YEREMIYA 2 - Bibliyeeda Ghaydit

ASEETA ghoahaaghwa fuga Israeli

¹ Ng'ata ghwaani ng'asheanda NG'UTAMIIDA heedeanyu, ak gwayi,

² “Una ak girukwiidi giijasi aba heeda fuga Yerusalemu, Gwayi NG'UTAMIIDA, Aniini ghaapkaachi doobiiwnata gheareemaneanduumeadaang'u, ea bariinyeagaagu uurji gea sibeeda, gidiyaataaydi geeshteanyu aba jeeda dareapcheeda, jeeda ng'eanyiida miyeehisa gil.

³ Israeli abeeda ea ghaydit aba heeda NG'UTAMIIDA, saawa haghweagaaschi madeeda gil. Fuga sean jea ghwasanyi gayghwanyas giidiinyeanda; nea gaygoobisa saawa riing'eeda, ng'asheanji gwarugu NG'UTAMIIDA.”

Riing'eeda gweargwa Israeli

⁴ Ooleeysiina iita ng'asheanda NG'UTAMIIDA, Ea gheeh Yakobo, ea gealga sean bea Israeli.

⁵ Gwayi NG'UTAMIIDA: “Ghweanigeagwa ghwadaah munyinda naaha aba heedeanyu bwak ea ghang'amwa heedeanyuun? ak ghwaat geeshta haleanjeeda marachi gil, ak hean eara saawa ghoah fuga marachi gil

⁶ Nea ea mii gwayi, ‘Gwanda yeenu NG'UTAMIIDA ghayi aruunaneasa jeeda ng'eanyiida Misri, nea ghoadoabiiweasa aba jeeda dareapcheeda, jeeda ng'eanyiida eeshtearajeega ea shoomeanga, jeeda ng'eanyiida ghajaam nea gaba misaneeda duu, jeeda ng'eanyiida moamu siida gwasik jeeda, heeda moamu goobiida siida?

⁷ Ng'ata geayeaneegwa jeeda ng'eanyiida miy ahoosasiina haghweagaaschi ea haleanjeadaanyi miyas. Ak gooweayi jeeda hean ghoang'udi ririnnyeanda ng'eanyiideanyu, ak ghoanung' ghoah ng'eanyiida eagoonyeegwa munyinda.

⁸ Nea ashoohoodiga ea mii gwayi, ‘Gwanda yeenu NG'UTAMIIDA?’ Fuga ang'oonyi digheanyeeka mudu ghwanalan; nea jeagiischoodiga ea ning'amwa heedeanyu; nea sibanga ea niramooran aba gheawunga Baali, nea ghwaat geeshta haleanjeeda marachi gil.

Girgweageeda NG'UTAMIIDA aba badayda fugaaschi

⁹ “Ak hean gwayi NG'UTAMIIDA, aniini gaydaaganeagwa ghoorjooda, ea diibigeaba geagwa.

¹⁰ Una nea girakti ea hita ng'eanyiida Gupro, ak goocheakti fuga jea gaweay gagwalsa ghaang' ng'eanyiida Gedari; ghwadaah heapi ea gwanda ng'asheanda uurji nih.

¹¹ Gwanda eemeeda ghayi niyam aseecheeka nyaawa eara mii aseecheeka? Ak ghamneawa fugeasu ea ninung'usean heeda ak ghwaat geeshta haleanjeeda marachi gil.

¹² Asi ahama ng'eanyi aba ng'asheanji, Ea humng'eeda, abeala nea goohirbabanyi, ng'asheanji gearugu NG'UTAMIIDA,

¹³ aba gideaba fugeasu nisin riing'ooji iyeenya: ninung'wanaan heeda, aniineeda was eenda mideawa beega eaweega, ak gagurgursa geat healatka, healatka seaweadi jeesin moamu goodiiw beega.

Gidanyas fuga Israeli aba nung'weadayda doobiiwnata

¹⁴ “Neada Israeli ea soomjeanda? Neada geejiila soomjeandumeeda? Ghwasaan anda geanung' ghoah diyeayda sihoona?

¹⁵ Nea ghoamuum ng'anyeeka aba badaydaanyi, nea ghoamuum aba giijuureanda. Nea ng'eanyiidaanyi geanung' ghoah eeshtearajeanda; ak mujiinajeagaaschi ghoah eemeega, manda jeeda sih.

¹⁶ Ak gicha fuga Memfisi ea gea Dahpanesi ea ninyarja shiipka uhuudaang'u.

¹⁷ Ng'asheesu noanung' goobisseegwa aba gideaba ghoanung'waadi NG'UTAMIIDA was ASEETEANG'WA, damanda ghayi adoabiiweagwa aba naweeda?

¹⁸ Ak iyoong'ulayi gajanyasa naaha iyooweayi ng'eanyiida Misri, leeyda beega eenda Nayli? Ghana gajanyasa naaha iyooweayi ng'eanyiida Ashuru, leeyda beega eenda Furati?

¹⁹ Asi ang'iing'i gaygabiikseey munyindaang'u, nea ng'ooweataang'u gayghwaaknyi, Nala ak gidaahi gideaba eamuy ak ea ng'waan, asi nala ak gidaahi gideaba nih ng'asheanda muy muuchi mideawa ng'weaniidooda; aba gideaba ninung'usi heeda NG'UTAMIIDA, was Ng'utamiida bea lugweega.

Fuga Israeli ghwanung'waada badita NG'UTAMIIDA

²⁰ “Ghayi aba garayi goohirjeawayi yookajeegeagwa ak goong'acheawayi ghealoonigeagwa; ak gooyeenyi ‘majeabwadeayi’. Ak aba iheenga heayeeniga geawi ea gumsheaka geediga nyawiiri ghoabwachi aseecheeka marachi gil.

²¹ Geahistaneeyi nea geanung' uurjeewana sabiibooda aaloachi, bea mbeeyooda miyas. Ak ghamneawa ea niyamdiini geawi ea huwa sabiibooda dareabeeta?

²² Ghamneawa eara ahuuna geawi aba gharfeahooda ea saabuuneeda saang'a, ririnnyeanda ramaseanyeekaagu gudu gwanda madeedeanyu, gearugu aniini NG'UTAMIIDA was ASEETA.

²³ Gajamuustaan eena, ‘aniini miyeeng'udanani ririnnyeanda, nea miidaat geeshta Baali’ Ng'ula naweadaang'u aba jeeda moangoachi; ak gidaahi gida nisini– guwuurjeewi dayeenda ngamiya daanghan,

²⁴ gawuurji digeeda jarooda nineaji dareapcheeda, aba iigasa jurukta inyeesa gwajooneada jeameeda, gayghoamu ghoadeal ng'eaha? Siisi nyooh gagasa niny maygoodeawiit geaw; iiguul sheedaanyi gajeanyas.

²⁵ Adiidu gisawani geeshangaagu aba beata mwadaagha ghana sawana muwooktaang'u aba muwooshta. Ak ang'iing'i giyeeni ‘suh ng'asheega mwadaagha gil, aba gideaba naabwariinyi rabasta, ak gaydaat geeshanga nyaawa.’

Fuga Israeli gamiisa lasita

²⁶ “Gawuurji baspaseega mareanghweanda iisiing'waayi, eara gheeh Israeli gajeapwaaspwaas: sugoodiga nyaawa ea fuga nyaawa hees, ea ashoohoodiga nyaawa ea sibanga nyaawa,

²⁷ fuga eeniisa geeta ang'iing'i ‘guwoosi bwaabwa,’ ea lagheaneeda ‘guwoosi iya.’ Aba gideaba ninung'usean heeda, nea mabiiksean aniini. Ak aba damanda sawanaduutka nyaawa gwayi, ‘Ng'eada lealneasa!’

²⁸ Gwanda yeenu aseecheekeagwa ghayi oosisi geat? Anung' ghang'eatng'eat, eadaaha ea jea ghoamu gwalealneegwa, damanda sawanaduutkeagwa; aba giteena mujinajeegeagwa Ea Yuda, ea giteena aseecheekeagwa gil.

²⁹ NG'UTAMIIDA gwayi, “Agooga gooniiksean ghwasaan? Agooga noojaktanean.

³⁰ Aniini naayaagi fugaagu ghoorjooda ak ea marachi gil, ak ghaheawa girgweaksinda; ak ng'utaang'u ea nihuuydeayda sibangaagu ng'adiida bearji jalooda.

³¹ Asi agooga, Ea seaygoojiga, ooleaydit ng'asheanda NG'UTAMIIDA. Heapi aniini naahuuyi dareapcheeda aba heeda fuga Israeli, ghana ng'eanyiida mideawa misaneeda duw? Ghwasaan anda fugeasu gwayi ‘Aseasa meawasi radanga, maygudu eebiikna gicha headaang'u’?

³² Heapi huda suumng'eega ghoamu gwaroosa suulgaaschi, ghana sibeeda gwaroosa hanang'weandaanyi? Ghwasaan anda fugeasu mudu ghoopkaadani aba eawoojiga manda mooneeda.

³³ “Ang'iing'i guwoosi geariir aba gasooda ng'wasanga! Eara gadeemga gwaneadi niinaali naweadingaagu.

³⁴ Jeeda hang'weakaagu sinyasa foojeanda fuga barbari mandeawana giidiinyeanda; nea mii hita nea gwanyarja gheang'u. Ak eara aba ng'asheesu seaniini

³⁵ ang'iing'i giyeeni ‘meandeawani giidiinyeanda; aba huumwa nyarastaanyi nisheagiideewa heedeanyu.’ Ng'ula aniini gaydeargweakseey aba gideaba giyeeni, ‘miidasin riing'eeda.’

³⁶ Ghwasaan anda inyeesa giing'arng'ari geaw nea giyamyami seareengaagu! Gayghoabwasbwasnyi fuga Misri gawuurji gidabwasbwastaneeyi fuga Ashuru.

³⁷ Ak eara hooweani gayrinana nea niyiin geatinga uhuudaang'u, aba gideaba NG'UTAMIIDA nijakta fuga eawoojisu ighusi, nea ea maynyagaada aba ghusooda nyaawa.