng'ula weajoodiga nyaawa nea ang'iing'i ging'ulu. Ak gaydaahaak fuga Yuda heeda geatinga sugoocheanda Babeli; ak gayghwaat saawa ghoah soomjooga aba Babeli, aba ng'ata gaygahuuyda saawa aba ng'uta.

⁵ Aba ng'ata gaydaadaw saawa meanang'oocheanduumeeda mida jeeda mujiini, ea haleanjeeda mida jeeda, ea gea haw sheayeat, ea gheaseeda sugoodiga Yuda heeda weajoodiga nyaawa, ak gayghaghas aba uurda, ak ghwaat Babeli.

⁶ Ak ang'iing'i, Ea Bashuri, ea fuga sean abiita gheang'u, gajeayaadeagwa ahuwa giing'oonyanga, gajeayadeagwa Babeli, ak gajameewiisiina hoowa, ak geebung'seegwa hoowa, agooga sea fuga oorooroocheewi, gea ghayi iramooriisi ng'uyeega.”

Yeremiya gooniiksa NG'UTAMIIDA

⁷ Ea NG'UTAMIIDA, ang'iing'i nireenganean, ak ghaamwaschi; ang'iing'i guwoosi haw uur ea burdeawean, ak ea nijoarjaani. Aniini neawooschi siida rearga askwearda sean; gamachiidanean giliwas sih.

⁸ Iinyo dabalool, inyeesa geayeawdi ak geajuurji, “Nyariida ea darariida!” Aba gideaba ng'asheanda NG'UTAMIIDA niiwa aba heedeanyu reekusiinda ea shikooda askwearda sean.

⁹ Nea inyas geayeenyi, “Maygudu dargu gheawungaaschi, ghana dabaloola aba gheawungaaschi,” jeeda gurooroodeanyu abeeda gwanda gida yeata beasta, uurji gil sirasa jeeda geakeasu, inyeesa geasinyi daadeal aba jih ak hean ghaaraanyi.

¹⁰ Gwanda fuga aayiinyi nea ghwaak badaydeanyu. Gwanda muuwda meatkwajeega sean! “Oahaakta niny! Anung' Eahaakta!” Ng'asheesu gwarugu fuga earooroocheewi, nea goomuuku giibeedeaydeanyu. Ak gwayi, “Gwadeepa ghamwas eayaak gheanyanga, ak abeeda gajeajoar, ak geawaldi mureandooda aba headaanyi.”

¹¹ Ak NG'UTAMIIDA aba heedeanyu gawuurji siida mwaay haw uur; ak abeeda fuga ahaaktanaan gaygwaruusa geat, nea mayghoamu ghwajoaran. Saawa gayghwanyas baspaseega hees, aba gideaba maygwajooriischi. Nea nyoota nyaawa bea mureeda ea maygwaroosa fih.

¹² Ea NG'UTAMIIDA bea lugweega, ang'iing'i gisimay siida doabiiwaat, nea giideenayi gurooruunatka ea saseenuuka nung' dadaah nea giwaldi mureandooda aba heeda nyaawa, aba naayiinyi mureandoodeanyu headaang'u.

¹³ Asarmasiina NG'UTAMIIDA; Oakghaambiida NG'UTAMIIDA! Aba gideaba niiyaaw eaweeda siida bwarbwar aba geatinga fuga munyas.

¹⁴ Gagasa eamoashta eaweeda sijiilnean! Eaweeda jiilnean iya, adiidu ghwanyas ghawooda!

¹⁵ Gagasa eamoashta siida eassa iita bwaabwa, “Siji baleanda was orjeeda aba gheang'u” Ak ghwanung' gahoosan muuchi.

¹⁶ Sisa gagasa gawuurji mujiinajeegiga ghayi huuyda NG'UTAMIIDEAN nea manda baydeayda; gagasa ghwayiiy shookcheanda sakteayda ea giiguuleanda askweari,

¹⁷ Aba gideaba manuseani nea gutanda jeeda iya; abeeda ghwanyawa iyya gayghoah bung'eedeanyu, ak abeeda jeadaanyi gajea haw galeagasean.

¹⁸ Ghwasaan anda aniini gearini jeeda iya heapi gearidu danyas sawanadeeda ea giiseaneega, ak geabiidi eaweega baspaseega?